SAM 27 - Bawm Common Language Bible Version

Sawrnâk Thlacham

¹ LALPA chu ka chêu leh ruangsuahnâk asi. âukhawm ka ṭih lai loh. LALPA nih chun ṭihnungkâi lakah mi a ka hum le; ka ṭih rêng lai loh.

² Misual tla nih an ka do hen thah ding an ka tum le, anna suih le, an tlû.

³ Kawrsen zawzawng tla nih hawng ka kulh khawmsele, ka ṭih lai loh; ka mêlma tla nih an ka do khawm ah Pathian chu ka zumh kumza lai.

⁴ LALPA chu thil pakhat ka deih le; thil pakhat ka duhtak mi chu: ka damsung zawzawng a in ah um kumza ding hen, a ṭhatnâk chu chê ti kumza ding hen leh amah ruinâk deih kumza ding hen.

⁵ Lawksawng ni ah chun a sinah hawng ka dawrtir lai. A Biakin ah chun him tak hen hawng ka kil lai le, lungpi sâng tak tlûnah him tak hen hawng ka siah lai.

⁶ Ka kiangkam ah mêlma tla chu ka neh na lai. Lâwmnâk aw-hâu hen a Biakin thenhlimh ah bâwlnâk tla ka ap lai le; la ka sak lai le, LALPA chu ka sawr lai.

⁷ LALPA, kan auh tikah hawng ka ngâi piak rawh! Ka lakah khuaruat le, hawng ka sâng!

⁸ “Hawng le, hawng ka sawnh” na ti. Kei nih, “LALPA,

⁹ ka hawng lai, ka lakah mi a thup lah!” ti hen, ka sâng. Ka lakah na thinrun lah; na to-aw hi hertâk lah. Nang hawng ka ṭangpitu na si; hawng ka mâk lah le, hawng ka kaltâk lah, Ka Pathian, ka Ruangsuahtu.

¹⁰ Ka nu leh ka pa lam nih chun an ka kaltâk kha, khawmsele LALPA lam nih chun hawng ka kilkâwi lai.

¹¹ LALPA, ti ding na ka duh mi chu hawng ka sîntir le, mêlma tam tak ka nei ruangah himnâk lampi ah hawng ka rui vima.

¹² Âwkrâwl leh thihnâk hen an ka dotu ka mêlma tla sinah hawng ka mâk thlap lah.

¹³ Tuliau san ah hin LALPA ṭhatnâk chu muh ding hen ka dam lai ti ka theih.

¹⁴ Lungdawng lo hen LALPA chu zumh le, amah lakah a ngauh rawh. LALPA chu zumh rawh.