SAM 25 - Bawm Common Language Bible Version

Kilkâwi Ding Leh Ruai Ding Hen Thlachamnâk

¹ LALPA, na sinah thla ka hawng cham; ka Pathian, na lakah ka ngauh.

² Ningzakkâi tak hen neh ka siding mi lakah hawng ka hum; ka mêlma nih an mitsen hen an ka zauh ding siang lah!

³ Nangmah zumhtu tla tlûnah chun nehnâk na tlungtir lo, sikhawmsele, nangmah lakah heltu tla sin cho a tlung.

⁴ LALPA na lampi hawng ka sîntir le, hawng ka theihtir.

⁵ Na thudik ziatê hen um ding hen hawng ka sîntir le, ka Pathian, hawng ka humtu na si ruangah kanan zumh kumza lai.

⁶ LALPA, a lânah na vêlneihnâk leh zângfahnâk dawnglo na zauhtir mi chu theihkumza.

⁷ Ka seino liauah ka sualnâk leh diklonâk chu hawng ka ngaihdam. LALPA, na ṭhatnâk leh na zângfahnâk hen hawng ka theihkumza.

⁸ LALPA chu â rep hen a ṭha ruangah misual tla chu an kalnâk ding lampi a sîntir na.

⁹ Mi â nâutir mi chu lampi dik ah a ruai na le, a duhzia a sîntir na.

¹⁰ A thupêk leh a dân thu zûltu tla chu a zângfahnâk leh zumhkâinâk hen a rui na.

¹¹ LALPA, ka sual tla a tam ruangah na thutiam ziatê hen hawng ka ngaihdam.

¹² LALPA lakah ê-aw ngâitu tla nih chun an kalnâk lei lampi chu a sinah anna sîn lai.

¹³ An lampi a tluang kumza lai le, an fa le tla nih ram chu anna ting lai.

¹⁴ LALPA chu amah thu ngâitu rangah chun an hâwikawmh asi le, an sinah a dân thu chu a birhtir.

¹⁵ Zeiliau zawng ah LALPA sinah ṭangpi ka hâwl kumza le, ṭihnungkâi lakah mi chu ruang hawng ka suah.

¹⁶ LALPA, keimah leiah hawng a her le, ka lakah khua hawng ruat rawh, ka chak lo hen keimah lâwng kasi ruangah.

¹⁷ Ka dîtnâk bângtir le, ka lawksawngnâk zawzawng lakah mi ruang hawng ka suah.

¹⁸ Ka tuarnâk leh hamhnâk zawzawng hi dawn le, ka sualnâk zawzawng hawng ka ngaihdam.

¹⁹ Ka mêlma tam zia leh a ka huatu tam zia hi zauhnik.

²⁰ Hawng ka kil le, ruang hawng ka suah; neh hen ka um ding mi lakah hawng ka vêng. Na ka kilkâwi ding hen na sinah ka hawng.

²¹ Nangmah lakah ngauh mi kasi ruangah ka ṭhatnâk leh zumhkâinâk nih hawng ka hum seh.

²² Pathian, na mi Israel tla chu an lawksawngnâk zawzawng lakah mi ruang suah na!