SAM 24 - Bawm Common Language Bible Version

Lal Rokual Chu

¹ Laikulh leh a sungah um mi zawzawng chu LALPA tâ asi. Tual leh a tlûnah um mi zawng khawm a tâ asi.

² Tual chu tî thûk tak rangah chun a siam le, a lungphûm chu tisumsumriat tawdeng ah a siah.

³ LALPA tlâng ah âu a kâi kho lai? A Biakin Thenhlimh ah âu a lût kho?

⁴ A thilti leh a dawnruatnâk thenhlimh mi, ruk mâimâk lotu leh âwkrâwl hen thutiamh mang lo mi chu;

⁵ LALPA nih mal a sâwm na hen, a hum na lai; Pathian nih sual nei lo hen a ruat na lai.

⁶ Pathian mâika ah hawngtu tla leh Jakob Pathian mâika ah hawngtu tla chu, chubang tla chu an si.

⁷ Kulh kawtkâ tla chu kauh ule, a lânah mi inkhâr tla chu awng u, chun lal rokual chu a hawng lût lai.

⁸ Lal rokual hi âu me si? LALPA chak leh thiltikho tak, râltuknâk ah nehtu LALPA chu asi.

⁹ Kulh kawtkâ tla chu kauh ule, a lânah mi inkhâr tla chu awng u, chun lal rokual chu a hawng lût lai.

¹⁰ Lal rokual hi âu mesi? Nehtu LALPA, amah chu Lal rokual tak chu asi!