SAM 22 - Bawm Common Language Bible Version

Ngaihsia Hen Ṭapnâk leh Sawrnâk La

¹ Ka Pathian, ka Pathian, zei rangah na ka kaltâk? Lungdawng rê hen ṭangpi deih hen ka âu le, sikhawmsele a hawng rerêng lo!

² Ka Pathian, sûn ah ka nan auh le, khawmsele na sâng lo; zân ah ka nan auh le, ka dîn rêng lo.

³ Sikhawmsele, nang, Mi Thenhlimh, Israel nih a nan sawr mi laltophah ah na to.

⁴ Kan thlâktu tla nih nang chu a nan zumh le; a nan rinhsanh le, ruang na suah na.

⁵ A nan auh le, ṭihnungkâi lakah mi an suak, nangmah a nan zumh le, an lungdawng lo.

⁶ Khawmsele, kei chu minung kasi lo rawh, changchêl kasi, mikip zauhnawmh leh nihsanh hen ka um!

⁷ Hawng ka muhtu zawng nih an hawng ka nihsanh; an lei an sâk le, an lû an lei.

⁸ “LALPA, na ngauhsanh silo ma? Zei rangah an hum lo ne? LALPA nih an duh mi chu, zei rangah an ṭangpi lo ne?” an ti.

⁹ Ka sêm liau thawk hen him tak hen hawng ka suaktirtu chu nangmah na si, fasêm kasi liau khawm ah nangnih na ka hum.

¹⁰ Ka suaktîr thawk hen nangmah lakah ka ngauh le, nang chu ka Pathian na si kumza.

¹¹ Hawng ka ṭhial tâk lah! Lawksawngnâk a nâi, hawng ka ṭangpitu ding pakhat khawm an um lo.

¹² Mêlma tam tak nih chawchal hawi hen an ka kulh dak; ka kiangkam zawzawng an khat, Basan ram ah chawchal a râng mi tla hâwi hen.

¹³ Chakeibaknei hawi hen an kâ an âng le, an hûk hen an ka sâm.

¹⁴ Tual ah tî a tlê mi hâwi hen ka tha â zûk ver. Ka liahchân zawzawng khawm a pelh hep; ka thinlung chu khuailul hâwi hen a zawr.

¹⁵ Ka rawm chu valeidip hâwi hen a châr le, ka lei khawm ka dang ah â bêk ving. Phildip nâwngah thi ding hen na ka mâk.

¹⁶ Misual murui nih ui râng tla hâwi hen an ka kulh le, an ka naih; ka kut leh kê an sâm ver.

¹⁷ Ka ruh zawzawng a lang ver le, ka mêlma tla nih an ka zauh le, an ka ngiat.

¹⁸ Ka nipuan tla chamchawh hen anna ṭhen.

¹⁹ LALPA, hawng ka lât lah! Hawng ka ṭangpi ding hen hawng sawm rawh!

²⁰ Nâmsâu lakah mi hawng ka sanh le, ka nungnâk hi bang ui tla lakah mi hum rawh.

²¹ Hi bang chakeibaknei tla lakah mi ruang hawng ka suah le; chawchal râng tla lakah hin ṭangpitu ka nei lo.

²² Na thilti chu ka mi le tla ka simh na lai, anna pumhnâk tla ah ka nan sawr lai.

²³ “Nannih to-aw tla, LALPA chu sawr u! Jakob thlâk tla, amah chu sawnh u! Israel mi tla, amah chu sawnh u.

²⁴ Mipâm tla chu a thlawrhthlâu lo le, an tuarnâk tla khawm ngaihlo lem a thlâk lo, anmah tla chu a hawitâk na lo le, ṭangpi an deih tikah chun a sâng na.”

²⁵ Pumhnâk tling tak lakah na thilti ruangah ka nan sawr lai le, a nan sawnhtu mâika ah ka tiamh mi bâwlnâk ka ap lai.

²⁶ Mipâm tla nih an duh tâwk an ei lai le; LALPA sinah hawngtu tla nih chun amah chu an sawr lai. An sul-le-lam tluang kumza seh!

²⁷ Phun zawzawng nih LALPA chu an theihkumza lai. Laikulh mun kip ah mi chu amah leiah an hawng a hawi lai. Chi kip nih amah an sawnh lai.

²⁸ LALPA chu lalchem asi, phun tla lâi a rêl.

²⁹ Mi zûm tla chu a sinah an kûn lai; thikho mi minung zawzawng a mâika ah an kûn lai.

³⁰ Hi nûnthâi ah thlâk tla nih a rian an ṭuan piak lai; mi nih thlâk a hawng um ding mi sinah LALPA thu chu an sim lai.

³¹ An suak lo rih mi tla khawm simh an si lai; “LALPA nih a mi tla ruang a suah!” ti hen.