SAM 20 - Bawm Common Language Bible Version

Nehnâk Ding Hen Thlachamnâk

¹ Lawksawng ni ah chun LALPA nih a nan sâng seh! Jakob Pathian nih a nan hum seh!

² A Biakin thawk hen ṭangpinâk a nan pêk hen, Zion Tlâng thawk hen a nan bawmh seh.

³ Na thilpêk tla zawzawng an pawm piak hen, na bâwlnâk ah chun a lâwm seh.

⁴ Na duh mi zawng chu a nan pêk sele, na thiltum tla zawzawng chu an dingchangtir seh.

⁵ Churawhchun, na nehnâk ruangah lâwm hen kan âu lai le, kan Pathian sawr hen na nehnâk kan lawmh lai. LALPA nih na deihnâk zawzawng an sâng seh.

⁶ LALPA nih a lalchem thîm mi sinah nehnâk a pêk tih tuah ka theih; a vân thenhlimh thawk hen a sâng le, a thiltikhonâk rokual tak hen nehtu ah a siam.

⁷ Mi zeimaw mi nih an râltuknâk kari leh an rang tla an rinhsanh le, khawmsele kannih lam nih chun LALPA, kan Pathian thiltikhonâk kan rinhsanh.

⁸ Chu hâwi mi zapi tla chu anna suih lai le, an tlû lai, kannih lam chu kan thawk lai le, bir tak hen kan dîr lai.

⁹ LALPA, lal chu nehnâk pêk le, ka nan kawh tikah hawng kan sâng rawh.