SAM 19 - Bawm Common Language Bible Version

Thil Siam Lakah Pathian Rokualnâk

¹ Vân nih Pathian rokual zia chu thungâi a langh fiangtir! A thilti tla chu fiang tak hen a langhtir!

² Sûn nih hin sûn sinah thu a sim singsuan vima; zân nih hin a zân nawlh sinah thu a sim.

³ Thusimnâk leh hawlh rerêng a um lo, zei aw-hâu khawm â thei lo.

⁴ Sikhawmsele, a aw-hâu chu laikulh zawzawngah a thang le, tual dawnghnâk tiang theih asi. Pathian nih nî rangah vân ah khin in a siam le;

⁵ zînglei chun mo dâwngpu lâwptlo hâwi hen a hawng suak, tekzuamtu nih tekzuamnâk a mawhlah hâwi hen.

⁶ Khatlei vân dawnghnâk thawk hen a khatlei kâng dawngh tiang tan phak hen a kal. A linhnâk chu zeikhawm nih a phenh kho lo.

LALPA Dân Chu

⁷ LALPA dân chu a rangtling le, chaknâk thar a pêk. LALPA thupêk chu zumh a kâi asi. Mifinglo tla rangah finghnâk a pêk.

⁸ LALPA dân chu a dik le, a zûltu tla chu anna lâwm. A thupêk tla chu a dik le, thinlung ah theihthiamnâk a pêk.

⁹ LALPA sawnh hi a ṭha le, a um kumza lai. LALPA lâirêl tla chu a dik le, an ṭha kumza.

¹⁰ Ngûn ṭha chem mi ngâk hen duh an kâi dauh. Khuaizû a tak chem mi ngâk hen a thlum dauh.

¹¹ Na to-aw rangah theihthiamnâk na ka pêk le; ka zûl ruangah lâwmman pêk hen ka um.

¹² Mah diklonâk tla chu âukhawm nih an muh kho lo. Aw Pathian, sual thup lakah mi chu ruang hawng ka suah!

¹³ Duhnâk sual lakah mi hawng ka hum le, ka tlûnah lâirêltir lah. Churawhchun, ka rangtling lai le, sual diklo lakah mi chu ka lît lai.

¹⁴ Ka thu leh ka dawn mi tla hi na rangah pawm tlâk si seh. LALPA, ka kulhpi leh hawng ka tlanhtu!