SAM 18 - Bawm Common Language Bible Version

David Nehnâk La

¹ LALPA! hawng ka vêngtu na si! Ka nan zângfah zia chu!

² LALPA chu hawng ka vêngtu leh ka kulhpi bir na si. Ka Pathian chu ka himnâk asi le, amah lakah ka him. Phaw hâwi hen a ka hum le, a ka vêng le, him tak hen hawng ka kil.

³ LALPA chu ka auh le, ka mêlma lakah mi ruang hawng ka suah. LALPA chu sawr u!

⁴ Thihnâk ṭihnungkâi chu ka kiangkam zawng ah a um le; siatnâk fâk tak chu ka tlûnah a hawng tlung.

⁵ Thihnâk ṭihnungkâi ka kiangkam ah a um le, thlân nih chun ka rangah thang a ka tunh piak.

⁶ Ka lawksawngnâk ah LALPA ka auh le; hawng ka ṭangpi ding hen ka Pathian chu ka kawh. A biakin thawk hen ka hâu a theih; ṭangpi ding hen ka âu hâu a ngâi.

⁷ Pathian a thinrun ruangah tual chu a thir le, â nîn; tlâng tla chu â vâm le, â ṭhen.

⁸ A nârkua thawk hen meikhû a suah. A kâ thawk hen khanghnâk mei leh meiṭil a suah.

⁹ Vân a ṭhen phawk le, a kâ tangah sûm mûi pang hen a hawng ṭum.

¹⁰ Thilnung thla hen chak tak hen a zuang le, thli thla hen â sawk.

¹¹ Mûi hen amah chu â tuam le; sûm sah tak tî hen amah a kulh.

¹² A mâilei mi mîmthlalek thawk hen mei leh rial a hawng um le, sûm sah tak chu a lanh zar.

¹³ LALPA nih vân thawk hen hâu a suah le, Chungnungchem hâu chu theih hen a um.

¹⁴ A thal zum tla chu a hawng kah le, a mêlma tla chu anna rek phin; mîmthlalek hen a tektir phin na.

¹⁵ Tisumsumriat taw chu lâwng tlo hen a siah le, tual ram chu a lang têt LALPA na mêlma tla chu na simhfâi chun na thin hen râp na.

¹⁶ Vân thawk hen LALPA nih hawng ka vuanh le; hawng ka tleih le, tî thûknâk ah mi chu hawng ka nûk.

¹⁷ Ka mêlma chak tak leh thiltikho tak leh hawng ka huatu tla lakah mi chu ruang hawng ka suah.

¹⁸ Ka lawksawng liauah an ka do le, khawmsele LALPA nih a ka hum.

¹⁹ Ningṭihkâi lakah mi chu a ka ṭangpi le, a ka lawmh ruangah ruang a ka suah.

²⁰ Thil dik ka ti ruangah LALPA nih lâwmman a ka pêk; mawhnâk ka nei lo ruangah mal hawng ka sâwm.

²¹ LALPA dân chu ka zâwt le, ka Pathian chu ka hawitâk lo.

²² A dân zawzawng ka zâwt le, a thupêk chu ka êl lo.

²³ Sual ka nei lo mi leh sual lakah ka thliar mi chu a theih.

²⁴ Thildik ka ti ruangah leh sual ka nei lo mi a theih ruangah lâwmman hawng ka pêk.

²⁵ LALPA, mi zumhkâi sinah chun zumh na kâi le; mi ṭha rangtling sinah chun na ṭha rangtling.

²⁶ Â thenhlimh mi sinah chun na thenhlimh le, misual sinah chun na ṭhalo.

²⁷ Â nâutir mi tla chu ruang na suah le, anna zûm mi na nâutir.

²⁸ LALPA, nangnih chêu na ka pêk le, ka mûinâk chu na kiangtir.

²⁹ Ka mêlma tla do ding hen chaknâk na ka pêk le, anna vêngnâk neh ding hen thiltikhonâk na ka pêk.

³⁰ Hi Pathian hi a thilti lakah a rangtling a! A thu tla chu zumh a kâi a! Amah humnâk hâwltu zawzawng rangah chun phaw hâwi asi.

³¹ LALPA cho chu Pathian asi; Pathian cho chu hawng kan vêngtu asi.

³² Amah chu hawng ka chaktirtu leh ka lampi himnâk siamtu Pathian asi.

³³ Sazuk hâwi hen kê bir tak hawng ka siam piak le, tlâng tlûnah him tak hen a ka kil.

³⁴ Râltuk ding hen hawng ka sîntir le, chanhtiang khauh chem ka mang khonâk ding hen.

³⁵ LALPA, nangnih na ka hum hen ruang na ka suah le; na ka vêngnâk nih rokual tak hen a ka siam, chun na thiltikhonâk hen na ka hum.

³⁶ Tleih hen ka um khawm ah nangnih na ka hum le, ka tlû dahlo.

³⁷ Ka mêlma tla chu ka ṭhâwl le, ka tleih na. Ka neh na lânlo chu ka dîn lo.

³⁸ Tlû dep ka vuak na le, an thawk kho lo; Ka mâika ah neh hen an tlû.

³⁹ Râltuk ding hen chaknâk leh ka mêlma tla nehnâk na ka pêk.

⁴⁰ Ka sinah mi mêlma tla chu na zâmtir le; hawng ka huatu tla chu ka veih na.

⁴¹ Ṭangpitu an auh le, âukhawm nih an hum na lo; LALPA an auh le, sikhawmsele a sâng na lo.

⁴² Valeidip hâwi siding hen ka lamh dip na, chu chu thli nih a sêm phin. Khua lâi ah nêngthû hâwi hen ka chîl na.

⁴³ Mi hel tla lakah mi na ka hum le, phun tla tlûnah lâirêltu ah na ka siam. ka theih dah na lo mi tla chu tuah ka ti le khua tla an si.

⁴⁴ Ramdang mi tla ka mâika ah an kûn le; an ka theih rawh chun ka thu an ngâi.

⁴⁵ An râlṭhatnâk an thlâu le, thir bû hen an kulh thawk hen an hawng kal.

⁴⁶ LALPA chu a nung! Hawng ka vêngtu chu sawr u! Ruang hawng ka suahtu Pathian rokualnâk chu phuang u!

⁴⁷ Ka mêlma tla nehnâk a ka pêk le; ka tangah phun tla chu a siah na le,

⁴⁸ ka leido lakah mi ruang a ka suah. LALPA, ka mêlma tla nehnâk na ka pêk le, rawkmang lakah mi chu na ka hum.

⁴⁹ Churuangah phun tla nâwngah ka nan sawr le, na sinah sawrnâk la ka sak.

⁵⁰ Pathian nih a lal chu nehnâk rokual tak a pêk le; a thîm mi David leh a thlâk tla sinah a dâwtnâk dawnglo a langhtir kumza.