SAM 17 - Bawm Common Language Bible Version

Sualnâk Nei Lo Mi Thlachamnâk

¹ LALPA, diknâk kan ngiar mi hi hawng ka ngâi piak; ṭangpi ding hen kan ngiar mi hi hawng ka ngâi piak le, ka thlachamnâk zumhkâi hi ngâi.

² Thil dik theihtu na si ruangah, zumh ka kâi zia hâwi hen lâi na ka rêl piak lai.

³ Ka thinlung na theih le; zân ah na ka veh. Na hawng ka zauh ver le, ka lakah sual duhnâk ka nei lo zia na muh.

⁴ Midang tla hâwi hen thu ṭhalo ka sim lo; Na thupêk ka ngâi hen siatnâk lampi ah ka kal lo.

⁵ Na lampi ka zawh kumza le, ka pial dahlo.

⁶ Pathian, na ka sâng ruangah na sinah thla ka hawng cham. Kei leiah hawng a her le, ka thu tla ngâi rawh.

⁷ Na dâwtnâk chê tak chu hawng langh le, hawng kan hum; Na kiangah chun kan mêlma lakah mi kan him.

⁸ Na mit hen na duhzia hâwi hen hawng ka vêng le,

⁹ misual tla donâk lakah mi chu na thla dâidul ah hawng ka thuh. Thihnâk mêlma nih an ka kulh le;

¹⁰ pawi tinâk nei lo hen puar tak hen an hawlh.

¹¹ Tuah ka hernâk lei zawng ah an ka kulh le, thlûk ding bawh hen an ka ngâk ko.

¹² Chakeibaknei hâwi hen sâm ver ding duh hen an ka bawh ko.

¹³ LALPA, hawng le! Ka mêlma tla chu do hen neh na rawh! Na nâmsâu hen misual lakah mi ruang hawng ka suah;

¹⁴ hi bang zawzawng duhtu nungnâk lakah mi hi ruang hawng ka suah rawh. An rangah tuarnâk na khawng piak na mi hen rêp na; an fa le rangah tam tâwk rang ding hen leh an fa le tla fa nawlh rang khawm ah mâk piak na ding hen.

¹⁵ Thilsual ka ti lo ruangah kei lam nih chun kan muh lai, chun, ka meng tikah na ka umpinâk nih lâwm hen ka khat lai.