SAM 147 - Bawm Common Language Bible Version

Pathian Zeizawng Tikho Sawrnâk

¹ LALPA chu sawr u! Pathian sawr hen la sak hi a ṭha asi. Amah sawr chu a dik hen a nuam.

² LALPA nih Jerusalem chu a dirh nawlh le, saltâng tla chu a kîrtir nawlh na.

³ Thinlung fâk tla chu a damh na hen, an mâ tla a tuam piak na.

⁴ Ârfi tla chu an um zat ding a ruat le, pakhat khat hen an min a sak chiau na.

⁵ Kan LALPA chu a chak hen a rokual le, a finghnâk chu tah kho asi lo.

⁶ Â nâutir mi chu a chungnungtir le, sikhawmsele misual chu tual ah a nâutir na.

⁷ LALPA sawr hen la sak u; kan Pathian sinah ṭingṭang tum u.

⁸ Sûm tla chu chung vân leiah a zâr le, tual rangah ruah a ruat. Churawhchun, tlâng mi belh tla chu a ṭhangtir.

⁹ Ramsa tla rangah râwl a pêk na le, an kawh chun langâk fa tla a châwm na.

¹⁰ A lâwmnâk chu rang chak tla lakah asi lo, kawrsen râlṭha tla lak khawm ah â lâwm lo;

¹¹ sikhawmsele, amah zahtu tla leh a dâwtnâk dawnglo ngauhsantu tla chu a lawmh na.

¹² Jerusalem, LALPA chu sawr rawh! Zion, na Pathian chu sawr rawh!

¹³ Na kulh kawtkâ chu a chaktir le; na mi tla chu mal a sâwm na.

¹⁴ Na ramri chu him tak hen a nan vêng piak le, buh ṭha chem hen a nan khimtir.

¹⁵ Tual chu thu a pêk le, a sim mi chu a ti sawm vima.

¹⁶ Kâwngbawl hâwi hen vûr chu a phah le, vûr a tlâ mi chu vâleidip hâwi hen a nektir.

¹⁷ Rial chu lungteret hâwi hen a tlâ tir le, Daih a hawng tlungtir mi chu âukhawm nih an tuar kho lo.

¹⁸ Churawhchun, thu a hawng pêk le, vûr tlang tla chu an zawr; thli a hawng rângtir le, tî tla a luang.

¹⁹ A mi tla sinah thu a chah na le; Israel tla sinah dân a pêk mi leh a sîntir na mi chu.

²⁰ Phundang tla rangah hi hi a ti mi asi lo, annih tla nih chubang a dân tla khawm an theih loh. LALPA chu sawr u!