SAM 144 - Bawm Common Language Bible Version

Lal Nih Nehnâk Ruangah Pathian Sinah Lâwmthu A Simnâk

¹ LALPA, hawng ka humtu chu sawr u! Râltuk hawng ka sîntir hen râltuk ding hen hawng ka timhtuah.

² Amah chu hawng ka humtu leh vêngtu, ka dawrnâk leh ka ruangsuahtu asi, Him ding hen amah chu ka zumh. Phun tla chu ka tangah a siah na.

³ LALPA, minung hi zei me asi, na sunhsak; mi salam, a thu na ngâi piak mi chu?

⁴ Minung chu thaw hâwi cho asi, a san chu dâidul â ṭhial vima mi hâwi asi.

⁵ LALPA, vân khi thlêk le, hawng ṭum, tlâng sâng tla tawngh le, meikhû an suah lai.

⁶ Mîmthlalek hawng fial le, na mêlma tla rektir ver na, Na thalzum tla kah le, tektir na.

⁷ Tlûnlei thawk hen hawng vuanh le, tî thûk takah mi chu hawng ka suah le, hawng ka hum.

⁸ Ramdang minung thudik sim dah lotu leh âwkrâwl hen siatsirhtu thiltikhonâk lakah mi hawng ka hum.

⁹ Pathian, nangmah suangkhâng hen la thar ka sak lai; ka ṭingṭang ka tum lai le, na sinah la ka hawng sak lai.

¹⁰ Lal tla chu nehnâk na pêk na le, na to-aw David chu na hum.

¹¹ Ka mêlma sual tak tla lakah mi hawng ka hum le, ramdang mi thudik sim dah lotu leh âwkrâwl hen siatsirhtu thiltikhonâk lakah mi hawng ka hum rawh.

¹² Kan fapa tla chu thing a ṭhang mi hâwi hen um na seh. Kan fanu tla chu lungphun sâng tak lal umnâk mun thuamh mi hâwi si na seh.

¹³ Kan fângbâwk chu thlâi chi kip hen khat seh. Kan phâisen ah dawrâ tla nih a sîng lû hen ring na seh.

¹⁴ Kan ran tla chu a tlâu leh a vei mi um lo hen cherkhet hen pung seh. Kan zâwllâi ah hamh ruangah ṭapnâk rêng um lah seh.

¹⁵ Hi hi a dik asi titu phun chu a thaw a suak. LALPA a Pathian ah neitu chu a thaw a suak!