SAM 143 - Bawm Common Language Bible Version

Ṭangpi Ding Hen Ngiarnâk

¹ LALPA ka thlachamnâk hi ngâi rawh. Na repnâk hen ka nan deih mi hi hawng ka ngâi le; na zumhkâinâk hen hawng ka sâng rawh!

² Na to-aw hi hawng ka nik lah le; na mitmuh ah âukhawm sual nei lo an um lo.

³ Ka mêlma tla nih an ka neh thlo rawh. Mûi rêngin ah a ka khumh le, a thi ving rawh mi hen ka bang cho.

⁴ Churuangah ka kawng a dawng le; lungdawngnâk fâk tak ka nei.

⁵ Ni a len rawh mi tla ka theih le, thil na ti mi tla chu ka dawn le, na thilti zawng tla chu ka thinlung ah ka siah.

⁶ Thlacham hen nangmah leiah ka bân ka hawng phar, tual a châr mi hâwi hen ka thlarau na lakah a tîhâl.

⁷ LALPA, tuah hawng ka sâng! Ka lung a dawng. Ka lakah mi a thup lah, chu hâwi asi lo chun, laikulh mithi le tla sinah kal mi hâwi kasi lai.

⁸ Zîng siar hen na dâwtnâk dawnglo hen hawng ka theih tâwn le, nangmah zumhtu kasi ruangah. Na sinah ka thlachamnâk chu a hawng tleng; ka kalnâk ding lampi hawng ka muhtir.

⁹ LALPA, hum ding duh hen na sinah ka hawng, ka mêlma lakah mi hawng ka hum.

¹⁰ Nang chu ka Pathian na si, na duhzia hawng ka sîntir rawh. Ka lakah ṭhat suah le, himnâk lampi ah hawng ka rui.

¹¹ LALPA, na thutiam hâwi hen ruang hawng ka suah le; na ṭhatnâk hen ka lawksawngnâk lakah mi hawng ka hum!

¹² Ka rangah dâwtnâk na nei ruangah, ka mêlma tla chu thah na le, na to-aw kasi ruangah hawng ka nehsawhtu zawng chu veih na.