SAM 141 - Bawm Common Language Bible Version

Zânlei Thlachamnâk

¹ LALPA, tuhin hawng ka ṭangpi! Ka nan auh asi! Ka nan auh liau hin hawng ka ngâi rawh.

² Ka thlachamnâk hi rimthâw hâwi hen hawng ka pawm piak le, ka kut phar tla hi zânlei bâwlnâk hâwi hen.

³ LALPA, ka kâ ah hin vêngtu siah le, ka mûr kawtkâ ah hin ngâktu siah rawh.

⁴ Thilsual ti duh lo ding hen hawng ka kil le, misual tla leiah ka ṭângṭawm lonâk ding hen. An puai lakah khawm ka tel lonâk ding hen.

⁵ Mi ṭha nih hawng ka rêp sele, vêlnei tak hen nun hawng ka simh seh, misual tla chawnglawmhnâk lam chu ka pawm dah lai loh, an thilsual ti duh lo hen thla ka cham kumza ruangah.

⁶ An lâirêltu tla chu lungpi kak ah lawnh an si tikah, mi nih ka thu tla chu dik an ti lai.

⁷ Mi nih thing a phel le, a nek dip hâwi hen an ruh tla chu thlân pângah thektham ver asi lai.

⁸ Sikhawmsele, LALPA ka Pathian, nang chu ka nan zumh thlir. Nangmah nih hawng ka hum ding ka duh; hawng ka thihtir lah rawh!

⁹ Thilsual titu tla nih ka rangah thang an tunh mi leh tângnâk an siam mi lakah hawng ka hum.

¹⁰ Him ziar hen ka kal liauah misual tla chu anmah thang ngelchel nih awh na seh.