SAM 140 - Bawm Common Language Bible Version

Hum Ding Hen Thlachamnâk

¹ LALPA, misual tla siat leh râwktu tla lakah mi hawng ka hum rawh.

² Thilsual karo an dawn le, êlnâk karo an tuah.

³ An lei chu rûl a thi mi hâwi an si. An thu chu sawkmuk tûr hâwi asi.

⁴ LALPA misual thiltikhonâk ah mi chu hawng ka hum, râwktu tla nih ka tlûknâk ding karo dawntu tla lakah mi hawng ka hum.

⁵ Mi zûm tla nih ka rangah thang an tunh le; awhnâk an siah le, hawng ka tleih ding hen lampi ah thang an tunh vima.

⁶ LALPA sinah chun, “Nang chu ka Pathian na si, ṭangpi deih hen ka âu mi hi ngâi rawh LALPA!” ka ti.

⁷ LALPA ka Pathian, hawng ka vêngtu Chak, râltuknâk ah nangnih na hawng ka hum.

⁸ LALPA misual tla nih an duh mi chu pêk lah na, an thiltum khawm tawngtir lah na.

⁹ Ka mêlma tla chu nehtu ah siam lah na, an hawng ka ṭhihnâk chu anmah tlûnah tlâ hen siam na.

¹⁰ An tlûnah meiṭil tlâ seh, khur lakah suak lo pawt ding hen tlâ na seh.

¹¹ Midang tla diklo tak hen phiartu tla chu lawhtling lo hen um na seh; sualnâk nih neh hen veih na seh.

¹² LALPA mipâm le mi dik ṭangpi herh tla chu na hum na ti ka theih.

¹³ Mi rep nih chun a nan sawr ngelchel lai le, na mâika ah an um lai.