SAM 14 - Bawm Common Language Bible Version

Minung Tla Sualnâk Chu

¹ Mi â tla nih “Pathian a um lo,” an ti. Anna râwk hep le, thil ṭihnungkâi an ti le, thil dik titu an um lo.

² LALPA nih chun, vân thawk hen minung tla amah sawnhtu leh mifing an um rêng mawh ti hen a zauh na.

³ Sikhawmsele, amahlo leiah an pial hep le, an ṭhatlonâk â bang hep le; pakhat khawm thil dik ti an um lo, Pakhattê khawm an um lo.

⁴ “Thilsual titu tla nih an theih lo masi? Ka mi tla chu an rawk le; Ka sin khawm thla an cham lo,” LALPA nih a ti.

⁵ Sikhawmsele, Pathian chu ê-aw ngâitu sinah a um ruangah annih tla chu lâu hen an um lai.

⁶ Thilsual titu tla nih chun mi nâu thiltum chu an nihsanh, sikhawmsele LALPA chu anmah humtu asi.

⁷ Zion thawk hen Israel tla nih nehnâk anna ting ding mi ruangah thla ka cham. Israel mi zapi rangah LALPA nih an sul-le-lam a tluangtir nawlh ding tikah chun an lâwp a tlo awt chiam a!