SAM 122 - Bawm Common Language Bible Version

Jerusalem Chawnglawmhnâk

¹ “LALPA in ah kan kal lai,” an ti liauah thungâi ka lâwm.

² Tuah hinah, Jerusalem kulh kawtkâ sungah kan dîr!

³ Jerusalem chu dawh tak leh nuam tak hen tharh mi khuapi asi.

⁴ Hi hi Israel phun tla LALPA sinah a thupêk hâwi hen lâwmthu sim ding hen an hawng kalnâk mun chu asi.

⁵ Hinah hin Israel lal tla an mi le tla chu lâirêl ding hen an to.

⁶ Jerusalem rangah remnâk um ding hen thlacham le: “Nangmah duhtu tla chu an sul-le-lam tluang kho ding hen.

⁷ Na kulh sungah chun thlangamnâk um kho ding hen leh na mun tla chu him ding hen.”

⁸ Ka unau leh ka hâwi tla ruangah Jerusalem sinah chun, “Na lakah thlangamnâk um seh!” ka ti.

⁹ LALPA, kan Pathian in ruangah na sul-le-lam tluang ding hen thla ka cham.