SAM 12 - Bawm Common Language Bible Version

Ṭangpi Ding Hen Thlachamnâk

¹ LALPA! hawng ka ṭangpi! Mi ṭha rerêng an um lo, mi dik rêng tawng kho asi lo.

² Mi zawzawng âwkrâwl anna simh tawnh le, sawr telenâk hen anna perpet.

³ LALPA! sawr telenâk kâ chu bângtir le, khâwngnâk kâ tla chu phih piak na.

⁴ “Kan thu hen kan duh mi chu kan tawng. Kan duh mi zawng kan sim, âukhawm nih hawng kan khap kho lo.”

⁵ Sikhawmsele LALPA nih chun, “Ṭangpi ngâi tla nehsawh an si mi leh nehsawh si mi tla nganfâk tuar hen an rûm mi ruangah tuah ka hawng lai le, an duhzia hen himnâk ka pêk na lai,” a ti.

⁶ LALPA thutiam chu zumh a kâi asi; tangkasa mei lakah vei sarih êr mi hâwi hen a tliang asi.

^7-8 LALPA, misual chu munkip ah an um le; mikip nih sualnâk lei an duh zia, him tak hen hawng kan hum kumza, chu hâwi minung lakah chun hawng kan vêng.