SAM 112 - Bawm Common Language Bible Version

Mi Ṭha Lâwptlonâk

¹ LALPA chu sawr u! Mi, LALPA zahtu leh, a thupêk zûl nuam titu tla chu an thaw a suak.

² Ram lakah chun mi ṭha fa tla chu thiltikho tak an si lai; a thlâk tla chu malsâwm hen an um lai.

³ A dâwngsung tla chu neih-le-siah hen an um lai, zeiliau zawng ah sul-le-lam tluang hen a um lai.

⁴ Mi ṭha tla rangah chêu chu mûi a cherhtir, khuaruat mi, vêlnei leh mi dik rangah.

⁵ Tamtak a pûktirtu leh dik tak a ṭuantu chu a thawsuak.

⁶ Mi ṭha chu zeiliau khawm ah a palh lai lo, theihkumza hen a um lai.

⁷ Thâwngthâng ṭhalo a theih khawm ah a ningṭih lo; a lungnâk chu a bir le, LALPA a rinhsanh.

⁸ A dî hen a ningṭih lo; a mêlma tla neh hen an um ding mi chu a theih ko.

⁹ Mi samphâng sinah tam tak a pêk na le, a vêlneihnâk chu a palh dahlo, thiltikho tak leh zahkâi tak hen a um lai.

¹⁰ Misual tla nih hi hi an muh chun a rothawk; an rothawk dadauh le, an vei thlo; an lungumnâk chu a tlâu pawt.