SAM 11 - Bawm Common Language Bible Version

LALPA Lakah Ngauhnâk

¹ Himnâk ding hen LALPA chu ka zumh. Misual tla nih mûi ah um mi, mi ṭha tla chu kah ding hen an chanhtiang leh thal zum hen an zâwn na ruangah,

² Tlâng sâng takah va hâwi hen zuang ving, ka sinah na ti mi chu ât a kâi chiam e.

³ Thil zawzawng â râwk rawh chun, mi ṭha nih zeikhawm a ti kho mi a um lo.

⁴ LALPA chu a Biakin thenhlimh ah a um le, a laltophah chu vânah a um. Munkip ah mi a vêng na le, an thilti tla a theih hep.

⁵ Misual leh miṭha chu a nik vevê na le, dân nei lo mi chu a thinlung zawzawng hen a hua na.

⁶ Misual tlûnah mei leh kâtalh a hawng thlâk le, thli rumro hen a rêp na.

⁷ LALPA chu â rep le, thil ṭha ti a lawmh; chu hâwi titu chu a sinah an um lai.