SAM 108 - Bawm Common Language Bible Version

Mêlma Donâk Ding Hen Ṭangpinâk Deihnâk

¹ Pathian, zumhnâk rangtling ka nei! La sak hen ka nan sawr lai! Ka thlarau, meng rawh!

² Ka ṭingṭang leh perhkhuang tla a ṭhangh u! Nî ka ṭhangh lai.

³ LALPA, phun tla nâwngah lâwmthu ka nan simh lai. Mi zapi nâwngah ka nan sawr lai.

⁴ Na dâwtnâk dawnglo nih vân a phanh le; na zumhkâinâk nih vân a tawngh.

⁵ Pathian, na rokualnâk chu vân ah khin langhtir, na rokualnâk zawzawng tual tlûnah langhtir.

⁶ Na chaknâk hen hawng ka hum le, ka thlachamnâk hawng ka sâng. Churawhchun, ruang na suah mi tla chu hum hen an um lai.

⁷ A mun thenhlimh thawk hen Pathian nih thu a sim. “Nehnâk ah ka mi le tla sinah Sekem leh Sukot Kuam chu ka ṭhen lai.

⁸ Gilead chu ka tâ asi, Manaseh khawm, Efraim chu ka lukhuh asi, Juda chu ka lal ṭhianṭhunh asi.

⁹ Sikhawmsele, Moab ram chu ka ṭâwlnâk khêng ah ka mang lai, Edom ram ah ka pheikawk ka lawnh lai, ka tâ ti theihnâk ding ah. Philistia tlûnah neh hen ka âu lai,” ti hen.

¹⁰ Pathian, â kulh mi khuapi ah âunih hawng ka siah lai? Edom ah âunih hawng ka kalpi lai?

¹¹ Na kan duh lo tatak rawh na maw? Kan kawrsen tla sinah na tel bâk awtlo rawh na maw?

¹² Mêlma donâk ah hawng kan ṭangpi le, minung ṭangpinâk chu zei kawngkâ khawm asi lo.

¹³ Kan kiangah Pathian um bû hen kan neh lai le, amah nih kan mêlma tla hawng kan neh piak lai.