SAM 107 - Bawm Common Language Bible Version

BU NGANâK (Sam 107—150) Pathian Ṭhatzia Sawrnâk

¹ “LALPA chu a ṭhatnâk ruangah leh a dâwtnâk zungzâl tiang asi ruangah a sinah lâwmthu sim u!”

² LALPA sinah lâwmthu sim hen, nannih amah hum mi tla, hi thu hi nawlh u. Nan mêlma lakah mi a nan hum na le,

³ ramdang thawk hen saklei mi leh thlanglei mi, marlei mi leh simlei mi a nan kîrtir nawlh na.

⁴ Lampi umlonâk ramkaro ah mi zeimaw mi an vâi le, um ding hen khuapi lei kalnâk an tawng kho lo.

⁵ An sungvâng hen an tî a hâl le, an lung a dawng hep.

⁶ An lungdawng tikah LALPA chu an auh le, anna hamhnâk lakah mi chu ruang a suah na.

⁷ An umnâk ding khuapi leiah lampi ding lakah a kalpi na.

⁸ LALPA chu, a dâwtnâk dawnglo ruangah leh an rangah thilchê tla a ti mi ruangah lâwmthu an simh ding asi.

⁹ Tîhâl tla rangah an tîhâl a riam tir na le, sungvâng tla rang ah thil ṭha hen a khimtir na.

¹⁰ A zeimaw mi chu thinlung zuai leh mûi lakah an um, chikchîn khih hen rêngin ah an tuar,

¹¹ Zeizawng tikho Pathian thupêk an ngâilo ruangah leh a sîntirnâk chu an duh lo ruangah.

¹² An rianṭuan ruangah an zuai hep; an tlû dep le, âukhawm ṭangpitu an um lo.

¹³ An lawksawng ruangah LALPA chu an auh le, anna hamhnâk lakah mi chu ruang a suah na.

¹⁴ Mûi lakah zuai dep hen an um mi chu a suah na le, an chikchîn tla chu a khiak piak dip na.

¹⁵ A dâwtnâk dawnglo ruangah leh an rangah thilchê a ti piak na mi ruangah LALPA sinah lâwmthu an sim ding asi.

¹⁶ Dâr inkhâr tla chu a râwk le, thîr inkhâr renhnâk tla chu a khiak.

¹⁷ A zeimaw mi tla chu an â le, an sual ruangah leh an thilti diklo ruangah an tuar.

¹⁸ Buh khawm an lam kho lo le, thihnâk naih hen an um.

¹⁹ An lawksawng ruangah LALPA chu an auh le, anna hamhnâk ah mi chu ruang a suah na.

²⁰ A thupêk hen a damh na le, thlân lakah mi chu ruang a suah na.

²¹ A dâwtnâk dawnglo ruangah leh an rangah thilchê a ti ruangah LALPA sinah lâwmthu an sim ding asi.

²² A sinah bâwlnâk leh lâwmnâk la sak hen leh a thilti zawzawng ruangah a sinah lâwmthu an sim ding asi.

²³ A zeimaw mi chu tisumsumriat ah meilawng hen an kal le, tipi tlûnah an nungnâk ding hen ei ding an lawh.

²⁴ LALPA nih tipi tlûnah thilchê a ti kho zia tla chu an muh.

²⁵ Thli chak tak chu râng ding hen thu a pêk le, tî a tlingtlawktir.

²⁶ Meilawng tla chu tlûnlei ving ah a lawh le, tipi tawdeng ah a thlâk. Chu ṭihnungkâi ruangah chun mi tla nih an râlṭhatnâk an thlâu hep.

²⁷ Zurî hâwi hen an tlû le, khatlei khatlei ah an hâwr, an krai tla chu zeikhawm asi lo rawh.

²⁸ An lawksawng ruangah LALPA an auh le, anna hamhnâk ah mi chu ruang a suah na.

²⁹ Thlipi a râng mi tla chu a bângtir, tî tlingtlawk tla chu a rehtir.

³⁰ A reh mi ruangah chun anna lâwm le, lawng dinhnâk an duhnâk mun takah him hen a siah na.

³¹ A dâwtnâk dawnglo leh an rangah thilchê tla a ti piak na mi ruangah LALPA chu lâwmthu an simh ding asi.

³² Zapi pumhnâk ah a rokual zia chu an phuang ding asi. Ruitu murui lâirêlnâk mâika ah amah chu an sawr ding asi.

³³ LALPA nih tiva tla a chârtir le, tî a luang mi chu a dîntir.

³⁴ Chunah um mi tla sualnâk ruangah ramkaro ah mi tual chu a altir.

³⁵ Ramkaro chu tili ah a changtir le, tual chârnâk ah tî nung a luangtir.

³⁶ Chunah chun sungvâng tla chu a umtir na le, umnâk ding hen khuapi an siam.

³⁷ Phâisen ah thlâi chî an tuh le, grep tla an phun, tam tak an ât.

³⁸ A mi tla chu mal a sâwm na le, fa tam tak an nei, an ranrual a vei ding mi chu a hum piak na.

³⁹ Pathian mi tla chu neh hen an um liau chun Nâunehnâk leh tuarnâk fâk tak hen thinlung nâutirnâk a pêk na.

⁴⁰ Anmah nehsawhtu nih an zauhnawmh na mi a muhtir na le, lam umlo mi ramkaro ah a vâitir na.

⁴¹ Sikhawmsele ṭangpi herh tla chu anna hamhnâk lakah mi ruang a suah na le, Ranrual hâwi hen an dâwngsung a puatir.

⁴² Mirep tla nih hi hi an muh le, anna lâwm, misual tla lam chu an dâisip.

⁴³ Mi fing tla nih chun hi bang thil tla hi dawn na seh; LALPA dâwtnâk chu theihtir nawlh na seh.