SAM 106 - Bawm Common Language Bible Version

LALPA Chu A Mi Sinah A Ṭhat Zia

¹ LALPA chu sawr u! LALPA chu a ṭha ruangah a sinah lâwmthu sim ule, a dâwtnâk chu zungzâl asi.

² Thil rokual a ti mi zawng tla âunih a sim kho lai? Âunih a sawr tâwk kho lai?

³ Thil dik a ti kumza mi thupêk zûltu tla chu an thaw a suak.

⁴ LALPA, na mi le tla na ṭangpi tikah hawng ka theihkumza. Ruang na suah na tikah hawng ka telhsih bâk.

⁵ Na mi tla vânṭhatnâk chu hawng ka muhtir le, Na phun tla lâwmnâk ah chun na tâ an si ruangah chu lâwmnâk chu hawng ka tingtir bâk.

⁶ Hawng kan thlâktu tla hâwi hen kan sual bâk le; kan ṭhalo hen kan sual.

⁷ Aigupta ah hawng kan thlâktu tla nih Pathian thilchê ti chu an theihthiam lo le; vei tam tak a dâwtnâk a muhtir na mi chu an philh le, Zeizawng tikhotu Pathian tlûnah Tipi Sen ah chun an hel.

⁸ A thilti rokual muhtir na ding hen a thutiam hâwi hen ruang a suah na.

⁹ Tipi Sen chu thu a pêk le, a kang hep; a mi tla chu tual hul lakah a tan tir na.

¹⁰ Anmah huatu lakah mi chu ruang a suah na le; An mêlma lakah mi chu a hum na.

¹¹ Sikhawmsele, an mêlma tla chu tî nih a nîm na le; pakhat khawm an him lo.

¹² Chun, a mi le tla nih a thupêk chu an lung le, amah sawr hen la an sak.

¹³ Sikhawmsele, zeikarlo ah a thilti chu an philh ving le; a thupêk ngâk lo hen thil an ti.

¹⁴ Ramkaro ah chun duhnâk hen an khat le, Pathian an nik.

¹⁵ Churawhchun, an deih mi chu a pêk na le, sikhawmsele râi ṭihnungkâi khawm an sinah a fial.

¹⁶ Chu ramkaro ah chun LALPA to-aw thenhlimh Mosi leh Aron chu an nahsuah na.

¹⁷ Tual â sêu le, Dathan chu a dawlh; Abiram leh a dâwngsung tla khawm an vûi na.

¹⁸ An murui tla lakah mei a hawng tlâ le, chu misual tla chu a khangh hep na.

¹⁹ Sinai tlâng ah ngûn chawchal lem an siam le, ruk chu an sawnh;

²⁰ Pathian rokualnâk chu belh eitu ramsa hen an thleng.

²¹ Aigupta ram ah a thiltikhonâk hen ruangsuahtu Pathian chu an philh rawh.

²² Chunah chun thilchê tak tla a ti! Tipi Sen ah a thilti khawm thungâi a chê!

²³ Pathian nih a mi le tla veih hep ding thu a sim liauah a to-aw thîm, Mosi chu a dîr le, Pathian rangah a êl. Pathian thinthawknâk lakah mi chu veih lo ding hen a vêng na.

²⁴ Pathian thupêk chu an lunglo ruangah ram nuam chu an duh lo rawh.

²⁵ An puanin ah um hen an chipchiar le, LALPA thu an ngâi duh lo.

^26-27 Churawhchun, ramkaro ah an thi ding mi leh an thlâk tla lunglo nâwngah anna rek ding mi tla ramdang ah an thi ding mi tla ningṭih phaih hen a simh na.

²⁸ Peor ah Pathian mi tla chu Baal sawnhnâk ah anna tel le, nungnâk nei lo an pathian tla sinah bâwlnâk sa tla an ei.

²⁹ An thilti nih Pathian thin a thawktir le, an lakah râi ṭihnungkâi a lêng.

³⁰ Churawhchun, Phinehas a dîr le, misual chu a rêp le, râi chu a reh rawh.

³¹ Chu chu tik a hawng tlung ding mi zawzawng lakah a sunhsaknâk theihkumzanâk asi.

³² Mi zapi tla nih LALPA chu Meribah tiva ah a thin an thawktir le, chu thu ah chun Mosi chu a lawk a sawng.

³³ Chu hâwi tluk hen a thin an thawktir ruangah a dântê hen thu a sim lo.

³⁴ Lunglotu tla chu Pathian nih thah ding hen thu a pêk mi hâwi hen an thah lo,

³⁵ sikhawmsele, anna umh tawnh le, lunglo dân hen an um.

³⁶ Pathian mi tla nih milem an sawnh, chu nih chun anmah râwknâk a tlungtir.

³⁷ Kanaan ram ah milem lakah anna bâwl mi hâwi hen, an fanu leh an fapa tla an pêk.

³⁸ Ngâksia sual nei lo chu an thah na le, chu thahtu tla hen an ram chu an nawmh.

³⁹ An thilti hen anmah anna nâwmtir le, Pathian lakah zumhkâilo hen an um.

⁴⁰ Churawhchun, LALPA chu a mi le tla lakah a thinthawk le; a fih na rawh.

⁴¹ Lunglo tla nehsawh ding hen a kaltâk na le, an mêlma tla nih an lakah lâi an rêl rawh.

⁴² An mêlma tla nih an nâuneh na le, anmah thu thu hen an siah na rawh.

⁴³ Vei tam tak LALPA nih a mi tla chu a hum na le, sikhawmsele, a lakah hel an duh dauh ruangah sual lakah thûk dadauh hen an lût.

⁴⁴ Sikhawmsele, LALPA nih an âu mi a theih chun a ngâi piak na le, anna hamhnâk chu a theih piak na.

⁴⁵ Anmah ruangah a thudântuk chu a theihkumza le, a dâwtnâk rokual ruangah siherhnâk a nei.

⁴⁶ Anmah nehsawhtu tla chu a zângfahtir na.

⁴⁷ LALPA kan Pathian, hawng kan hum le, phun tla thawk hen hawng kan kîrtir nawlh rawh, churawhchun kanna lâwm lai le, na min thenhlimh kan sawr lai.

⁴⁸ LALPA, Israel Pathian chu sawr u; tuah leh zeiliau zawng ah sawr u! Mikip nih, “Amen! ” ti na seh. LALPA chu sawr u!