SAM 105 - Bawm Common Language Bible Version

Pathian Leh A Mi Tla

¹ LALPA sinah lâwmthu sim ule, a rokualnâk phuang u; a thilti chu phun tla simh na u.

² LALPA sawr hen la sak ule, thilchê a ti mi tla chu sim u.

³ Amah tâ kan si ruangah a lâwm u; amah sawnhtu tla zawzawng a lâwm na seh.

⁴ An ṭangpi ding hen LALPA sinah kal le, amah chu sawnh vima.

^5-6 Nannih a to-aw, Abraham thlâk tla; A thîm mi Jakob thlâk tla: thilchê a timhtuah mi leh lâirêlnâk a pêk mi chu theihkumza u.

⁷ LALPA chu kan Pathian asi; a thupêk chu laikulh zawzawng rangah asi.

⁸ A thudântuk chu zungzâl hen a kil lai, a thutiam chu thlâk sângkhat tiang hen.

⁹ Abraham sinah a thutiam chu a kil kumza lai, Isak sinah a thutiam khawm.

¹⁰ Jakob sinah thudân LALPA nih a tuk le, kumleza hen um ding mi pakhat chu.

¹¹ “Kanaan ram chu ka nan pêk lai,” a ti. “Nangmah tâ bîk asi lai,” a ti.

¹² Pathian mi tla chu an tâwm ual, Kanaan ram ah chun khual an si.

¹³ Umnâk vâi hen ram khat thawk hen ram dang, lalram thawk hen lalram dangah an kal.

¹⁴ Sikhawmsele anmah nehsawh ding hen Pathian nih pakhat khawm a siang na lo; anmah hum ding hen lal tla chu ningṭih a phaih na.

¹⁵ “Ka to-aw thîm tla chu nganfâk pêk lah u; ka khuavâng tla tawngh lah u,” ti hen.

¹⁶ LALPA nih an ram ah pâm a tlungtir le, an buh tla a lâk piak hep na.

¹⁷ Sikhawmsele, an lû ding hen Josef sal ah an zuar mi kha a fial.

¹⁸ A kê chu thîr chikchîn hen an khih le, a ngâwng ah thîr hen an khimh,

¹⁹ simkanh mi a dik ti a tlung lânlo chu. LALPA thu nih a diktir.

²⁰ Aigupta lal nih amah chu a suah rawh; phun tla lâirêltu chu a thlah rawh.

²¹ A lâirêlnâk ah thuneitu sinâk a pêk le, Ram sung zawzawngah lâirêltu ah a siam,

²² a lalnâk thiltikhonâk hen leh thuneihnâk hen krai pêktu tla chu sîntir ding hen.

²³ Jakob chu Aigupta ram ah a kal le, chunah chun a va um rawh.

²⁴ LALPA nih a mi tla chu tê leh fa tam tak a pêk na le, an mêlma tla ngâk hen chak dauh hen a siam na.

²⁵ A mi tla chu Aigupta mi a huatir na le, a to-aw tla chu zauhnawmh hen a nehsawhtir na.

²⁶ Churawhchun, a to-aw Mosi leh Aron a thîm na mi chu a fial na.

²⁷ Pathian thiltikhonâk an va ti le, Aigupta ah chun thilchê tla an ti.

²⁸ Pathian nih ram lakah mûi a tlungtir le, sikhawmsele Aigupta mi nih a thupêk an zûl lo.

²⁹ An tiva tla chu thisen ah a changtir le, an ngâ zawzawng a thi hep.

³⁰ An ram chu chu-uh a tlungtir le, lal in tiang an khat hep.

³¹ Pathian nih thovâi leh rik tla thu a pêk le, ram pumpi a khat phak.

³² Ruah sûrtir lo hen ṭêk leh rial a tlâktir.

³³ Grep zûn leh theipi kûng tla a râwk le, thing zawzawng a khiak hep.

³⁴ Khâubawk tla thu a pêk le, rêl châwklo an hawng tlung.

³⁵ Ram lakah thlâi phun leh chîng mi zawzawng an ei hep.

³⁶ Aigupta ram ah dâwngsungkhur lakah fapa upachem a thah ver na.

³⁷ Chun Israel tla chu a suaktir na le, tangka leh ngûn tla an kalpi, ṭhisel leh chak tak hen an um.

³⁸ Aigupta mi tla nih an ṭih na, an kaltâk na mi chu thungâi anna lâwm.

³⁹ Pathian nih a mi le tla tlûnah sûm a umtir le, anmah cherhtu rangah zân ah mei a pêk na.

⁴⁰ An deih le, mîmte tla a pêk na; anmah tla khimtir ding hen vân thawk hen buh a pêk na.

⁴¹ Lungpi chu â awng le, tî a hawng suak. ramkaro mun ah tiva hâwi hen a luang.

⁴² A to-aw Abraham sinah a thuthup tiamh chu a theihkumza.

⁴³ Churawhchun, a thîm mi minung tla chu a suakpi na le, La an sak le, lâwm hen an âu.

⁴⁴ Midang tla ram chu a pêk le, an phâisen tla chu a lâktir na.

⁴⁵ Churawhchun, a mi le tla nih a dân thu tla chu an zûl hen a thupêk tla an zûl khonâk ding hen. LALPA chu sawr u!