SAM 101 - Bawm Common Language Bible Version

Lalchem Thutiam

¹ Ka la chu lâirêlnak dik leh zumhkainâk asi, LALPA, na sinah ka hawng sak asi.

² Ka umdân chu sual tel lo asi. Zei tikah ka sinah na hawng awt? Nunchan thenhlimh tak hen ka in ah ka um lai le,

³ sualnâk rêng ka tuar lai lo. Pathian thawk hen a pial mi minung tla thilti tla chu ka hua; annih hen zeikhawm kawpkaihnâk ka nei awtlo.

⁴ Zumhkâilo hen ka um awtlo, sual rerêng ka ti awtlo.

⁵ Mi âu hen mawh sual leikâng thuthup ruattu tla sinah chun ka tel awtlo. Â zûm mi leh zauhnawmh mang chu ka sâithiam lo.

⁶ Pathian lakah mi zumhkâi tla chu ka bawp na lai le, ka lal in ah ka umtir na lai. Zumhkâi tak hen um mi tla chu ka rianṭuantu ah ka mang na lai.

⁷ Mi âwkrâwl thusim tla chu ka lal in ah an um lai lo le, mi perpê tla khawm ka mâika ah an um lai lo.

⁸ A ni ni hen kan ram ah misual tla chu ka veih na lai le; LALPA khuapi lakah mi misual tla chu ka kiangtir phin na lai.