SAM 10 - Bawm Common Language Bible Version

Diknâk Ding Hen Thlachamnâk

¹ LALPA, zei rangah lât takah na um? Zei rangah kan lawksawng liauah na thup?

² Misual tla chu anna zûm hen mipâm tla an nehsawh le, an thang tunh lakah awhtir na.

³ Misual nih a duhnâk sual â putso; mi hamkah nih LALPA chu siat a barh le, a nawng.

⁴ Misual nih chun LALPA chu a sunhsak lo; a putsonâk thinlung hen Pathian chu zeikhawm silo hen a ruat.

⁵ Misual chu thil zeizawng ah a dingchang. Pathian lâirêl a theihthiam kho lo; a mêlma tla a nihsanh.

⁶ A thinlung hen, “Ka palh dah lai lo le, ka lawk khawm a sawng dah lai loh” a ti.

⁷ A kâ chu siatbarhnâk tla, âwkrâwl tla, thihnâk tla hen a khat; Thusual leh huatnâk sim a mawhlah.

⁸ Khua ah â thup le, chunah chun sual nei lo tla thah ding hen a bawh na le, ṭangpitu nei lo a rêl mi chu a thlingthlâk le,

⁹ chakeibaknei hâwi hen â thupnâk mun ah a bawh na. Ngâkṭah tla rangah a bawh na le, a thang hen a awh na le, a nûk ving na.

¹⁰ Ṭangpitu nei lo an tlû mi chu, tharum hen a neh na.

¹¹ Misual nih a thinlung hen, “Pathian nih a sunhsak lai lo! a mit a sîm le, hawng ka muh lai loh,” a ti.

¹² LALPA, misual tla chu rêp na, a tuar mi tla chu theihkumza na!

¹³ Misual nih a thinlung hen Pathian chu zauhnawmh hen hawng ka rêp lai lo zeitin a ti kho zia?

¹⁴ Mi ngaihsia leh tuartu tla chu na muh hen na theih le, ṭangpi ding na tîm kumza, mi ṭangpi herh tla chu na sinah anna pêk le; na ṭangpi kumza na.

¹⁵ Mi ṭhalo leh misual tla chu an thiltikhonâk veih piak na le; an thilsual ti ruangah an rim lânlo chu rêp na.

¹⁶ LALPA chu zungzâl lalchem asi. A ram ah mi Pathian dang tla sawnhtu chu a veih hep na lai.

¹⁷ LALPA, mi nau tla thlachamnâk chu na ngâi piak lai le; râlṭhatnâk na pêk lai.

¹⁸ Ngâkṭah leh nehsawh hen um mi tla ṭapnâk chu na ngâi lai le, siherh hen lâi na rêl piak na lai, thikho mi nih ṭihnâk an tawng lai lo rawh.