RUTH 3 - Bawm Common Language Bible Version

Ruth Nih Pasal A Tawngnâk

¹ Chu nûnah chun Naomi nih Ruth sinah, “Pasal ka nan hâwl piak lai, chu tikah mah in-le-lo na nei bâk lai.

² Nunau tla hen na ṭuannâk dâwngpu kha Boaz keimah taksa tlâi asi ti theih. Ngâinik, tuzân leiah hin fâng a khâwng awt.

³ Churuangah tak a khawlh le, sariak rimthâw a thuh le, na nipuan ṭha chem hen a thuam le, a fâng khâwngnâk ah va kal le, a ei a bâr a lîm lânlo chu a theihtir lah.

⁴ A itnâk mun kha singsiah set le, a it thlit rawh chun a puan lîm le, a kê kiangah va it bâk, ti ding mi a nan simh ko lai,” a ti.

⁵ Ruth nih a sâng le, “Na sim mi zawng chu ka ti lai,” a ti.

⁶ Churawhchun, Ruth chu fâng khâwngnâk mun ah a va kal le, a ninu nih a simh mi ziatê hen a ti rawh.

⁷ Boaz nih a din hen a ei thluh rawh chun nuam tak hen a um rawh. Fâng pawng leiah a kal le, a it rawh. Ruth chu dâisip hen a kal le, a nipuan aih a lîm le, a kê kiangah a va it.

⁸ Zân ah a hawng a ṭhang le, a kiangah nunau a it mi a muh le, chê a ti thlo.

⁹ “Âu me na si le?” ti hen a deih. “Ruth kasi, pu” ti hen a sâng. “Nang chu keimah taksa tlâi na si ruangah keimah zauhkhenhtu ding na si, zângfàhtê hen hawng ka umpi rau rawh,” a ti.

¹⁰ “LALPA nih mal an sâwm seh,” a ti. “Tuah na thilti dân lakah hin dâwngsung nei leh in-le-lo kâu dauh ngâk hen na ninu rangah na zângfahnâk na langhtir. Tuah tlangvâl dang a nei mi mawh a pâm mi mawh khawm na hâwl kho, sikhawmsele chu leikâng chu na awtlo.

¹¹ Tuah lawksawng lah Ruth, na ka deih mi zawng ka nan ti piak lai. Hi khua lakah mikip nih nunau ṭha na si zia an theih.

¹² Taksa tlâi na ti mi khawm a dik asi, nangmah zauhkhenhtu ding khawm kasi rêng asi. Sikhawmsele, minung pakhat keimah ngâk hen taksa tlâi nanna naih dauh mi a um.

¹³ Tuzân zân khat hinah um rih le, thâizîng ah a ti ding mi chu a ti lai mawh tilo kan zauhnik lai. Chu hâwi asi chun a ṭha hen a dik asi, asi lo lam chun Pathian nung min sâl hen mawhphurhnâk chu ka ting lai ti ka tiam asi. Tuah hinah khuadei tiang hen it ko,” a ti.

¹⁴ Chun, a kiangah a it le, khuadei rianruan ah mi nih an muh lântê ah a thawk le, Boaz nih âukhawm an muh ding a duh lo ruangah.

¹⁵ Boaz nih a sinah, “Na puan kha hinah hawng phah,” a ti. Chu hâwi hen a ti le, fâng kilogramme kul ding a thlêt piak, a liang ah a thângpi le, khua leiah a kîrtir rawh.

¹⁶ In a va tlung rawh chun a ninu nih, “Ka fanu, zei hâwi asi ne?” a ti. Ruth nih chun Boaz nih a rangah a ti mi zawng chu a simh.

¹⁷ “Na ninu sinah takkaro hen kîr lah hawng ka ti le, hi bang fâng tla hi hawng ka pêk,” a ti.

¹⁸ Naomi nih a sinah, “Tuah hi thu hi a hawng fiang lânlo chu ngâi ziar ko. Boaz nih hi thu hi tusûn ah thlûk lo hen a um rêng lai lo,” a ti.