RUTH 1 - Bawm Common Language Bible Version

Elimelek Leh A Dâwngsung Moab Leiah Ṭhialnâk

^1-2 Hun sâwt ual asi rawh, Israel tla nih lal an nei lânah ram lakah pâm a hawng tlung. Churawhchun, minung pakhat Elimelek, Ephrath phun ah mi Juda ram Bethlehem ah um mi chu a nupi Naomi leh a fapa panih Mahlon leh Chilion chu Moab ram ah zeimaw tiang an va um rih ding hen an kal rawh. Chunah an um liauah,

³ Elimelek chu a thi le, Naomi chu a fapa panih hen anmah lâwng hen an um rawh,

⁴ chu an fapa nih chun Moab nungâk Orpah leh Ruth an umpi na. A kum râ nûnah chun Mahlon leh Chilion khawm an thi bâk fâwn rawh.

⁵ Naomi chu pasal mawh fapa tla lo hen amah lâwng hen a um rawh.

Noami Leh Ruth Bethlehem Khua Ah Kîrnâk

⁶ Naomi nih chun LALPA nih a mi tla mîm-leh-fâng tam tak pêk hen mal a sâwm na ti a theih le, churuangah a monu tla hen Moab ram chu kaltâk ding a tum.

⁷ Juda ram leiah kîr ding anna thawh le,

⁸ sikhawmsele lampi ah an ninu nih an sinah, “Kîr ule, nan nu leh sinah um u. An thi mi tla leh ka sinah, a lânah nan um liau hâwi hen LALPA chu nan tlûnah ṭha kumza seh.

⁹ LALPA nih pasal an neihtir na hen in-le-lo tla nei kho hen an siam na seh,” a ti na. Naomi nih a châwchawk na le, “Dam u e!” a ti na. Sikhawmsele, ṭap bû hen an kal le,

¹⁰ a sinah, “Silo! Na sinah na mi le tla sinah kan hawng bâk awt,” an ti.

¹¹ “Ka fanu tla, kîr ko u. Zei rangah ka sinah hawng ding nan duh êu? Nanmah umpitu ding hen fapa dang ring kho ding hen ma nan ka ruat?

¹² Nan in leiah kîr ko u, kei khawm pasal nei ding hen ka tar tuk rawh. Hawlhnâk ah, fa ring ding a tum menza hen tuzân ko ah pasal nei hen fapa ring khawmsele,

¹³ an tlangvâl tiang hen nan ngâk kho awt mazei? Midang hen nanna umh ding mi an kham salam na awtlo ma? Chu hâwi silo, ka fanu tla, chu hâwi hen a um kho lo asi ti nan theih. LALPA nih hawng ka âwva lo rawh ma hi! Thungâi hen kan lungkham na asi.

¹⁴ Ṭap bû hen an kal nawlh le, Orpah nih a ninu rangah a châwchawk le, “Dam bâk e!” a ti le, a in leiah a kîrtâk rawh, Sikhawmsele, Ruth nih chun a thlah dahlo.

¹⁵ Naomi nih a sinah, “Ruth, na hâwinu chu a mi leh a pathian sinah a kîr le, nang khawm a sinah kîr bâk ko,” a ti.

¹⁶ Ruth nih a sâng le, “An kaltâk ding hen hawng ka fawrh nget lah, nangmah sinah lam hawng ka kaltir ko. Na kalnâk zawng ah ka kal awt, na umnâk zawng ah ka um awt, na mi tla chu ka mi tla an si lai, na Pathian chu ka Pathian asi lai.

¹⁷ Na thihnâk zawng ah ka thi awt, chunah chun vûi hen ka um lai. Chu hâwi ka ti lo chun LALPA nih ka tlûnah rêpnâk tlungtir sele, nang leh kei chu thihnâk cho lo nih chun hawng kan ṭhen lah seh,” a ti.

¹⁸ Churawhchun, Naomi nih Ruth chu a sinah kal ding a tum tak ti a theih rawh chun zei thu khawm a sim lo rawh.

¹⁹ Bethlehem ah an tlung lânlo chu an kal le, an va tlung rawh chun khuapi sungah mi tla anna chaih chur. Chunah um mi nunau tla nih chun, “Hihi Naomi tak ma si?” an ti.

²⁰ “Naomi hawng ka ti lah u,” a ti na. “Marah hawng ka ti u, Pathian zeizawng tikhotu nih ka nungnâk khâ tîk hen a siam ruangah.

²¹ Hi mun ka suaktâk liauah ka nei thlo, sikhawmsele LALPA nih kutkaro hen hawng ka kîrtir. LALPA nih hawng ka mawhtir le, nawknâk ka lakah a tlungtir mi, zei rangah Naomi nan ka ti zia lai?” a ti.

²² Hi hâwi hen Naomi chu Moab ram thawk hen Ruth, Moab nunau a monu hen an hawng kîr. Bethlehem an hawng tlung liauah chun fângzûn anna dawmh rawh.