ROM 7 - Bawm Common Language Bible Version

Umhnâk Thawk Hen Zûnzauhnâk

¹ Asi chun, unau tla, Dân nih chun mi a dam kar zawzawng a tlûnah lâi a rêl tâwn ti nan theih lo masi? Dân theih mi tla sinah ka sim asi hi.

² Nunau pasal nei chu a pasal dam kar zawzawng Dân nih a pasal lakah phuar hen a um tâwn; sikhawmsele, a pasal chu a thih lam chun a pasal leikângah Dân a mi chu thlah hen a um tâwn.

³ Chun, a pasal dam karah midang hen anna umh chun, “Ṭângdang pawmtâktu nu,” an ti lai. A pasal a thih lam chun dân a mi chu thlah hen a um le, chun midang nei khawmsele ṭângdang a pawmtâk mi asi lo.

⁴ Chun, ka unau le tla, midang, Pathian leikângah kan rah khonâk ding hen mithi lakah a thawh mi ngelchel kha nan nei khonâk ding hen, Krist taksa ruangah Dân leikângah thah hen nan hawng um rawh.

⁵ Taksa ah kan um liau khan Dân ruangah duhnâk sual a hawng suak mi tla nih chun, kan taksa ṭeng tla ah thihnâk rê a rah ding hen a ṭuan tâwn.

⁶ Tuah lam chun hawng kan tleihtu lakah thi rawh hen, Dân lakah mi thlah hen kan um rawh, Dân rîn mi lampi li ah silo hen, Thlarau lampi ah rian kan ṭuan asi.

Dân Leh Sualnâk

⁷ Zei me kan sim lai rawh ne? Dân chu sual masi? Si lo e! Sikhawmsele, Dân ruangah theih si lah sele chu sual kan theih lo ding mi; Dân nih chun, “Uh lah,” ti lah sele chu uh hi kan theih lo ding mi.

⁸ Sikhawmsele, sualnâk nih thupêk ruang chun a dêngkhâwng liau tawng hen, uhnâk zeizawng ka sungah a umtir. Dân lo chun sualnâk chu a thi asi.

⁹ Chun, a lan khan kei dân lo hen ka nung le, sikhawmsele thupêk chu a hawng um kâ hen sual a hawng thawk le,

¹⁰ kei chu ka thi rawh. Chun, nungnâk ding hen thupêk chu thihnâk ding a hawng si ti ka theih rawh.

¹¹ Sualnâk nih thupêk ruang chun dêngkhâwng tik tawng hen hawng ka bum le, thupêk chu mang hen hawng ka thah rawh asi.

¹² Chun, Dân chu a thenhlimh asi, thupêk khawm a thenhlimh le, â rep le, a ṭha asi.

¹³ Asi chun, thil ṭha chu ka rangah thihnâk a hawng si masi? Si lo e! Sualnâk chu ka rang thihnâk a hawng si dauh rawh asi. Chun, sualnâk chu sualnâk asi ti a lang khonâk ding hen, thil ṭha chu mang hen a ka thah asi. Sualnâk chu thupêk ruang khan sual fâk tak asi khonâk ding hen.

Minung Lakah Nunchan Panih Chu

¹⁴ Dân chu thlarau lei thil asi ti kan theih asi. Kei lam chu taksa leiah mi, sual sal ah zuar rawh mi kasi.

¹⁵ Thil ka ti mi hi a ngaihnâk ka theih lo. Ka ti tâwn mi hi ka thilti duhzia asi lo, ka thil huatkâng tak chu ka ti dauh tâwn asi.

¹⁶ Ka ti duhkâng chu ka ti asi chun, Dân chu a ṭha ti hen zâwt kasi lo lai mazei?

¹⁷ Chun, ka thilti hi keimah ti asi lo rawh le, sual keimah lakah a um mi nih a ti mi asi dauh.

¹⁸ Keimah lakah, chu chu ka taksa lakah tinâk asi, thil ṭha rerêng a um lo ti ka theih. Thil ṭha ti duhnâk chu keimah lakah a um narêng hen, thil ṭha tinâk lam chu a um lo.

¹⁹ Ṭhatnâk ti ka duh mi hi ka ti lo le, sualnâk ti ding ka duh lo mi hi ka ti dauh tâwn.

²⁰ Ka duh lo kâng chu ka ti asi chun, a titu chu kei kasi lo rawh le, sual keimah lakah a um mi chu asi dauh.

²¹ Chun, hi dân hi ka hawng theih rawh; thil ṭha ti ka duh liauah sualnâk ka lakah a hawng um tâwn asi.

²² Ka thinlung tak hen Pathian dân lakah ka lâwm tâwn.

²³ Sikhawmsele, ka taksa ṭeng tla lakah hin dân dang a um ti ka theih, chu nih chun ka thinlung dân a do le, ka taksa ṭeng tla lakah sualnâk dân a um mi sinah chun sal ah hawng ka ruai tâwn.

²⁴ Mi hamhkâi kasi chiammâm e! Hi thihnâk taksa lakah mi hi âunih me hawng ka suah kho lai?

²⁵ Jisu Krist kan Lalpa ruangah Pathian sinah lâwmthu kan sim asi. Chun keimah tak nih chun ka thinlung hen Pathian dân rian ka ṭuan tâwn, ka taksa lam nih chun sualnâk dân rian a ṭuan tâwn.