PHILIPI 3 - Bawm Common Language Bible Version

Repnâk Dik Chu

¹ A dawnghchemnâk ah chun, unau le tla, Lalpa ah chun a lâwm u. Thu a mahmun lîlâ nan sinah rîn nawlh hi kei rangah chun nengtawr a kâi lo, nan rangah a ṭangkâi ruangah.

² Ui tla, fêmtan ding an duhpi natu lakah chun a thiamthih u, thil ṭhalo titu tla lakah chun a thiamthih u.

³ Kannih Pathian Thlarau zârah Pathian sawnh leh Krist Jisu putso leh taksa tlûnah rinhsannâk ngauh lotu tla hi fêmtan tla kan si dauh asi.

⁴ Duh châng sele chu kei khawm taksa lakah rinhsannâk ngauh kho kasi. Midang rerêng nih taksa lakah rinhsannâk nei hen anna ruat chiau chun kei ka ruat khun asi;

⁵ ni riat ni ah fêmtan, Israel thlâk lakah mi, Benjamin chi, Hebrai mi tak lakah suak kasi; Dân leikângah chun Farisai kasi;

⁶ ṭhanemsemsê leikângah chun kawhmi tla nehsawhtu kasi. Mi nih dân thupêk zûl hen, mirep an sinâk ah chun, kei khawm sâwi ding ka um lo.

⁷ Sikhawmsele, kei rangah dingchang ding vial chu chubang chu Krist ruangah dawk phahnâk ah ka ruat asi;

⁸ asi chiammâm, ka Lalpa Krist Jisu theihnâk rokual khun ruangah thil zeizawng khawm dawknâk ah ka ruat asi; amah ruangah thil zeizawng ka dawk ver le, chubang chu thanawmrawpâi tluk cho ah ka ruat le,

⁹ Krist ka ting khonâk ding leh mah repnâk (Dân lakah repnâk chu) nei lo hen, Krist lung ruangah repnâk (Lung ruangah Pathian lakah repnâk chu) nei dauh hen, amah lakah um kasi khonâk ding hen;

¹⁰ a thihnâk va bangh a thi hen, amah hen a thawknawlhnâk thiltikhonâk hen, a tuarnâk tla bâwmpinâk hen, ka theih khonâk ding hen;

¹¹ mithi lakah mi thawknawlhnâk chu ka ting kho ram lai mawh ti hen.

Tiamnâk Lei Fûk Rarâmnâk

¹² Ka ting rawh ka ti mi lam chu asi lo le, rangtling kasi khawm ka ti mi si lo, “Krist nih a ka tleih san chu ka tleih kho lai mawh,’’ ti hen a ṭhâwl hen ka ṭhâwl dauh asi.

¹³ Unau le tla, tleih hen ka ruat lo. Sikhawmsele, hi thil pakhat hi ka ti tâwn-- dung leiah thil um tla chu philh hen, mâi leiah thil um tla chu ti hen,

¹⁴ Krist Jisu ah Pathian tlûnlei kawhnâk san lâwmman tawng ding hen, tiamhnâk lei chu ka fûk rarâm asi.

¹⁵ Chun, Thlarau ah upa vial chu hâwi thinlung put hen kan um lai; chun zei leikâng khawm ah thinlung dang put nan si chun, chu khawm chu Pathian nih a nan theihtir na lai.

¹⁶ Zeikhawm si sele, kan kal dân kêl hen kan kal lai rih.

¹⁷ Unau le tla, ka umdân zûltu hawng si u, chun zauhtawnh ding kanmah nan kan nei le chu hâwi vima um tla chu ṭha hen zauh u.

¹⁸ Mi tam tak an kal le, chu tla chu Krist kraws mêlma an si hi an thâwngthâng kan simh nget na mi kha, Tuah khawm ṭap bû hen kan simh na hi;

¹⁹ chubang tla dawnghnâk chu veihnâk asi, an pathian chu taksa duhnâk asi, anna khâwngnâk chu an mualphonâk asi, laikulh thil tla an duh tâwn asi.

²⁰ Kannih lam chu kan khawsaknâk chu vân ah asi; chu thawk ber chun Ruangsuahtu, Lalpa Jisu Krist hawng kal ding mi chu mawhlah tak hen kan ngâk kumza asi.

²¹ Anih nih chun a ṭuan hen zeizawng khawm amah thu thu hen a umtir kho, chu ṭuan zia hâwi vima hen kan taksa chaklo tak hi, amah taksa rokual hâwi a um ding hen a siam nawlh lai.