PHILEMON 1 - Bawm Common Language Bible Version

¹ Pawl, Jisu Krist ah rêngtlâ leh kan unaupa Timothe nih chun– Kan duhtak leh kan rianṭuanpi hâwi Philemon sinah leh kan farnu Aphia sinah leh kan kawrsen hâwipa Arkipa sinah leh,

² na in ah kawhmi anna pûm mi tla sinah khawm:

³ Pathian kan Pa leh Lalpa Jisu Krist sinah mi zângfahnâk leh remnâk nan sinah um seh.

Philemon Dâwtnâk Leh Lungnâk

^4-5 Lalpa Jisu leikâng ah leh mi thenhlimh zawzawng dâwtnâk leh lungnâk na nei mi chu ka theih tâwn le, ka thlachamnâk tla ah chun na min ka lam kumza, ka Pathian sinah lâwmthu ka sim tâwn.

⁶ Ka thlachamnak chu, lungtu kan sinâk ah hin Krist hen kanna tlâinâk nunchan, malsâwmnâk kip theihnâk thûk dauh kan nei mi hawng suah ding hen asi.

⁷ Unaupa, nangmah zârah mi thenhlimh tla thinlung a hawng thawk ruangah na dâwtnâk ah chun ka lâwm hen thungâi ka lungngam asi.

Onesimus

⁸ Churuangah a dawh tâwk ding chu ti ding hen thu a nan pêk ding Krist lakah chun ngamh ngâi khawmsele,

⁹ dâwtnâk ruangah, Pawl tarpa kasi le, tuah Jisu Krist ruangah rêngtlâ khawm ka hawng si; a ngiar hen ka nan ngiar lehlam.

¹⁰ Ka fa Onesimus rêngkhimh bû hen ka ring mi rangah hin na sinah ka ngiar piak asi.

¹¹ Anih chu a lânah khan na rangah a ṭhavak lo le, tuah lam chun kei leh nang rangah a ṭhavak rawh.

¹² Amah ngelchel ka thinlung tak hi, na sinah ka hawng kîrtir nawlh rawh asi.

¹³ Anih chu Thâwngthâng Ṭha ruangah rêng kâ khimhnâk ah hin nangmah ruangrûl ah a ka bulsân khonâk ding hen ka sinah umtir kumza ka duh thlo asi.

¹⁴ Sikhawmsele, hawng ka zângfah êu ka nan ti mi hâwi silo hen, nangmah thu thu hâwi asi kho dauhnâk ding hen, na thu lo hen zeikhawm ti ka duh lo.

¹⁵ Sâwtlotê nanna ṭhen mi hi kumleza hen amah na ting pawtnâk khawm asi lai dahmawh.

¹⁶ Sikhawmsele, to-aw hâwi silo rawh hen, to-aw ngâk a ṭha, Krist ah unau duhtak hâwi hen ngaih le; Lalpa lakah chun sal leh unau kan sinâk chu kei sin ngâk chun nang sinah asi dauh.

¹⁷ Chuvachun, hâwi ah na ka ruat chun keimah hâwi hen amah hi hawng lawmh rawh.

¹⁸ Chun, na lakah thil zeital a sual hen mawh na thil zeimawh â bat chun keimah bat ah ruat rawh.

¹⁹ Kei, Pawl nih, keimah kut ngelchel hen ka rîn hi, keimah nih ka rulh piak lai; ka lakah nangmah ngelchel khawm na bat ber zia an simh mi lam chu kasi loh.

²⁰ Asi, unaupa nangmah ruangah Lalpa lakah chun lâwmnâk na ka neitir le, Krist lakah chun ka thinlung thawktir rawh.

²¹ Ka sim mi ngâk a fâk dauh hen na ti lai ti ka theih ruangah rem na ti lai ti ruat hen na sinah ka hawng rîn asi hi.

²² Zeikhawm si sele chu lâwng silo hen tlungnâk ding hawng ka timhtuah piak rawh. Nan thlachamnâk tla ruangah nan sinah pêk kasi awt ti ka lung.

Chibai Bûk Dawnghnâk

²³ Epaphra Jisu Krist ah ka rêngtlâpi mi nih hin chibai a nan bûk.

²⁴ Ka rianṭuanpi Mark leh Aristarka leh Dema leh Luk khawm nih chu hâwi ber hen chibai an bûk.

²⁵ Kan Lalpa Jisu Krist zângfahnâk nan ektê sinah um seh.