NUMBER 6 - Bawm Common Language Bible Version

Nazirit Mi Rangah Dân

¹ LALPA nih Mosi sinah

² Israel mi tla rangah hi bang sîntirnâk tla pêk ding hen thu a pêk. Mipa mawh nunau mawh Nazirit si duh hen thutiam a nei chun, LALPA sinah pumpêk hen,

³ zû leh uain a ngei ding asi. Grep hâng din mi zât zeital a din ding asi lo, a grep rah leh a ring mi leh a châr mi khawm a ei ding asi lo.

⁴ LALPA rangah thlei asi kar vial chu grep zûn lakah mi mawh, a chî mawh, a zûn hâwng khawm a ei ding asi lo.

⁵ Thlei mi (Nazirit) sinâk thutiam a nei kar zawng chu a lû khawm a khamul khawm mêt ding asi lo; a thutiam LALPA sinah â pumpêknâk ruang chun a sam leh a khamul chu a zuah ding asi.

^6-7 A sam chu Pathian sinah pêk asi ti theihnâk asi, churuangah a pa mawh, a nu mawh, a unaupa mawh, a farnu mawh ruak kiangah a kal ding asi lo.

⁸ Nazirit asi kar vial chu LALPA rangah thenhlimh asi.

⁹ A kiangah minung mawhsareh hen a thih nawh ruangah â thleinâk sam chu a nâwm mi asi chun, ni sarih a ngâk lai le, a sam leh a khamul chu mêt hen dân hâwi hen a hawng thiang lai rawh.

¹⁰ A ni riat ni ah vaṭhu bawp khat mawh lâilêng bawp khat mawh lâk hen LALPA umnâk Puanin tualmâi ah bâwlpu sinah a kalpi ding asi.

¹¹ Bâwlpu nih pakhat chu sual ruangah ap hen, a pakhat dang chu duahphung thil ap rangah a pêk lai le, ruak lakah â nawmh mi ruangah, dân ah thenhnâk ding hen a timhtuah ding asi. Chu ni lîlâ ah, chu minung nih chun a sam chu a thenhlimhtir nawlh lai le,

¹² a Nazirit sinâk chu LALPA sinah â pumpêk nawlh lai. A lânah mi tla chu siar asi lo rawh, a thenhlimhtir mi sam chu nawmh asi rawh ruangah. Rulhnawlhnâk thil ap rangah dawrâ fa kum khat mi a put ding asi.

¹³ Nazirit a sinâk thutiam a lîm rawh chun, dân hâwitê hen a ti ding asi. Puanin tualmâi ah a va kal lai le,

¹⁴ ran pathum simsâwinâk umlo mi: kum khat mi dawrâ fa a mipa duahphung thil ap rangah, kum khat mi dawrâ fa a nunau sual thil ap rangah, dawrâ chal kawmhnâk thil ap rangah, LALPA sinah pêk ding asi.

¹⁵ Thilnu telh lo mi sang bâwm khat khawm ap ding asi: sangtlêp sah, oliv sariak hen chawmh mi leh sang oliv sariak hen chulh mi a dang thil ap herh mi fâng leh uain khawm a ap ding asi.

¹⁶ Bâwlpu nih hi bang tla hi LALPA sinah a pêk lai le, sual rangah thil ap leh duahphung thil ap a ap lai.

¹⁷ Dawrâ chal chu kawmhnâk thil ap rangah LALPA sinah bâwlnâk a pêk lai le, sang bâwm khat a ap lai le, fâng leh uain khawm a pêk lai.

¹⁸ LALPA Puanin mâika ah Nazirit mi nih chun a sam tla a mêt lai le, kawmhnâk thil ap duah mi lakah a paih ding asi.

¹⁹ Churawhchun, dawrâ chal, a dâr an suang mi chu bâwlpu nih a lâk lai le, sangtlêp sah pakhat leh sang rêu pakhat bâwm sungah mi hen, Nazirit si mi pa kut ah a pêk lai.

²⁰ Churawhchun, bâwlpu nih LALPA sinah a bîk thilpêk rangah a pêk lai; chubang tla chu bâwlpu rangah thil ap thenhlimh asi, a î-âwm tla, dawrâ chal kevâng dân hâwi hen bâwlpu vo chu asi. Chu tikah Nazirit mi nih uain chu a din kho lai rawh.

²¹ Hi hi Nazirit si mi tla rangah dân chu asi; sikhawmsele Nazirit si mi nih thil ap a tiamh mi nûnah a lei a thil tiamh lakah a herh mi chu a tiamh mi hâwitê hen a tlinh ngelchel ding asi.

Bâwlpu Malsâwmnâk

²² LALPA nih Mosi sinah

²³ Aron leh a fapa tla nih Israel mi tla rangah hi bang malsâwmnâk thu tla hi mang ding hen thu a pêk na:

²⁴ LALPA nih an kilkâwi na hen mal an sâwm na seh;

²⁵ LALPA chu nan lakah vêlnei hen an zângfah na seh;

²⁶ LALPA nih an sunhsak na hen thlangamnâk an pêk na seh.

²⁷ LALPA nih, “Ka min hen Israel mi tla tlûnah malsâwmnâk an sim chun mal ka sâwm na lai,” a ti.