NUMBER 4 - Bawm Common Language Bible Version

Kohat Thlâk Levi Tla Rianṭuan Ding Mi

¹ LALPA nih Mosi sinah

² Kohat thlâk Levi murui minung rêlnâk nei ding hen a simh, dâwngsungkhur leh an chi umdân hâwi vima hen,

³ LALPA umnâk Puanin rianṭuan leikâng thiam mi minung kum sâwmthum leh kum sâwmnga karah mi zawzawng rîn hep ding asi.

⁴ An rianṭuan nih thil thenhlimh chem a uap hep.

⁵ LALPA nih Mosi sinah hi bang hâwi sîntirnâk tla hi a pêk. Um mun ṭhial tikah Aron leh a fapa tla chu Puanin sungah an va lût lai le, Thudântuk Bâwm mâika mi puanzâr chu an lâwm lai le, chu hen chun Bâwm chu an khuh lai.

⁶ A tlûnah savun a ṭha mi hen khuh ding asi, chu tlûnlei ah puan dumpâwl mi hen khuh ding, chu tikah a zawnhnâk fung sawh ding asi.

⁷ LALPA sinah ap ding mi sang siahnâk dawhkân tlûnah puan dumpâwl phah hen, a tlûnah khêng tla, rimthâw khêng, ap mi khêng, uain ap ding mi dûr siah. Zeiliau zawng ah sang chu dawhkân tlûnah um kumza ding asi.

⁸ A tlûn zawzawng chu puansen phah ding, savun ṭha mi hen a lênglei tuam ding, churawhchun a zawnhnâk fung sawh ding.

⁹ Meichêu tung, a meichêu, châicheh, vachâm rûtnâk leh oliv sariak siahnâk zawzawng chu puan dumpâwl hen tuam ding asi.

¹⁰ A thuamthil zawzawng chu savun a ṭha mi hen tuam hen kâwpmi tung zawnh mi tlûnah siah ding.

¹¹ Chu nûn chun dumpâwl hen ngûn mâichâm chu khuh ding, savun a ṭha mi hen khuh le, chu tikah a zawnhnâk fung sawh ding.

¹² Khêng leh bêl Mun Thenhlimh ah mang mi zawzawng chu, puan dumpâwl a tuam hen savun a ṭha mi hen khuh ding, chun kâwpmi tung zawnh mi tlûnah siah ding.

¹³ Mâichâm ah sathâu duah mi dap chu an lawnh lai le, puan dumpâwl an khuh ding asi.

¹⁴ Mâichâm ah rianṭuannâk thil zawzawng a tlûnah siah ding asi: mei lâknâk, thîr kuaih mi, vachâm rûtnâk leh mâihûm tla khawm. Churawhchun, savun ṭha mi hen a khuh lai le, a zawnhnâk fung an sawh lai.

¹⁵ Chun, riakmun chu an lâwm tikah, Aron leh a fapa tla nih a thuamthil zawzawng chu an khuh thluh rawh chun Kohat thlâk tla chu thil thenhlimh zawnh ding hen an hawng ding asi. Kohat thlâk tla nih thil thenhlimh tla chu an tawngh ding asi lo, an tawngh chun an thi lai. Hi hi zeiliau zawng ah Puanin an ṭhial kip ah Kohat thlâk tla mawhphurhnâk asi.

¹⁶ Aron bâwlpu fapa Eleazar chu Puanin leikâng zawzawng meichêu, sariak, rimthâw, fâng ap mi, thuh mi sariak leh Puanin ah thil thenhlimh zawzawng tla LALPA sinah ap mi leikângah mawhphurhtu asi.

¹⁷ LALPA nih Mosi leh Aron sinah,

¹⁸ “Kohat thlâk tla chu thil thenhlimh kiangah hawng tir lah u,

¹⁹ an thi lebang lai. Hi bang hâwi lakah palh-le-rah umlo ding hen Aron leh a fapa tla chu an va kal lai le, mikip nih an ti ding mi leh an put ding mi an ruat hen an simh na ding asi.

²⁰ Sikhawmsele Kohat thlâk tla chu Puanin ah an va lût hen bâwlpu tla nih Puanin sungah thil thenhlimh ṭhial awt liauah an timhtuah mi an va muh chun an thi lai,” a ti.

Gerson Thlâk Lakah Mi Levi Tla Rianṭuan

²¹ LALPA nih Mosi chu,

²² Gerson thlâk Levi tla dâwngsungkhur leh an chi umdân hâwi vima hen minung lû rêlnâk nei hen, LALPA umnâk Puanin ah rianṭuan kho ding mi,

²³ kum sâwmthum leh kum sâwmnga karah mi mipa zawzawng rîn hep ding hen a simh.

²⁴ Hi bang Puanin, a sunglei mi khuhnâk,

²⁵ a lênglei khuhnâk, a tlûn chem khuhnâk savun ṭha chem mi, a tualmâi puanzâr

²⁶ puanzâr leh a rirual, Puanin leh mâichâm kulhnâk, a tualmâi kulhnâk puanzâr; chubang thil zawzawng kilhnâk tla puttu ding hen mawhphurhnâk an nei. Hi bang thil lakah a herh mi zawzawng an ti ding asi.

²⁷ Mosi leh Aron nih chun Gerson thlâk tla rianṭuan zawzawng leh Aron fapa tla rangah rianṭuan ding an ap mi chu an zauh ding asi.

²⁸ Hi bang tla hi Gerson thlâk tla nih Puanin sungah an mawhphurhnâk asi; Aron bâwlpu fapa Ithamar thupêk hen hi bang tla hi an put ding asi.

Merari Thlâk Levi Tla Rianṭuan.

²⁹ LALPA nih Mosi sinah Merari thlâk Levi murui tla chu an dâwngsungkhur leh chi umdân hâwi vima hen minung lû rêlnâk nei hen

³⁰ LALPA umnâk Puanin ah rianṭuan kho ding mi mipa kum sâwmthum leh kum sâwmnga karah mi zawzawng rîn ding hen a simh.

³¹ Kâwpmi tung, a khuahkhang, a tung, a tohnâk ,

³² Puanin kulhnâk tung, a tohnâk, a kilhnâk, Puanin kulhnâk rirual, chu lakah kaihkawhnâk ah mang mi zawzawng hen puttu ding ah mawhphurhnâk pêk an si. Mi kip mah vo chiau put ding hen ruat an si.

³³ Hi bang tla hi Merari thlâk tla Puanin ah an rianṭuan mawhphurhnâk chu asi: Aron bâwlpu fapa Ithamar thupêk hen chubang chu an put ding asi.

Levi Murui Minung lû Rêlnâk

^34-48 LALPA thupêk zûl hen Mosi, Aron leh zapi tla ruitu tla nih chun Levi chi pathum, Kohat, Gerson leh Merari thlâk minung lû rêlnâk chu an rîn rawh. Hi bang hi an dâwngsungkhur umdân hâwi hen mipa vial kum sâwmthum leh kum sâwmnga karah mi, LALPA umnâk Puanin ah rianṭuan khotu tla rîn mi chu an si. Hi bang tla hi: A phun Minung zat Kohat 2,750 Gerson 2,630 Merari 3,200 A ektê fawnh hen 8,580

A phun Minung zat

⁴⁹ Mi kip chu LALPA nih Mosi rangah thu a pêk hâwi hen rîn an si; LALPA nih Mosi mang hen mikip an ṭuan ding mi leh an put ding mi a ruat piak chiau na.