NUMBER 34 - Bawm Common Language Bible Version

Ram Rî

¹ LALPA nih Mosi sinah

² Israel tla rangah hi bang sîntirnâk tla hi a pêk: “Kanaan ram ka nan pêk na mi nan lût tik chun, a ramri ding mi chu hi hâwi asi lai.

³ Simlei kâng chun Zin ramkaro thawk hen Edom ramri tiang asi lai. Saklei thawk hen simlei kâng Tipi Thi dawngh tiang asi lai.

⁴ Simlei kâng vima kal hen Akrabim Liamnâk simlei ah Zin ramkaro pal hen Kades Barnea simlei tiang hen. Churawhchun, mar thlang leiah Hazar Addar leiah leh Azmon leikâng vima ah,

⁵ Aigupta ramri leikâng kuam ah a hawng kal lai le, Mediteranian Tipi ah a dawng lai.

⁶ “Thlanglei kang ramri chu Mediteranian Tipi.

⁷ “Marlei kâng ramri chu Mediteranian thawk hen Hor Tlâng,

⁸ chu thawk hen chun Hamat liamnâk, Zedad leh

⁹ Ziphron leiah Hazar Enan ah a dawng lai.

¹⁰ “Saklei ramri chu Hazar Enan thawk hen Sepham ah.

¹¹ Simlei kâng Ain Saklei Harbel ah, Galili rilî saklei kâng tlâng leiah kal vima hen,

¹² churawhchun simlei Jordan Va dungtê Tipi Thi tiang asi. “Hi hi nan ramri pali ding mi chu asi,” a ti.

¹³ Mosi nih Israel tla sinah, “Hi ram hi asi chamchawh hen nanna ting ding mi ram chu, chu ram chu LALPA nih phun kua leh a khingkhuai umnâk rangah a ruat mi chu asi.

¹⁴ Reuben leh Gad phun leh Manaseh phun khingkhuai nih chun anmah dâwngsung mah tam dân hâwi vima hen anna ṭhen mi thil,

¹⁵ Jordan Va saklei Jeriko zâwn ram chu anna ting rawh.”

Ram Ṭhen Ding Hen Ruitu Tla Mawhphurhnâk

¹⁶ LALPA nih Mosi sinah,

¹⁷ “Bâwlpu Eleazar leh Nun fapa Josua nih ram chu zapi tla an ṭhenh na ding asi.

¹⁸ Ṭhen tikah anmah ṭangpitu ding hen phun kip thawk hen ruitu pakhat vima lâk na,” a ti.

^19-28 Hi bang tla hi LALPA nih a thîm na mi chu an si: Phun Ruitu Juda Jephuneh fapa Kaleb, Simeon Amihud fapa Selumiel, enjamin Kislon fapa Elidad, Dan Jogli fapa Bukki, Manaseh Ephod fapa Haniel, Efraim Siptan fapa Kemuel, Zebulun Parnak fapa Elizaphan, Isakar Azan fapa Paltiel, Aser Selomi fapa Ahihud, Naphtali Amihud fapa Pedahel.

Phun Ruitu

²⁹ Hi bang tla hi Kanaan ram Israel mi tla tingvo ṭhenh natu ding hen LALPA nih a ruat na mi chu an si.