NUMBER 3 - Bawm Common Language Bible Version

Aron Fapa Tla

¹ Hi hi Sinai Tlâng LALPA nih Mosi sinah thu a sim liauah Aron leh Mosi dâwngsung tla chu an si.

² Aron nih fapa pali a nei: Nadab, upachem mi, Abihu, Eleazar leh Ithamar an si.

³ Bâwlpu rangah sariak thuh hen birhtir mi an si,

⁴ sikhawmsele Nadab leh Abihu lam chu Sinai Ramkaro ah LALPA sinah mei thianglo an ap ruangah an thi asi. Fa tla khawm an nei lo, churuangah Aron dam liauah Eleazar leh Ithamar nih bâwlpu rian an ṭuan.

Levi Murui Chu Bâwlpu Rianṭuan Piaktu Ah Ruat An Si

⁵ LALPA nih Mosi sinah,

⁶ “Levi tla chu Aron bâwlpu rianṭuantu ding hen a masa hen hawngpi na le, ruat na.

⁷ Ka umnâk Puanin rangah rian herh an ṭuan lai le, bâwlpu tla leh zapi minung rangah an ti ding mi siam piak na.

⁸ Puanin thuamthil zawzawng mawhphurhnâk leh Israel mi zapi dang tla rangah rianṭuan piaktu ding ah siam na.

⁹ Levi tla mawhphurhnâk chu Aron leh a fa tla rianṭuan piak ding asi.

¹⁰ Aron leh a fapa tla chu bâwlpu rianṭuan lakah mawhphurhnâk na pêk na ding asi, midang âutal chu rianṭuan tumtu chu thah ding asi,” a ti.

¹¹ LALPA nih Mosi sinah,

^12-13 “Levi chu ka tâ ding an si, Aigupta mi fa tîr ka thah liau khan Israel dâwngsungkhur kip ah fapa tîr leh ran lakah suak masa chem chu ka tâ rang ding ah ka thenhlimhtir rawh. Tuah Israel dâwngsungkhur lakah fapa tîr tla ruangrûl ah Levi tla kâ ting rawh; ka tâ an si rawh. Kei, LALPA kasi,” a ti.

Levi Chi Tla Rêlnâk

¹⁴ Sinai Ramkaro ah LALPA nih Mosi sinah, Levi tla chu an dâwngsungkhur leh an chi leh kuang um hâwi hen, mipa fa thla khat mi mawh,

¹⁵ chu ngâk a upa mawh rîn le, singsiah na, a ti le,

¹⁶ chu hâwi hen Mosi nih a ti.

^17-20 Levi nih fapa pathum a nei: Gerson, Kohat leh Merari, chu tla chu anmah thlâktu min puttu chu an si. Gerson nih fapa panih a nei: Libni leh Simei; Kohat nih fapa pali a nei; Amram, Izhar, Hebron leh Uziel; chun, Merari nih fapa panih a nei: Mahli leh Musi an si. Chu tla chu dâwngsungkhur tla thlâktu min puttu chu an si.

²¹ Libni leh Simei dâwngsungkhur tla chu Gerson thlâk an si.

²² Mipa fa thla khat mi leh chu ngâk a upa rîn mi zat chu 7,500 an si.

²³ Hi chi tla hi thlanglei kângah Puanin dunglei ah

²⁴ an hotu Lael fapa Eliasap hen mun an khuar ding asi.

²⁵ Puanin, a sunglei khuhnâk, a lênglei khuhnâk, a tualmâi mi puanzâr,

²⁶ puanzâr tla Puanin leh mâichâm kulhnâk leh a tualmâi kulhnâk tla lakah mawhphurhnâk an nei. Rianṭuannâk zawzawng leh hi bang tla lakah mawhphurhnâk an nei.

²⁷ Amram, Izhar, Hebron leh Uziel thlâktu chu Kohat asi.

²⁸ Mipa fa thla khat mi leh chu ngâk a upa rîn mi zat chu 8,600 asi.

²⁹ Hi phun tla chu Puanin simlei kângah Uziel fapa

³⁰ Elizaphan an hotu hen an um ding asi.

³¹ Thudântuk Bâwm, dawhkân, meichêu, mâichâm, Mun Thenhlimh ah mi khêng leh bêl bâwlpu tla nih mang mi leh Mun Thenhlimh Chem mi puanzâr tla lakah mawhphurhnâk an nei. Rianṭuan zawzawng leh hi bang tla lakah mawhphurhnâk an nei.

³² Levi lakah an hotu chu Aron bâwlpu fapa Eleazar asi. Mun Thenhlimh ah rianṭuantu tla hotu asi.

³³ Musi leh Mahli dâwngsung chu Merari thlâk an si.

³⁴ Mipa fa thla khat mi leh chu ngâk a upa rîn mi zat chu 6,200 an si.

³⁵ Hi chi tla chu Abihail fapa Zuriel an hotu hen Puanin marlei ah an um ding asi.

³⁶ Puanin kâwpmi tung, a talkhang, a tung, a tohnâk leh a kaihkawhnâk zawzawngah mawhphurhnâk anna ting. Rianṭuannâk zawzawng leh hi bang tla lakah mawhphurhnâk anna ting.

³⁷ Lênglei mi kulh lakah mi a tung, a tohnâk, a renhnâk, a kulh rangah mi rirual lakah mawhphurhnâk an nei.

³⁸ Mosi leh Aron leh a fapa tla chu Puanin mâilei kângah suahlei ah an um ding asi. Israel mi tla rangah Mun Thenhlimh ah rianṭuantu ding ah mawhphurhnâk anna ting. Midang âutal nih chu rianṭuan ding tumtu chu thah ding asi.

³⁹ Levi lakah mipa fa thla khat mi leh chu ngâk a upa mi LALPA nih Mosi thu a pêk mi hâwi hen rîn mi fawnh ver hen 22,000 an si.

Levi Tla Fapa Tîr Tla Ruangrûl An Sinâk

^40-41 LALPA nih Mosi sinah, “Israel lakah fapa tîr vial chu ka tâ asi. Churuangah Israel lakah fapa tîr chu rîn le, thla khat mi leh chu ngâk a upa tla. Sikhawmsele, chubang tla ruangrûl ah Levi tla chu ka rang ding ah ka ruat rawh. Kei, LALPA kasi! Levi ran tla chu ranrual zawzawng fa tîr ruangrûl ah ka ruat rawh a ti.

⁴² Mosi nih â âwi le

⁴³ mipa fa thla khat mi leh chu ngâk a upa dauh tla chu a rîn na rawh; an ektê hen 22,273 an si.

⁴⁴ LALPA nih Mosi sinah,

⁴⁵ “Tuah Levi tla chu Israel fapa tîr zawzawng ruangrûl ah ka tâ ding hen hawng ap le, Levi ranrual tla chu Israel ran zawzawng fa tîr mangrûl ah hawng ap.

⁴⁶ Israel fa tîr tla chu Levi fa tîr ngâk hen 273 hen an tam le, chu a lei mi chu nan tlanh nawlh ding asi.

⁴⁷ Pakhat lakah dân hâwi hen tangka ngâ vima asi lai.

⁴⁸ Chu tangka chu Aron leh a fapa tla sinah pêk u,” a ti.

⁴⁹ Mosi chu â êt le,

⁵⁰ tangka 1,365 chu a lâk le,

⁵¹ Aron leh a fapa tla sinah a pêk na.