NUMBER 29 - Bawm Common Language Bible Version

Kum Thar Kût Ah Thil Ap

¹ A thla sarihnâk a ni khat ni ah Pathian sawnh ding hen nanna pûm lai le, zei rian khawm nan ṭuan ding asi lo. Chu ni ah chun tâwtawrâwt nan tum ding asi.

² Duahphung thil ap LALPA sinah pêk u, a rim nih amah lawmhtir ding hen: Chawchal pakhat, dawrâ chal pakhat leh dawrâ fa kum khat mi a mipa pasarih, simsâwinâk umlo mi pêk ding asi.

³ Fâng thil ap sangvut oliv sariak hen chawmh mi ap u: chawchal lakah sangvut kilogramme thum, dawrâ chal lakah kilogramme nih,

⁴ dawrâ fa pakhat lakah kilogramme khat chiau ap ding asi.

⁵ Kêl chal khawm sual thil ap rangah ap u, hi hâwi hen zapi thenhlimhtir dân siam u.

⁶ Chu lo khawm ah chu thla a ni khat ni ah duahphung thil ap lakah chun fâng thil ap leh duahphung thil ap ap ule, nisiar duahphung thil ap fâng thil ap leh uain thil ap hen ap u. Hi eiphung thil ap rim nih LALPA a lawmhtir.

Tlanhnâk Ni Ah Thil Ap

⁷ Thla sarihnâk a ni râ ni ah Pathian sawnh ding hen a pûm ule, buh khawm ei lah ule, rian khawm ṭuan lah u.

⁸ Duahphung thil ap LALPA sinah pêk ule, a rim nih a lawmhtir asi: chawchal tuai pakhat, dawrâ chal pakhat, dawrâ fa a mipa kum khat mi pasarih simsâwinâk umlo mi pêk ding asi.

⁹ Fâng thil ap sangvut oliv sariak hen telh mi ap ding asi: sangvut kilogramme thum chu chawchal hen, sangvut kilogramme nih chu dawrâ chal hen

¹⁰ leh sangvut kilogramme khat chu dawrâ fa pakhat chiauah ap ding asi.

¹¹ Chu lo khawm ah mi zapi rangah dân hen thenhlimhtirnâk ah ap mi kêl leh nisiar duahphung thil ap ah ap, fâng thil ap leh uain thil ap lakah kêl chal pakhat sual thil ap ah ap ding asi.

Basâ Kût Ah Thil Ap Tla

¹² A thla sarihnâk ni leinga ni ah Pathian sawnh ding hen a pûm u. Hi kûtnâk hi Pathian zahnâk ding hen ni sarih nan mang ding asi, zei rian khawm nan ṭuan ding asi lo.

¹³ A ni khat ni ah LALPA sinah eiphung thil ap ap ule, a rim nih a lawmhtir asi: chawchal tuai leithum, dawrâ chal panih leh dawrâ fa a mipa kum khat mi simsâwinâk umlo mi leili pêk ding asi.

¹⁴ Fâng thil ap sangvut oliv sariak hen chawmh mi ap u: chawchal kip ah sangvut kilogramme thum, dawrâ chal kip ah kilogramme nih vima,

¹⁵ dawrâ fa pakhat kip ah kilogramme khat vima, uain thil ap herh tak mi hen pêk ding asi.

¹⁶ Kêl chal pakhat sual thil ap rangah pêk ding asi. Hi lo khawm ah nisiar duahphung thil ap, fâng thil ap leh uain thil ap hen ap ding asi.

¹⁷ A ni nih ah chun chawchal tuai leinih, dawrâ chal panih, dawrâ fa kum khat mi a mipa leili, simsâwinâk umlo mi ap ding asi.

^18-19 A ni khat ni rangah thil ap ding mi dang a herh mi zawzawng ap sih u.

²⁰ A ni thum ni ah chawchal tuai leikhat, dawrâ chal panih, dawrâ fa kum khat mi a mipa leili, simsâwinâk umlo mi ver ap u.

^21-22 A ni khat ni rangah thil ap a herh mi dang zawzawng chu ap sih u.

²³ A ni li ni ah chun chawchal tuai parâ, dawrâ chal panih, dawrâ fa kum khat mi a mipa leili simsâwinâk umlo mi ap u.

^24-25 A ni khat ni rangah thil ap a herh mi dang zawzawng ap sih u.

²⁶ A ni nga ni ah chawchal tuai pakua, dawrâ chal panih, dawrâ fa kum khat mi a mipa leili, simsâwinâk umlo mi nan pêk ding asi.

^27-28 A ni khat ni rangah thil ap a herh mi dang zawzawng ap sih u.

²⁹ A ni ruk ni ah chawchal tuai pariat, dawrâ chal panih, dawrâ fa kum khat mi leili, simsâwinâk umlo mi hep ap ding asi.

^30-31 A ni khat ni rangah thil ap a herh mi dang zawzawng ap sih u.

³² A ni sarih ni ah chun chawchal tuai pasarih, dawrâ chal panih, dawrâ fa a mipa kum khat mi leili, a ektê hen simsâwinâk umlo mi nan ap ding asi.

^33-34 A ni khat ni rangah thil ap a herh mi dang zawzawng ap sih u.

³⁵ A ni riat ni ah chun Pathian sawnh ding hen a pûm ule, rian ṭuan lah u.

³⁶ Duahphung thil ap chu eiphung thil ap hâwi hen LALPA sinah ap u, a rim nih a lawmhtir asi: chawchal tuai pakhat, dawrâ chal pakhat, dawrâ fa kum khat mi a mipa pasarih, an ektê hen simsâwinâk umlo mi ap u.

^37-38 A ni khat ni rang thil ap ding a herh mi dang zawzawng chu ap sih u.

³⁹ Hi bang tla hi duahphung thil ap, fâng thil ap, uain thil ap, kawmhnâk thil ap tla chu LALPA lakah nan ruat mi Kût thu ah nan siam ding mi dân tla chu asi. Hi bang tla hi thutiam rangtling tirnâk mawh mah duh thu hen thil ap nan pêk mi lakah sap mi chu asi.

⁴⁰ Churawhchun, Mosi nih Israel tla rangah simh ding hen LALPA nih thu a pêk mi thil zeizawng chu a simh na rawh.