NUMBER 28 - Bawm Common Language Bible Version

Zulhpeh Vima Mi Thilpêk

¹ LALPA nih Mosi sinah

² amah lawmhtir ding hen eiphung thil ap herh mi tla, a tik vima ah Israel mi tla nih Pathian sinah pêk ding hen sîntir na ding hen thu a pêk.

³ Hi bang tla hi LALPA sinah eiphung thil ap ap ding mi tla chu asi: nisiar hen duahphung thil ap ap ding mi chu, dawrâ panih a mipa kum khat mi sâwinâk umlo mi a siding asi.

⁴ Pakhat chu zînglei ah ap ding asi, a panihnâk chu zânlei ah,

⁵ fâng ap mi kip ah sangvut kilogramme khat, oliv sariak a ṭha chem mi litre khat hen chawmh mi ap ding asi.

⁶ Hi hi nisiar thil ap duah hep mi Sinai Tlângah eiphung thil ap, masa chem mi asi le, chu rim nih LALPA chu a lawmhtir.

⁷ Dawrâ fa pakhatnâk hen uain ap mi chu, uain litre khat mâichâm ah thlêt.

⁸ Zânlei khawm ah chun dawrâ fa a panihnâk chu zînglei mi hâwi hen uain hen mun khat hen an ap. Chu khawm chu eiphung thil ap asi le, a rim nih LALPA a lawmhtir.

Dinhni Thil Ap

⁹ Dinhni ah kum khat mi dawrâ fa a mipa simsâwinâk umlo mi panih leh sangvut oliv sariak hen chawmh mi kilogramme nih fâng thil ap leh uain thil ap rangah nan ap ding asi.

¹⁰ Hi duahphung thil ap hi Dinhni kip ah ap ding asi, nisiar thil ap uain hen ap mi sap singsuan ah.

Thla Khat Ah A Ni Khatnâk Ah Mi Thil Ap

¹¹ Thla bul kip ah duahphung thil ap LALPA sinah pêk ding asi: chawchal panih, dawrâ chal pakhat, dawrâ fa kum khat mi a mipa pasarih simsâwinâk kawplo mi pêk ding asi.

¹² Fâng thil ap hâwi hen sangvut oliv sariak hen chawmh mi ap: chawchal kip lakah sangvut kilogramme thum; dawrâ chal pakhat lakah sangvut kilogramme nih;

¹³ dawrâ fa pakhat kip lakah kilogramme khat sangvut hen ap ding asi. Hi duahphung thil ap tla hi eiphung thil ap asi, a rim nih LALPA a lawmhtir.

¹⁴ Uain apnâk tak lakah chun chawchal kip ah litre nih seng ding asi, dawrâ chal lakah chun litre khat leh a tan, dawrâ fa pakhat lakah litre khat seng ding asi. Hi hi kum khat sungah thla siar hen a ni khat ni ah duahphung thil ap ap ding dân chu asi.

¹⁵ Chun, chu lâwng silo hen nisiar duahphung thil ap uain thil ap hen kêl chal pakhat sual thil ap rang ding ah pêk ding asi.

Sang Thilnu Telhlo Kût Lakah Thil Ap

¹⁶ LALPA zahnâk ding ah Kalkanh Kût chu a thla khatnâk ni leilinâk ah mang ding asi.

¹⁷ A ni leinga ni ah phung Kût chu dawmh asi lai le, ni sarih tiang mang asi lai, chu kar zawng chun sang thilnu telh lo hen siam mi ei ding asi.

¹⁸ A ni khatnâk Kût ni ah chun, Pathian sawnh ding hen pumhnâk asi, zei rian khawm ṭuan ding asi lo.

¹⁹ Eiphung thil ap hâwi hen duahphung thil ap LALPA sinah ap u: chawchal tuai panih, dawrâ chal pakhat, dawrâ fa a mipa kum khat mi pasarih simsâwinâk umlo mi nan ap ding asi.

²⁰ Fâng thil ap oliv sariak hen chawmh mi sangvut kilogramme thum, chawchal pakhat vima lakah telh ding, dawrâ chal lakah kilogramme nih,

²¹ leh dawrâ fa pakhat lakah kilogramme khat vima ap sih ding asi.

²² Chun, kêl chal pakhat sual thil ap rangah ap ding asi, hi hâwi hen zapi thenhlimhtir dân nan timhtuah ding asi.

²³ Chu lo khawm ah zîng siar hen duahphung thil ap ap ding asi.

²⁴ Hi hâwi hen ni sarih kar zawng chu eiphung thil ap LALPA rangah ap ding asi, a rim nih a lawmhtir. Chu lo khawm ah nisiar duahphung thil ap leh uain thil ap ap ding asi.

²⁵ A ni sarih ni ah chun Pathian sawnh ding hen pumhnâk asi le, zei rian khawm ṭuan ding asi lo.

Fângzûn Kût Ah Thil Ap

²⁶ Fângzûn Kût a ni khat ni ah LALPA sinah fa thar nan ap chun, Pathian sawnh ding hen nanna pûm lai le, zei rian khawm nan ṭuan ding asi lo.

²⁷ LALPA lawmhtirnâk ding ah duahphung thil ap ap u: chawchal tuai panih, dawrâ chal pakhat, dawrâ fa a mipa kum khat mi pasarih simsâwinâk umlo mi nan ap ding asi.

²⁸ Fâng thil ap oliv sariak hen chawmh mi sangvut ap u: chawchal kip ah kilogramme thum, dawrâ chal lakah kilogramme nih

²⁹ dawrâ fa pakhat kip kilogramme khat sangvut ap sih ding asi.

³⁰ Kêl chal pakhat khawm sual thil ap rangah nan ap ding asi, hi hâwi hen zapi rangah thenhlimhtir dân nan timhtuah ding asi.

³¹ Chu lo khawm ah hi bang uain ap mi hi nisiar duahphung thil ap leh fâng thil ap lakah ap ding asi.