NUMBER 23 - Bawm Common Language Bible Version

¹ Balak sinah, “Hinah hin mâichâm pasarih hawng ka siam piak le, chawchal pasarih leh dawrâ chal pasarih hawng put,” a ti.

² Balak nih chun chu hâwi hen a ti le, mâichâm kip ah chawchal pakhat leh dawrâ chal pakhat an ap.

³ Chun, Balaam nih Balak sinah, “Hi na duahphung thil ap kiangah hin dîr le, LALPA hen kanna tawng lai mawh tawng lai lo mawh ka va kal lai rih. Ka sinah a sim mi vial chu kan simh ver lai,” a ti. Churawhchun, amah lâwng hen tlângah a va kai le,

⁴ chunah chun Pathian hen anna tawng. Balaam nih a sinah, “Mâichâm pasarih ka siam le, chu lakah chun chawchal pakhat leh dawrâ chal pakhat vima ka ap,” a ti.

⁵ LALPA nih Balaam chu a sim ding mi thu tla chu a simh le, Balak sinah a thuchah chu sim ding hen a kîrtir nawlh rawh.

⁶ Churawhchun, a va kîr le, Balak chu a duahphung thil ap kiangah Moab ruitu tla zawzawng hen an dîr ko mi a muh na.

⁷ Balaam nih hi thu hi a sim: “Moab lalchem Balak nih chun Suria ram ah mi saklei tlâng thawk hen hawng ka kalpi. ‘Hawng le thu hawng ka sim piak, ‘Israel zapi minung tla chu siat barh na,’ a ti.

⁸ Pathian nih siatbarh lo hen kei nih zeitin ka barh kho lai, LALPA nih vânduainâk a pêk na lo mi chu kei nih zeitin vânduainâk thu ka sim kho lai?

⁹ Lungpi sâng tak thawk hen annih tla chu ka muh na le; Tlâng tla thawk hen annih tla chu ka vêng kho na. Anmah phun tla lâwng hen um mi an si; phun dang tla ngâk hen malsâwmnâk ting dauhtu an si ti anna theih.

¹⁰ Israel thlâk tla chu valeidip hâwi an si- Rêl ding hen an tam tuk. Pathian mi tla lakah pakhat hâwi hen ka san dawngtir le; Mi rep tla hâwi hen lungngam tak hen hawng ka thihtir” a ti.

¹¹ Churawhchun, Balak nih Balaam sinah, “Zeitin kha hâwi na hawng ka ti zia? Ka mêlma tla siatbarh ding hen hinah ka nan hawngpi le, sikhawmsele na ti mi zawzawng an rangah malsâwmnâk hep asi,” a ti.

¹² Anih nih a sâng le, “LALPA nih sim ding hen hawng ka simh mi cho ka sim kho,” a ti.

Balaam Thusim Veinihnâk

¹³ Churawhchun, Balak nih Balaam sinah, “Mun dangah ka sinah hawng rih, chu thawk chun Israel zeimaw zat ding na muh kho lai. Chu thawk hen chun siat hawng ka barh piak,” a ti.

¹⁴ Zophin phâisen leiah mi Pisgah Tlâng tlûnah a kalpi. Chunah khawm chun mâichâm pasarih a siam le, mâichâm kip ah dawrâ chal pakhat leh chawchal pakhat a ap.

¹⁵ Balaam nih Balak sinah, “Hinah na duahphung thil ap kiangah dîr le, kei Pathian hen a tawng ding hen tlûn leiah ka va kal lai,” a ti.

¹⁶ LALPA chu Balaam hen anna tawng le, sim ding mi thu chu a simh le, Balak sinah a thuchah chu sim ding hen a kîrtir nawlh.

¹⁷ Churawhchun, a va kîr le, Balak chu a duahphung thil ap kiangah Moab ruitu tla hen dîr hen a muh na. Balak nih LALPA nih thu a sim mi chu a deih le,

¹⁸ Balaam nih hi thu hi a sim: “Zipor fapa Balak, hawng le, Ka sim ding mi thu hi ngâi rawh.

¹⁹ Pathian chu minung hâwi hen âwkrâwl thusim mi asi lo; Minung hâwi hen thinlung dang lemang mi asi lo. Thu a tiamh rawh mi chu a ti vima; A sim mi chu a ti ngelchel.

²⁰ Malsâwm ding hen simh kasi, Pathian nih mal a sâwm mi chu kei nih ka lêt kho lo.

²¹ Israel tla nih mâilei ah vânduainâk Leh nawknâk an tawng lo ding mi ka muhkanh asi. LALPA an Pathian chu an sinah a um le; An lalchem asi ti an phuang.

²² Aigupta ram ah mi Pathian nih a suakpi na le; An rangah mâng chawchal hâwi hen a do piak na.

²³ Israel phun do ding hen dâwi Leh mitleh dâwi mang kho mi a um lo. Tuah Israel tla thu ah zapi tla nih, ‘Pathian nih a ti mi chu zauhnik u!’ an ti lai.

²⁴ Israel phun tla chu chakeibaknei chak tak hâwi an si: A thlêr dip le, râwk dep hen, A thah na mi tla thî a din lânlo chu â dîn lo,” a ti.

²⁵ Churawhchun, Balak nih Balaam sinah, “Israel mi zapi tla siat na barh duh na lo, sikhawmsele mal lam chu sâwm rerêng lah na!” a ti.

²⁶ Balaam nih a sâng le, “LALPA nih hawng ka simh mi chu ka ,ti kho ka nan ti si lo ma?” a ti.

Balaam Thusim Veithumnâk

²⁷ Balak nih, “Ka sinah hawng rih, mun dangah kan kalpi nawlh lai rih. Chu thawk hen chun Pathian nih ka rangah anmah siatbarh na ding hen a nan siang lai mawh,” a ti.

²⁸ Churawhchun, Balaam chu ramkaro chuanhnâk Peor Tlâng tlûnah a kalpi rawh.

²⁹ Balaam nih a sinah, “Mâichâm pasarih hinah ka rangah hawng ka siam piak le, chawchal pasarih leh dawrâ chal pasarih hawng put,” a ti.

³⁰ Balak nih chun a sim hâwi hen a ti le, mâichâm kip ah chawchal pasarih leh dawrâ chal pasarih a ap rawh.