NUMBER 22 - Bawm Common Language Bible Version

Moab Lalchem Nih Balaam Kawh Ding Hen Mi A Fial

¹ Israel mi tla chu anna ṭhial le, Moab phâi Jordan Va saklei ah Jeriko zâwnah mun an khuar.

² Moab lalchem Zipor fapa Balak nih chun Israel tla nih Amor lakah an thilti dân leh an tam dân a theih le,

³ amah leh a mi tla thungâi an lâu.

⁴ Moab mi nih Midian ruitu tla sinah, “Hi murui tla nih hin chawchal nih belh no a ei hâwi hen kan kiangkam mi thil zawzawng an râwk ver awt,” an ti.

⁵ Churawhchun, lalchem Balak nih Amaw ram Eufretis Tiva kiangah Pethor khua ah um mi Beor fapa Balaam sinah mi a fial. Balak thawk hen hi thu hi an hawng tlunh: “Aigupta ram thawk hen phun khat an hawng le, mun kip an khat dil le, kan ram an lâk ver lai ti ṭihnung an kâi zia theih ding hen ka nan duh.

⁶ An minung chu kanmah ngâk hen an tam, churuangah hawng le siat hawng barh na. Chu hâwi hen kan neh na hen ram lakah mi kan nar kho lai dahmawh. Mal na sâwm na mi chu malsâwm hen an um le, siat na barh na mi chu siat ting hen an um ti ka theih,” a ti.

⁷ Churawhchun, Moab mi leh Midian mi ruitu tla chu siatbarh man put hen Balaam sinah an kal le, Balak thuchah tla an simh.

⁸ Balaam nih an sinah, “Tuzân chu hinah riak ko u, thâizîng ah LALPA nih thu a ka simh mi chu kan simh na lai,” a ti. Churawhchun, Moab mi ruitu tla chu Balaam sinah an riak rawh.

⁹ Pathian chu Balaam sinah a hawng le, “Âu me na sinah riak mi tla hi?” a ti.

¹⁰ Anih nih a sâng le, “Moab lalchem Balak nih

¹¹ Aigupta ram thawk hen hawng mi tla nih ram pumpi an luah hep ti thu hawng ka simh ding hen a hawng fial na mi asi. Nar ding leh neh kho ding hen anmah tla siatbarh ding hen a hawng ka duh asi,” a ti.

¹² Pathian nih Balaam sinah, “Hi minung tla hi zûl lah na, Israel mi tla khawm siatbarh lah na, keimah malsâwmnâk tingtu tla an si,” a ti.

¹³ A thâituan chun Balaam chu Balak mifial tla sinah a va kal le, “In leiah tlung ko u, LALPA nih nan sinah kal ding hawng ka siang lo,” a ti.

¹⁴ Churawhchun, Balak sinah an kîr le, Balaam an sinah a kal duh lo mi thu an simh.

¹⁵ Balak nih ruitu tam dauh a fial le, a lân mi ngâk hen mi pawiherh dauh tla an si.

¹⁶ Balaam sinah Balak thuchah chu an sim: “Zângfahtê hen ka sinah na hawng ding mi hi zeikhawm a khamtir lah.

¹⁷ Lâwmman cherkhet kan pêk lai le, na sim mi zawng kan ti piak lai. Zângfahtê hen hawng le, hi zapi minung tla hi siat hawng ka barh piak ko,” a ti.

¹⁸ Sikhawmsele Balaam nih, “Balak nih ngûn tangka a in ah a nei mi zawzawng hawng ka pêk khawmsele thil mêchem lak khawm ah ka LALPA thupêk ka êl kho lai lo.

¹⁹ Sikhawmsele, ni dang mi tla hâwi hen riak ko ule, LALPA nih kâng dang hen thil zeimawh hawng ka simh lai mawh,” a ti.

²⁰ Chu zânah chun Pathian chu Balaam sinah a hawng le, “Hi minung tla nih an sinah kal ding an ngiar chun, a tîm ko, khawmsele, ka nan simh mi cho ti rawh,” a ti.

²¹ Thâizîng ah chun Balaam nih a sanatung chu a timhtuah le, Moab mi ruitu tla sinah a kal bâk rawh.

Balaam Leh A Sanatung

²² Balaam chu sanatung tlûnah â chuan hen a kal mi chu Pathian a thinrun, a to-aw panih nih an zûl le, LALPA vânmifial nih a lampi ah dîr hen lam a kham piak.

²³ Sanatung nih vânmifial nâmsâu put hen a dîr mi a muh rawh chun lampi mi chu phâisen leiah a pial. Balaam nih a sanatung chu a vuak le, lampi leiah a kîrpi.

²⁴ Churawhchun, vânmifial chu lam bîtnâk grep zûn panih karah, lung pang um vevê mi karah a dîr.

²⁵ Sanatung nih vânmifial chu a muh le, dâi tlûnlei ah â lawk le, Balaam kê a rûn. Balaam nih sanatung chu a vuak nawlh.

²⁶ Vânmifial chu â ṭhial nawlh le, rialnâk umlo thlonâk a bîtênâk ah a dîr piak nawlh.

²⁷ Chu liauah sanatung nih vânmifial a muh rawh chun a bawk thlo. Balaam nih a ti ding dân a theih lo rawh le, sanatung chu a ṭhianṭhunh hen a vuak fâwn.

²⁸ Churawhchun, LALPA nih sanatung chu hawlh khonâk a pêk le, Balaam sinah, “Zeitin kan ti, veithum bo na ka vuak zia?” a ti.

²⁹ Balaam nih a sâng le, “Mi â ah na hawng ka ruat mi lebang, nâmsâu put sele, kan thah lai,” a ti.

³⁰ Sanatung nih a sâng le, “Zeiliau zawng ah na chuannâk sanatung nget kha kasi lo ma? A lânah hi hâwi hen kan ti dah rawh ma?” a ti. Balaam nih, “Na ti dahlo,” a ti.

³¹ Churawhchun, LALPA nih Balaam chu vânmifial nâmsâu put bû hen a dîr mi a muhtir le; churawhchun Balaam chu tual lei hawi hen a kûn rawh.

³² Vânmifial nih, “Zei rangah kha hâwi hen na sanatung veithum na vuak? Na khualtlâwngnâk lampi kham ding hen ka hawng mi asi lo ma?

³³ Na sanatung nih hawng ka muh le, veithum pial ding a awt. Chu hâwi si lah sele sanatung zuah hen nangmah ka nan thah ding mi,” a ti.

³⁴ Balaam nih a sâng le, “Ka sual ngâk, ka lampi kham hen na dîr mi ka theih lo mi lebang; sikhawmsele tuah nangmah nih kal ding a diklo na ti chun in leiah ka kîr nawlh ko lai,” a ti.

³⁵ Sikhawmsele vânmifial nih, “Hi minung tla sinah kal ko, sikhawmsele sim ka nan ti mi cho sim,” a ti. Churawhchun, Balaam chu an sinah a kal bâk rawh.

Balak Nih Balaam A Dawngnâk

³⁶ Balak nih Balaam a hawng ti a theih rawh chun Moab ramri Arnon Tiva ah mi Ar khuapi ah a tawng ding hen a va kal.

³⁷ Balak nih a sinah, “A tîrah kan kawh liauah zeirang na hawng lo zia? Lâwmman tam tâwk pêk kho lo ding hen ma na hawng ka ruat?” a ti.

³⁸ Balaam nih a sâng le, “Ka hawng mi hi keimah duh thu mazei? Sikhawmsele, tuah zei thiltikhonâk me ka nei? Pathian nih sim ding hen hawng ka simh mi cho ka sim kho,” a ti.

³⁹ Churawhchun, Balaam chu Balak hen Huzoth khuapi ah an kal le,

⁴⁰ chu khua ah chun ranrual dawrâ tla thah hen Balaam leh a sinah ruitu kaltu tla chu buh an pêk na rawh.

Balaam Thusim Veikhatnâk

⁴¹ A thâituan ah chun Balaam chu Balak nih Bamoth Baal ah Israel mi tla muh khonâk ah a kâipi rawh.