NUMBER 18 - Bawm Common Language Bible Version

Bâwlpu Leh Levi Tla Rianṭuan

¹ LALPA nih Aron sinah “Nang leh na fapa tla leh Levi tla nih ka umnâk Puanin lakah rianṭuan leikâng palhnâk, a mawh chu nanmah tuar ding asi, sikhawmsele nang leh na fapa tla cho nih bâwlpu sinâk rianṭuan lakah chun nan tuar lai.

² Na fapa tla leh nangnih Puanin ah rian nan ṭuan liauah ṭuan ding leh an bawmh natu ding hen na unau Levi chi tla chu kalpi na.

³ An rianṭuan ding leh Puanin ah an mawhphurhnâk chu tling tak hen an ti ding asi, sikhawmsele, mâichâm leh Mun Thenhlimh ah thil thenhlimh tla chu an tawngh ding asi lo. An tawngh chun nang leh annih tla chu thah ding nan si lai.

⁴ Puanin ah an mawhphurhnâk rianṭuan zawzawng chu tling tak hen an ṭuan ding asi, sikhawmsele, ti kho lo ding mi minung chu na sinah an ṭuan ding asi lo.

⁵ Nang leh na fapa tla lâwng nih Mun Thenhlimh leh mâichâm lakah mawhphurhnâk chu nan ti kho lai, chu tikah ka thinthawknâk chu Israel mi zapi tlûnah a tlung nawlh lai lo rawh.

⁶ Na unau Levi tla Israel phun lakah mi nan sinah thilpêk siding thîmtu chu kasi. Ka sinah ap an si rawh le, churuangah Puanin lakah an rianṭuan chu an ti kho lai.

⁷ Sikhawmsele, nang leh na fapa tla lâwng nih bâwlpu mawhphurhnâk zawzawng mâichâm ah leh Mun Thenhlimh chem ah um mi tla chu nan ti kho lai. Bâwlpu sinâk ka nan pêk na ruangah hi bang thil tla hi nan mawhphurhnâk ding mi tla chu asi. Tawngh kholotu ding mi minung thil thenhlimh kiangah a hawng kaltu chu thah ding asi,” a ti.

Bâwlpu Tla Tingvo

⁸ LALPA nih Aron sinah, “Thawhlâwm a bîk hen ka sinah pêk mi zawzawng bâwlnâk ah duah lo mi chu ka nan pêk na mi asi ti theihkumza u. Nan thlâk leh nanmah rangah nan vo si kumza ding hen kan pêk na mi asi.

⁹ Thil thenhlimh ap hen mâichâm ah duah lo mi vial chu nan tâ asi: fâng thil ap, sual thil ap leh rulhnâk thil ap tla hi. Thil thenhlimh ka sinah pêk mi zawzawng chu nang leh na fapa tla tâ asi.

¹⁰ Hi bang thil tla hi mun thenhlimh ah nan ei lai le, mipa cho nih an ei kho lai, thil thenhlimh ah ngaih u.

¹¹ “Chu lo khawm ah, thil dang a bîk hen thawhlâwm Israel fa le nih ka sinah an hawng pêk mi chu nan tâ asi lai. Zeiliau zawng ah nang, na fapa leh na fanu tla rangah ka nan pêk na mi asi. Nan dâwngsungkhur lakah dân hen thenhlimh mi vial nih an ei kho lai.

¹² “Israel mi tla nih thil suak masa a ṭha chem mi zawzawng kum siar an hawng ka pêk mi oliv sariak, uain leh fâng tla chu ka nan pêk na asi.

¹³ Nan tâ hep asi. Nan dâwngsungkhur lakah dân hâwi hen a thenhlimh mi vial nih an ei kho lai.

¹⁴ “Thil zeizawng Israel tla nih a san umlo hen an ap mi chu nan tâ asi.

¹⁵ “Minung mawh ran mawh fa tîr Israel mi tla nih an ka pêk mi chu nan tâ asi. Sikhawmsele fa tîr minung lakah mi khawm ran lakah mi khawm dân hâwi a thenhlimh lo mi fa tîr chu tlanh nawlh kho asi lai.

¹⁶ Ngâksia tla thla khat mi chu dân hâwi hen a man zat tangka ngâ ruat hen tlanh ding asi.

¹⁷ Sikhawmsele, chaw, dawrâ leh kêl lakah mi fa tîr chu tlanh nawlh ding asi lo; ka tâ hep an si le, bâwlnâk ah mang ding asi. An thî tla mâichâm ah theh hen, a rim nih hawng ka lawmhtir ding hen an thâu chu eiphung thil ap rangah duah ding asi.

¹⁸ An sâ tla chu nan vo asi, a bîk hen thil ap lakah a î-âwm leh a vawrhlei kevâng nanna ting mi hâwi hen.

¹⁹ “Israel tla nih a bîk hen ka sinah thawhlâwm an hawng pêk mi chu zeiliau zawng ah nanmah, nan fanu leh nan fapa tla rangah kan pêk na asi. Hi hi nanmah leh nan thlâk tla rangah thudântuk râwk kho lo ka siam mi chu asi,” a ti.

²⁰ LALPA nih Aron sinah “Israel tla lakah ro ting ding leh ram tingvo zeikhawm nan nei ding asi lo. Kei, LALPA hi nan herhnâk zawzawng rang ding ah nan vo kasi,” a ti.

Levi Tla Tingvo

²¹ LALPA nih, “Israel mi tla nih parâ lû ah pakhat an ka pêk mi vial chu Levi tla rangah ka pêk na. Hi hi ka umnâk Puanin zauhkhenhnâk rian an ṭuan mi man ah pêk mi chu asi.

²² Israel lakah midang tla nih anmah thihnâk ding rêpnâk tlungtir ding hen Puanin leiah an kal ding asi lo.

²³ Tu thawk hen zeiliau zawng ah Levi tla cho nih Puanin kilkâwi leh a mawhphurhnâk pumpi anna ting ding asi. Hi hi nan thlâk tla rang khawm ah dân um kumza ding mi chu asi. Levi tla nih thil nei pawt ding zeikhawm Israel lakah an nei ding asi lo,

²⁴ Israel tla nih thawhlâwm a bîk hen parâ lû ah pakhat an hawng ka pêk mi chu an tâ siding hen ka pêk na ruangah. Churuangah asi, Israel lakah zei thil khawm ting pawt ding hen nei lah u kan ti na mi chu,” a ti.

Levi Tla Nih Parâ Lû Ah Pakhat An Pêk Mi

²⁵ LALPA nih Mosi chu

²⁶ Levi tla sinah sim ding hen thu a pêk: “Israel tla thawk hen parâ lû ah pakhat nanna ting ding hen LALPA nih a nan pêk na mi chu LALPA rangah a bîk hen thawhlâwm parâ lû ah pakhat nan pêk bâk ding asi.

²⁷ Hi a bîk hen thawhlâwm hi, lo neitu nih fâng thar leh uain thar a ap mi tluk hen ngaih ding asi.

²⁸ Hi hâwi hen Israel mi tla lakah nanna ting mi parâ lû ah pakhat zawzawng chu LALPA rangah a bîk a thawhlâwm ah nan pêk bâk ding asi. Hi a bîk hen thawhlâwm LALPA rang ding mi hi Aron bâwlpu rangah nan pêk ding asi.

²⁹ Nan tawng mi lakah a ṭha chem mi pêk u.

³⁰ A ṭha chem mi tla nan pêk tikah, lo neitu nih a thil ap a ap nûnah a dang vial chu â ting hâwi hen a dang vial chu nanna ting kho lai.

³¹ A dang vial chu nang leh na dâwngsung tla nih zei mun zawng ah an ei kho, Puanin ah nan rianṭuan man asi ruangah.

³² LALPA sinah a ṭha chem mi nan pêk kar zawzawng chu ei khawm ule, mawhnâk zeikhawm a um lai lo. Sikhawmsele Israel mi tla thilpêk thenhlimh chu a ṭha chem mi ap lânah ei hen nawmh ding asi lo ti theih u; nan nawmh chun thah nan si lai,” a ti