NUMBER 16 - Bawm Common Language Bible Version

Korah, Dathan Leh Abiram Helnâk

^1-2 Kohat thlâk, Levi phun ah mi Izhar fapa Korah chu Mosi tlûnah hel a tum. Reuben phun a mi minung pathum nih an hawng bawp, Eliab fapa tla Dathan leh Abiram, Peleth fapa On leh Israel mi a dang 250, chubang tla chu zapi tla nih ruitu ah an thîm na mi minthang tla an si.

³ Mosi leh Aron mâikâ ah an va a pûm le, “Nan leiluat tuk! zapi minung zawng chu LALPA tâ hep an si, kan ektê sinah LALPA a um. Chu hâwi mi lakah, zei rangah nang Mosi hi, LALPA mi tla lakah chungnung khun hen na ngaih,” an ti.

⁴ Chu chu Mosi nih a theih rawh chun, tual ah â lawnh tlak le, thla a cham.

⁵ Korah leh a murui tla sinah, “Thâizîng ah LALPA nih a tâ ding mi chu âu asi awt a hawng langh lai; amah tâ ding mi tak chu a hawng ruat lai, chu minung tak chu a mâichâm ah rianṭuantu ding ah a thîm mi chu asi lai.

^6-7 Thâizîng chu nang leh na murui tla hen mei khêng lâk ule, meiṭil siah ule, rimthâw phulh u, mâichâm leiah kalpi u. Chu tikah LALPA nih kan lakah a thîm mi chu kan muh lai. Nanmah Levi chi tla tak kha nan leiluat mi chu,” a ti.

⁸ Mosi nih Korah sinah thu a sim vima. “Ngâi u, nannih Levi tla!

⁹ LALPA Puanin ah rianṭuan hen amah nan va naih kho ding hen leh mi zapi tla rangah rian nan ṭuan piak na ding hen, Israel Pathian nih mi zapi lakah mi a dang ê hen an thlei na mi hi thil metê ah ma nan ruat?

¹⁰ Nannih leh Levi chi dang tla khawm zahkâi tak hen a nan siam na mi lakah, tuah bâwlpu rian khawm ting ding nanna tîm fâwn rih!

¹¹ Aron lakah nan chipchiar mi chu nang leh na murui tla nih hel hen LALPA nan do mi asi,” a ti.

¹² Churawh chun Mosi nih Dathan leh Abiram chu a kawhtir na, sikhawmsele “Kan hawng ding asi lo an ti;

¹³ Aigupta ram ṭha lakah mi hinah ramkaro ah thah ding hen na kan put mi hi a tâwk ko lo ma? Kan tlûnah lal ding hen ma na tum?

¹⁴ Ram ṭhatnâk ah na kan kalpi hen phâisen leh grep zûn tla ting ding hen na kan pêk mi asi lo, tuah perpet ding na kan tum mi asi. Kan hawng awt rîlmâl lo!” an ti.

¹⁵ Mosi chu a rothawk le, LALPA sinah, “Hi minung tla thil ap hi pawm lah rawh. An lakah zeikhawm ka sual mi a um lo; an sanatung pakhat tê khawm ka lâk lo,” a ti.

¹⁶ Mosi nih Korah sinah, “Thâi ah nang leh na murui 250 hen LALPA umnâk Puanin ah nan hawng ding asi; Aron khawm chunah a hawng bâk lai.

¹⁷ Mi kip nih nan mei khêng nanna put chiau lai le, rimthâw nan phulh lai le, churawh chun mâichâm ah nan pêk lai,” a ti.

¹⁸ Churawh chun mi kip nih an mei khêng an lâk le, a tlûnah meiṭil an siah le, rimthâw an phulh, Mosi leh Aron sinah Puanin kawtkâ ah an va dîr.

¹⁹ Churawh chun, Korah nih mi zapi a pumh na le, Mosi leh Aron lei hawi hen Puanin kawtkâ ah an va dîr. Lâkkhatko ah zapi lakah LALPA chêu a hawng lang le,

²⁰ LALPA nih Mosi leh Aron sinah,

²¹ “Kha minung tla lakah mi kha a dang hen dunglei kângah dîr u, ka hawng veih sawm na awt hi,” a ti.

²² Sikhawmsele Mosi leh Aron chu an mêl tual lei hawih hen an kûn le, “Pathian, nang chu nungnâk bul zawzawng na si. Minung pakhat sual ruangah zapi minung tlûnah na rothawk na maw?” an ti.

²³ LALPA nih Mosi sinah

²⁴ “Zapi tla kha Korah, Dathan leh Abiram puanin tla thawk hen a ṭhial ding hen simh na u,” a ti.

²⁵ Mosi chu Israel ruitu tla hen Dathan leh Abiram sinah an kal.

²⁶ Mosi nih zapi tla sinah, “Kha misual tla puanin thawk hen a ṭhial ving ule; an neih tla zeikhawm tawngh lah u. Chu hâwi asi lo chun, an sualnâk ruangah an sinah veih sih hen nan um lebang lai,” a ti.

²⁷ Churawh chun, Korah, Dathan leh Abiram puanin kiangah mi chu anna ṭhial rawh. Dathan leh Abiram chu an hawng suak le, an nupi leh an fa tla hen an puanin tualmâi ah an dîr.

²⁸ Mosi nih zapi sinah, “Hi bang thil tla zawzawng hi LALPA nih ti ding hen hawng ka fial mi asi, keimah thu hen ka ti mi asi lo ti nan theih lai.

²⁹ Hi minung tla hi Pathian rêpnâk ruang silo hen thih dân salam hen an thi mi asi chun, kei hi LALPA fial mi kasi lai lo.

³⁰ Sikhawmsele LALPA nih theih lo mi thil a ti mi asi chun tual hawng a sêu sele, an neih zawzawng hen dawlh hep na seh, churawh chun a nung hen laikulh thihnâk ah an kal mi asi lai le, chu minung tla nih LALPA an duh lo ti nan theih lai,” a ti.

³¹ Chu thusim chu a lîm kâ hen, Dathan leh Abiram umnâk tang tual chu â sêu phawk le,

³² an dâwngsung tla leh Korah leiah tângtawmtu leh an neih zawzawng a dawlh hep na.

³³ Churawh chun, an thil neih tla hen laikulh thihnâk ah a nung hen an kal rawh. An tlûnlei tual chu a hawng a chîp pang le, an vei rawh.

³⁴ Israel mi chun ah um mi tla zawzawng nih an râk hâu an theih le an tek. “Tek u! Tual nih hawng kan dawlh bâk lai!” ti hen an âu.

³⁵ Churawh chun, LALPA nih mei a hawng fial le, rimthâw pêktu minung 250 chu a khangh hep na.

Mei Khêng Tla

³⁶ Chun, LALPA nih Mosi sinah,

³⁷ “Aron fapa Eleazar bâwlpu chu dâr meikhêng mei nih a khangh na mi sinah mi kha ṭhial ding hen simh, khêng lakah mi meihawl kha zei mun ah mawh lawnh na sele, meikhêng tla chu â thenhlimh ruangah.

³⁸ LALPA mâichâm ah an hawng pêk liauah a thenhlimh asi. Churuangah an sual ruangah an thi mi tla meikhêng chu lâk ule, khêng pan der ah dêng u, mâichâm khuhnâk ah siam u. Israel mi tla rangah theihtirnâk ding asi lai,” a ti.

³⁹ Churawh chun bâwlpu Eleazar nih meikhêng chu a lâk le, mâichâm khuhnâk rangah pan der hen a dêng.

⁴⁰ Hi hi Israel mi rangah âukhawm Aron thlâk silo mi nih chun LALPA rangah rimthâw duah ding hen mâichâm ah an kal ding asi lo ti theihtirnâk asi. Chu lo chun Korah leh a minung tla hâwi hen an vei lai. Hi bang zawng tla hi LALPA nih Mosi mang hen Eleazar rangah thu a pêk mi asi.

Aron Nih Mi Zapi A Hum Na

⁴¹ A thâituan chun, zapi minung tla chu Mosi leh Aron tlûnah an chipchiar, “LALPA minung zeimaw zat chu nan thah na asi,” an ti.

⁴² Mosi leh Aron êl ding hen an ektê hen an hawng a pûm nûnah, Puanin leikângah anna hawi le, sûm nih a khuh mi leh LALPA umnâk chêu mit ser rê a hawng lang mi chu an muh rawh.

⁴³ Mosi leh Aron chu an va kal le Puanin mâi ah an dîr.

⁴⁴ LALPA nih Mosi sinah,

⁴⁵ “Hi minung tla sinah mi hi dunglei kângah a ṭhial u, kha munah khan ka veih na awt asi!” a ti. An lakah minung panih chu tual leiah an buk le,

⁴⁶ Mosi nih Aron sinah, “Na meikhêng kha put le, mâichâm ah mi meiṭil kha siah le, chu meiṭil lakah chun rimthâw phulh. Chu hen chun mawhsareh hen zapi minung sinah kal le, an rangah dân hâwi hen thenhlimhnâk siam piak na. Mawhsareh hen kal! LALPA thinthawknâk chu a hawng tlung taktê rawh; râi vei khawm anna dawmh rawh,” a ti.

⁴⁷ Aron chu â êt le, meikhêng a lâk le, zapi lâiah a va tek rawh, râi a lêng mi â dawmh mi a muh le, rimthâw chu meiṭil lakah a phulh le, dân hâwi hen mi zapi rangah thenhlimhnâk a siam.

⁴⁸ Hi nih hin râi chu a rehtir le, a thi mi leh a nung mi karah a dîr rawh.

⁴⁹ Mi zapi an thi mi zat chu 14,700, Korah helnâk ah thi mi tla rêl sih lo hen.

⁵⁰ Râi a hawng a dîn rawh chun Aron chu Puanin tualmâi leiah Mosi sinah a kîr rawh.