NUMBER 15 - Bawm Common Language Bible Version

Bâwlnâk Thu Ah Dân Tla

¹ LALPA nih Mosi sinah

² Israel mi tla rangah a pêk na ding mi ram ah an mang ding hen hi bang dân tla hi a pêk na.

³ Chawchal, dawrâ chal, dawrâ mawh kêl mawh LALPA sinah duahphung thil ap mawh, thutiam lîm bâwlnâk mawh, mah duh thu hen thil ap mawh, nan phung kût nan nei kumza mi thil ap rangah mawh nan pêk kho; chubang hâwi eiphung thil ap rim nih LALPA a lawmhtir.

^4-5 Âuzawng nih kêl mawh, dawrâ LALPA sinah duahphung thil ap a hawng pêk chun ran ap mi kip ah sangvut kilogramme khat oliv sariak litre khat hen chawmh mi fâng ap mi uain litre khat hen a hawng put ding asi.

⁶ Dawrâ chal ap liauah sangvut kilogramme nih oliv sariak litre khat leh tan hen chawmh mi chu fâng ap mi

⁷ uain litre khat leh tan hen pêk ding asi.

⁸ Chawchal, LALPA sinah duahphung thil ap mawh thutiam lîmnâk ding hen bâwlnâk mawh, kawmhnâk thil ap,

⁹ fâng ap mi ap liauah sangvut kilogramme thum oliv sariak litre nih hen chawmh mi

¹⁰ uain litre nih hen pêk ding asi. Hi bâwlnâk rim nih hin LALPA chu a lawmhtir asi.

¹¹ Chu chu chawchal, dawrâ chal, dawrâ mawh kêl ap mi kip lakah pêk ding mi chu asi.

¹² Ran ap mi pakhat ngâk a tam ap asi chun, telhsih mi a zo tâwk hen a tam bâk ding asi.

¹³ A ram mi Israel tla kip nih eiphung thil ap an ap chun hi hi an ti ding asi, chu rim nih LALPA a lawmhtir asi.

¹⁴ Zeiliau zawng ah ramdang minung nan sinah um mi mawh, um salam mi mawh, um pawt mi mawh nih eiphung thil ap LALPA lawmhtir ding hen a siam chun hi dân hâwitê hen a ti ding asi.

¹⁵ Zeiliau zawng ah ramdang minung nan lakah um mi hen dân bang cho hen nan mang ding asi. LALPA mitmuh ah annih leh nannih chu nanna bang cho asi.

¹⁶ Chu dân chu an sinah leh nan sinah bang cho hen mang asi.

¹⁷ LALPA nih Mosi sinah

¹⁸ Israel mi rangah ram a pêk na ding mi ah mang ding hen dân tla a pêk.

¹⁹ Zei fâng tal chunah a hawng suak hen ei mi tla chu LALPA sinah thawhlâwm rang bîk ah zeimaw zat ding chu siah ding asi.

²⁰ Sang nan em chun nan fa thar lakah sang tlang masa chem mi chu LALPA sinah thawhlâwm rang ding ah a bîk hen nan pêk ding asi. Hi hi fâng nan khâwng mi lakah thawhlâwm a bîk a nan pêk mi hâwi hen bang cho nan pêk ding asi.

²¹ Zeiliau zawng ah sang nan em mi chu LALPA sinah a bîk hen nan pêk kumza ding asi.

²² Sikhawmsele, mi zeimaw mi nih hi bang dân tla LALPA nih Mosi sinah a pêk mi chu ruat lo tak hen an palh kho.

²³ Zapi minung khawm nih hi nûnthâi ah LALPA nih Mosi mang hen thu a pêk mi lakah an palh kho.

²⁴ Mi zapi nih an theihthiam lo ruangah palhnâk an nei chun, chawchal hen duahphung thil ap an pêk lai le, fâng ap mi leh uain ap mi rim nih LALPA a lawmhtir asi. Chu lo khawm ah, a dang kêl chal sual thil ap rangah an ap ding asi.

²⁵ Tum ruang silo hen palh mi chu an sual thil ap chu eiphung thil ap hâwi hen LALPA sinah an put lai le, bâwlpu nih mi zapi rangah dân hâwi hen thiangnâk a siam lai le, ngaihdam an si lai rawh.

²⁶ Mi kip nih thilsual an ti rawh ruangah Israel mi zawzawng leh ramdang minung an sinah um mi tla khawm ngaihdam an si lai rawh.

²⁷ Mi nih tumnâk ruang silo hen a sual mi chu kêl nunau kum khat mi sual thil ap ah a ap ding asi.

²⁸ Mâichâm ah bâwlpu nih chu minung pa rangah dân hen thiangnâk a siam lai le, ngaihdam asi lai rawh.

²⁹ A ram mi Israel tla mawh, ramdang minung um bâk mi mawh tum mi silo hen sualtu zawng chu dân bang khap hen an mang ding asi.

³⁰ Sikhawmsele, zei minung tal a sual êu mi chu, a ram mi mawh ramdang mi mawh khawm si seh, LALPA nehsawhtu leh zauhnawmhtu asi.

³¹ LALPA nih a sim mi a êl le, a thupêk a buar ruangah thah ding asi. A thihnâk chu amah mawh asi.

Dinhni Buartu

³² Veikhat chu Israel tla ramkaro ah an um liauah minung pakhat Dinhni ah thing khawmh hen an muh.

³³ Mosi leh Aron leh zapi sinah an kalpi le,

³⁴ vêngtu sinah an siah, zeitin ti ding ti â thei lo rih ruangah.

³⁵ Churawhchun, LALPA nih Mosi sinah, “Chu minung chu riakmun lênglei ah zapi minung nih lung hen thi thlo an seh ding asi,” a ti.

³⁶ Churawhchun, zapi tla nih riakmun lênglei ah an kalpi le, LALPA thupêk hâwi hen lung hen thi thlo hen an seh.

Puânsar Thlaih Mi Thu Ah Dân Tla

³⁷ LALPA nih Mosi chu

³⁸ Israel tla simh na ding hen thu a pêk: “Nan nipuan kî ah a sâr thlaih siam ule, a sâr thlaih lak kip ah larual dumpâwl mi nan thlaih ding asi. Hi hi zeiliau zawng ah nan ti kumza ding asi.

³⁹ Chu puan sâr thlaih chu nan zauh kip ah ka thupêk zawzawng zûl hen; ka sinah mi kâng dang lei pial lo hen nan thinlung duhnâk leikâng zawh lo hen nan um ding asi ti theihnâk asi.

⁴⁰ Chu puan sâr thlaih nih chun ka thupêk zawzawng nan zûl ding mi leh keimah tâ tak nan si rawh ti an theihtir na lai.

⁴¹ Kei, LALPA nan Pathian, nan Pathian siding hen Aigupta ram ah mi an suakpi natu kasi. Kei, LALPA chu kasi,” a ti.