NUMBER 14 - Bawm Common Language Bible Version

Mi Zapi Tla An Chipchiar

¹ Mi zapi chu zân khuadei ver hen lawksawng hen an âu.

² Aron leh Mosi tlûnah an lungsilo le, “Hinah ramkaro ah mawh, Aigupta ram ah khan mawh thi ving sele a ṭha dauh ding mi!

³ Zei rangah LALPA nih chu ram leiah hawng kan kalpi êu me? Râltuknâk ah kan thi lai le, kan nupi leh kan fa tla chu râl nih an tleih hep na ding ko rawh. Aigupta leiah kîr ving sele a ṭha dauh awtlo ma?” an ti.

⁴ Churawhchun, “Ruitu thîm hen Aigupta ram leiah kan kîr nawlh ko lai!” ti hen anna sâwn.

⁵ Churawhchun, Mosi leh Aron chu mi zapi zawzawng mâika ah an buk thlo.

⁶ Churawhchun, Josua, Nun fapa leh Kaleb Jephuneh fapa, zauh thlingthlâk kal mi panih nih chun an ngaih a sia tuk le, an nipuan an thlêk le,

⁷ mi zapi sinah, “Ram kan va zauh mi chu ram ṭha tak asi.

⁸ LALPA thinlung tawngtu kan si chun chunah hawng kan kalpi lai le, neihnâk leh ram ṭha chu hawng kan pêk lai.

⁹ LALPA tlûnah hel lah ule, chu ram ah um mi tla khawm ṭih lah na u. Awl tak hen kan neh na lai. LALPA kan sinah a um asi, anmah vêngtu pathian tla chu a neh rawh; churuangah ṭih rîlmâl lah u,” an ti.

¹⁰ Mi zapi zawng tla nih lung hen thi thlo seh na ding hen an ṭhih na le, sikhawmsele lâkkhat ko ah zapi tla nih LALPA umnâk Puanin tlûnah chêu a hawng lang mi an muh.

Mosi Nih Mi Zapi Rangah Thla A Cham

¹¹ LALPA nih Mosi sinah, “Zeitiang rêmruam me, hi zapi tla nih an hawng ka nawng awt? Zeitiang rêmruam me, an lakah thilchê tam tak ka ti khawm ah an ka zumh lo awt?

¹² Râi ka tlungtir lai le ka veih dep na awt, sikhawmsele nang hi anmah ngâk hen tam dauh leh thiltikho dauh phun pa rangah kan siam lai,” a ti.

¹³ Sikhawmsele Mosi nih LALPA sinah, “Hi zapi tla hi Aigupta mi na thiltikhonâk hen na hawng suakpi na. Aigupta mi tla nih na mi le tla lakah na thilti an theih tikah,

¹⁴ hi ram ah um mi tla hi an simh na lai. Hi bang mi zapi tla nih nang, LALPA, kan sinah na um mi tla, na sûm kan tlûn leiah fiang tak hen a lang mi tla, kan mâilei ah sûn ah chun sûm dîr, zân ah chun mei hen na kal mi tla an muh hen an theih ver rawh.

¹⁵ Tuah na mi tla na thah hep na chun, na min thang zia theihtu phun tla nih pêk ding hen ram a tiamh na mi

¹⁶ leiah a kalpi kho na lo le, ramkaro ah a thah hep na an ti lai.

¹⁷ Churuangah tuah LALPA, na thiltikhonâk hawng kan muhtir hen, thu na kan tiamh mi khawm

¹⁸ ‘Kei, LALPA mi nunfual kasi, mi hel tla lakah zângfahnâk rokual leh sual ngaihdamtu ding hen mi zumhkâi kasi, na ti asi lo ma?’ An nu leh an pa sual ruangah an tu leh an fa tla san thum leh san linâk tiang hen ka rêp na awt ti rawh khawm le;

¹⁹ LALPA, tuah, na dâwtnâk rokual dang kho lo hen hi bang minung tla hi Aigupta ram an suak tâknâk thawk hen na ngaihdam kumza na hâwi hen khan na ngaihdam na ding hen kan ngiar,” a ti.

²⁰ LALPA nih a sâng le, “Na ka ngiar hâwi hen ka ngaihdam na lai.

²¹ Sikhawmsele, ka nung mi leh ka umnâk tual sâl hen thu ka tiamh asi,

²² hi bang zapi minung lakah pakhat khawm chu ram ah lût ding hen an dam lai lo. Ka umnâk mi chêu leh Aigupta ram leh ramkaro ah thilchê ka ti mi khawm an muh, sikhawmsele hi tluk kâ dawnh mi lakah ka thu an êl hen ê-aw an ngâilo nget rih.

²³ An thlâktu tla sinah ka tiamh mi ram chu an lût dah lai lo. Hawng ka duhlotu tla rerêng chunah chun pakhat khawm an lût lai lo.

²⁴ Sikhawmsele, ka to-aw Kaleb chu thinlung dang tak nei mi ka lakah zumhkâi chu a va zauh mi ram ah chun ka kalpi lai le, tuah Kanaan leh,

²⁵ Amalek tla ram kuam chu a thlâk tla nih an luah lai. Thâi ah Akaba likâwlneng lei mi ramkaro ah kîr u,” a ti.

An Chipchiarnâk Ruangah LALPA Nih Zapi Tla A Rêp

²⁶ LALPA nih Mosi leh Aron sinah,

²⁷ “Zeitiang rêmruam me hi zapi minung sual tla hi ka tlûnah an chipchiar awt? Hi chipchiarnâk tla hi ka theih tâwk rawh.

²⁸ Tuah hi sângnâk tla hi pêk na, “Ka nung kar zawzawng chu nan ka deih zia hâwitê hen an pêk na ding hen ka tiam ti, Kei, LALPA ni hin ka sim asi.

²⁹ Nan thi lai le, ramkaro ah nan ruak â vawrh phut lai. Ka tlûnah nan chipchiar ruangah kum kul tlûnlei mi vial chu, chu ram ah nan lût lai lo.

³⁰ Chunah an umtir na ding hen thu chu kan tiamh na, sikhawmsele Kaleb leh Josua cho lo nih chun pakhat khawm nih nan luah lai lo.

³¹ Nan fa tla tleih an siding hen nan ruat le, sikhawmsele nan duh lo mi ram ah chun Keimah nih ka kalpi na lai le, an umnâk ram asi lai.

³² Nannih lam chu hi ramkaro ah hin nan thi lai.

³³ Nan fa le chu hi ramkaro ah hin kum sâwmli an rawl lai le, nan lakah a madung chem mi a thih tiang hen nan zumh kâilonâk chu nan tuar lai.

³⁴ Ram nan va zauh liauah ni sâwmli nan râu mi chu nikhat chu kum khat ah ngaih hen kum sâwmli nan sual ruangah nan tuar lai. Ka duh lo zia hen um hi zei hâwi asi ti nan theih lai!

³⁵ Keimah do hen a pûmtu misual tla sinah ka ti awt ti hen ka tiam rawh asi. Hi ramkaro hi nan ektê hen nan thihnâk mun ding chu asi ti hen, Kei, LALPA nih ka sim rawh asi,” a ti.

^36-37 Mosi nih zauh thlingthlâktu ding hen a fial na mi thusim diklo nih zapi tla chu LALPA tlûnah a chipchiartir na. Churuang chun LALPA nih râi hen a rêp na le, an thi.

³⁸ Zauh thlingthlâktu leinih lakah Josua leh Kaleb cho an dam.

Ram Rûn Ding Hen Tumnâk Masa

³⁹ Mosi nih LALPA thusim chu Israel tla a va simh na le, thungâi an lung a fâk.

⁴⁰ A thâizîng zîngtê hen tlâng ram chu rûn ding hen anna thawh le, “Tuah chun LALPA nih hawng kan simh mi mun leiah kal ding hen kanna tîm ver rawh. Kan sual ngâk ma chu ti hen kanna pûmpêk ver rawh,” an ti.

⁴¹ Sikhawmsele Mosi nih, “Asi chun zei rangah tuah Pathian lakah ê-aw nan ngâilo ne? Nanna dingchang rerêng lai loh.

⁴² Kal rîlmâl lah u, nan sinah LALPA a um awt lêm lo, nan mêlma tla nih an neh na lai.

⁴³ Amalek mi leh Kanaan mi leiah nanna hawi chun tuknâk ah nan thi ding nget; LALPA chu zûl ding nan duh lo ruangah nan sinah a um awt lêm lo,” a ti.

⁴⁴ Chu khawm ah LALPA Thudântuk Bâwm leh Mosi chu riakmun ah mâk thlap hen tlâng leiah kal chu an ngamh nget rih.

⁴⁵ Amalek mi leh Kanaan mi chu ram ah um mi nih chun an do na le, an neh na le, Hormah tiang hen an ṭhâwl na.