NUMBER 13 - Bawm Common Language Bible Version

Zauh Thlingthlâktu Tla

¹ LALPA nih Mosi sinah,

² “Israel ruitu lakah mi, minung pakhat vima hen phun leinih lakah mi thîm na le, Israel tla rangah ka pêk na mi Kanaan ram zauh thlingthlâktu ah leh zauhtu rangah fial na,” a ti.

^3-15 Mosi chu â êt le, Paran ramkaro mun thawk hen hi bang ruitu tla hi a fial na rawh: Phun Ruitu Reuben Zakur fapa Samua Simeon Hori fapa Saphat Juda Jephuneh fapa Kaleb Isakar Josef fapa Igal Efraim Nun fapa Hosea Benjamin Rafu fapa Palti Zebulun Sodi fapa Gadiel Manaseh Susi fapa Gadi Dan Gemali fapa Amiel Aser Mikael fapa Sethur Naphtali Vopsi fapa Nabi Gad Maki fapa Geuel.

Phun Ruitu

¹⁶ Hi bang tla hi ram zauh thlingthlâk ding hen Mosi nih a fial na mi chu an si. Nun fapa Hosea min chu Josua ti hen a thleng.

¹⁷ Mosi nih a fial na liauah an sinah, “Hi thawk hen marlei kângah kal ule, Kanaan ram sim leikâng mi ram tla leh tlâng ram ah va kal u.

¹⁸ Zei hâwi mi ram asi ti leh minung zeizat an um, an chak ma ti tla zauhfiang u.

¹⁹ A ram chu a ṭha ma a sia, minung um mi tla chu kulh nei lo khuapi lakah ma, kulhnei mi khuapi lakah zauhfiang u.

²⁰ A ram chu a ningno ma, thing mun ma asi zauhfiang u. Chu ram ah a kho mi theirah tla chu nan kîr leiah hawng put ngelchel u,” a ti. (Grep rah a min tîr liau asi.)

²¹ Chu minung tla nih chun marlei kângah mi Hamat Liamnâk kiang, Zin ramkaro simlei thawk hen Rehob tiang hen ram chu an zauhfiang ver.

²² A masa hen marlei ram an zauh le, Hebron ah an kal, chunah chun Ahiman, Sesai, Talmai, Anakim murui milian thlâk tla an um. (Hebron chu Aigupta ram Zoan um lân kum sarih a ti rawh.)

²³ Eskol Tivakuam an hawng tleng le, grep ṭeng an lengh le, a rah sûr khat chu minung panih zawnh a um, pomegranate leh theipi tla khawm an tlungpi.

²⁴ (Israel tla nih chunah grep sûr an lengh ruangah Eskol Tivakuam an ti.)

²⁵ Ni sâwmli sungah ram chu an zauh thluh rawh chun, zauh thlingthlâktu tla chu

²⁶ Mosi, Aron leh Israel mi zapi tla umnâk Paran ramkaro ah mi Kades ah an kîr rawh. An muh mi tla chu an phuang le, an theirah phurh chu an zauhtir na.

²⁷ Mosi sinah, “Ram chu kan zauh le, ram ningno tak leh neihnâk tak asi ti kan muh; hin ah a rah tla khawm hi.

²⁸ Sikhawmsele, chu ram ah um mi tla chu mi thiltikho tak, an khuapi tla khawm a lian hen kulhnei mi an si. Ṭhatlo leikângah khawm milian thlâk ṭihnungkâi tak tla an si hen kan muh.

²⁹ Amalek mi tla chu simlei kâng ram ah an um le; Hit mi tla, Jebus mi tla leh Amor mi tla chu tlâng ram ah an um; Kanaan mi tla chu Mediteranian tipi kapah leh Jordan Tiva dung ah an um,” an ti.

³⁰ Mosi tlûnah mi zapi chipchiartu tla chu Kaleb nih a dâitir ruap na le, “Neh ding hen kan chak tâwk reng, tuah kan va kal lai le, ram chu kan lâk ko lai,” a ti.

³¹ Sikhawmsele Kaleb sinah kal mi tla nih chun, “Mah lai le, annih tla do ding hen kan chak tâwk lo; chunah um mi tla chu kan nih ngâk hen thil an ti kho dauh,” an ti.

³² Churawhchun, Israel mi tla sinah ram an va zauh mi thâwngthâng chu diklo tak hen an zanh rawh. Mi zapi chu ram ah um mi tla châwm kho ding hen a ram khawm tirâwl a suak tâwk lo, kan muh na mi zawzawng chu mi sâng tatak an si,

³³ chunah chun, milian tla Anak thlâk khawm kan muh na. Kan zauh na nâkah khâubawk hâwi mêtê hen kanna theih,” an ti.