NUMBER 12 - Bawm Common Language Bible Version

Miriam Rêp Asi Nâk

¹ Mosi nih Kus nunau a umpi, churuangah Aron leh Miriam nih an sâwi.

² “LALPA nih Mosi cho mang hen ma thu a sim? Kannih mang hen khawm thu a sim lo ma?” an ti. LALPA nih an thusim chu a theih.

³ (Mosi chu tual tlûnah mi zawzawng ngâk hen nâu tak hen um mi asi.)

⁴ Lâkkhatko ah LALPA nih Mosi sinah, “Aron leh Miriam nan pathum hen Puanin kawtkâ ka umnâk ah hawng ule kan duh na,” a ti.

⁵ An pathum hen an kal le, LALPA chu sûm lakah a hawng ṭum le, Puanin tualmâi ah a dîr le, “Aron! Miriam!” ti hen a kawh na. An panih hen an va fûk le,

⁶ churawhchun LALPA nih, “Thu ka sim ding mi hi ngâi u, nan sinah khuavâng an um liauah an sinah Keimah tak ka langh le, mang leiah an sinah thu ka sim.

⁷ Ka to-aw Mosi sinah thu ka sim mi lam chu â dang; Israel mi tla zawzawng tlûnah hotu ah ka siah.

⁸ Churuangah mâitawnh hen a sinah thu ka sim le, fiang tak leh lâilanh hen thu ka sim; ka minung khawm hawng ka muh, ka to-aw Mosi hi zeitin nan sâwi ngam zia?” a ti.

⁹ An lakah LALPA chu a thinthawk le, a kaltâk na liauah Puanin chu

¹⁰ sûm nih a kaltâk le, Miriam vun chu lâkkhatko ah râi ṭihnungkâi hen a khat phak, vûr hâwi hen a ngo pût. Aron nih a van zauh le, râi ṭhalo nih a tuam mi chu a muh.

¹¹ Mosi sinah, “Zângfahte hen Pu, âtkâi tak hen kan sual ruangah hi hâwi ngâi hen rêpnâk chu tuar ding hen hawng kan siam lah.

¹² A taksa khingkhuai ei hep hen a hawng suak le, a thi mi hâwi hen umtir lah,” a ti.

¹³ Churawhchun, Mosi nih LALPA chu a auh le, “Pathian, hawng damh rawh,” ati.

¹⁴ LALPA nih a sâng le, “A pa nih a mêl lakah chil sah sele, a mualphonâk ni sarih phurh seh. Churawhchun, riakmun ah mi chu lênglei ah zarhkar khat ding suah u, chu nûnah lûttir nawlh kho asi lai,” a ti.

¹⁵ Miriam chu riakmun lêngah ni sarih kar an siah le, a hawng lût nawlh lânlo chu zapi tla khawm anna ṭhial lo.

¹⁶ Churawhchun, Hazerot chu an kal tâk le, Paran ramkaro ah mun an khuar.