NUMBER 11 - Bawm Common Language Bible Version

Chu Mun Min Chu Taberah

¹ Mi zapi tla chu an lawksawngnâk ruangah LALPA sinah an chipchiar. LALPA nih a theih rawh chun a rothawk le, mi zapi lakah mei a suaktir. A hawng kâng le, riakmun khatlei dawng tiang hen a râwk hep.

² Mi zapi tla chu ṭangpi deih hen Mosi an auh le, Mosi nih LALPA sinah thla a cham le, mei chu a mit rawh.

³ Churuangah chu mun min chu Taberah ti asi, chunah chun an lakah LALPA mei nih a khangh ruangah.

Mosi Nih Ruitu Sâwmsarih A Thîm Na

⁴ Israel tla lakah ramdang mi tla khawm an kal bâk. Meh ei ding an duh chiam le, Israel mi tla men an vûirâm rawh:

⁵ “Aigupta ram ah chun ngâ zawzawng duh tâwk a thawt hen ei ding kan tawng. Chawngmâ, kawr chawngmazil, parûn a hel hen ei mi, parûn sen tla leh parûn ngo kan nei mi tla kha dawn nik u?

⁶ Sikhawmsele tu chun tha kharua kan nei lo rawh. Ei ding zeikhawm a um lo rawh, nisiar hen manna cho lo chu,” an ti.

⁷ (Manna chu chi mêtê hâwi asi, chu chu tâwm a eng ngo zâu.

^8-9 Riakmun ah dâm tlâk liauah zân ah a tlâ. Zînglei ah zapi tla nih an sar le, an râwt mawh sangvut ah an dêng, churawhchun an suang le, sangtlêp ah an siam. Ei chun oliv sariak sang em mi hâwi asi.)

¹⁰ Mosi nih zapi tla an puanin tualmâi ah a murui hen an dîr le, an vûirâm mi chu a theih. LALPA an lakah a thinthawk ti a theih ruangah nuam a ti lo thlo.

¹¹ LALPA sinah, “Zei rangah hi hâwi hen ṭhalo tak hen na ka ti? Zei rangah ka lakah lâwmnâk rêng na nei lo? Hi zapi minung tla rangah mawhphurhnâk zei rangah na ka pêk êu?

¹² Ka siam na mi leh ka ring na mi khawm an si lo! An thlâktu tla sinah na tiamh mi ram leiah nâusêm tla, ka bân ah put mi hâwi hen lampi tluan anmah bulsân ding hen zei rangah na ka ruat?

¹³ Hi bang zawzawng minung khawp rang ding hen zei mi sa ka tawng kho lai? Anna nauh hen sa an ka ngiar ṭualmâl.

¹⁴ Hi zapi minung rangah keimah lâwng chun mawhphurhnâk ka ting kho ding asi lo; ka rangah a rit tuk!

¹⁵ Hi hâwi hen na hawng ka hamhtir asi chun hawng ka zângfah le, hawng ka thah râu rawh, na ka hamhtirnâk hi ka tuar lo rawhnâk ding hen,” a ti.

¹⁶ LALPA nih Mosi sinah, “Zapi ruitu rangah ruat mi minung sâwmsarih zahkâi tak tla kha ka umnâk Puanin tualmâi ah pumh na le, na kiangah dîrtir na.

¹⁷ Chunah chun ka hawng lai le, kan sawnh lai, thlarau kan pêk mi kha annih khawm ka pêk na lai, chu tikah zapi lakah na mawhphurhnâk chu, chu tla nih an ṭangpi lai le, nangmah lâwng na si lai lo rawh.

¹⁸ Tuah zapi minung tla chu thâituan rangah anna thenhlimhtir ding hen simh na; ‘sa ei ding nan tawng lai rawh. Aigupta ram ah sa nan duh mi nan tawng le, chunah um a ṭha dauh nan ti mi leh nanna nauh mi LALPA nih a theih rawh. Tu lam chun LALPA nih sa an pêk na awt rawh le, ei ding nan tawng lai rawh.

¹⁹ Ni khat mawh, ni nih mawh, ni nga mawh, ni râ mawh,

²⁰ ni kul mawh tiang cho nan ei awtlo le, dangtawk leh neng rê hen thla khat kar nan ei lai. Hi hi a hawng tlungnâk san chu LALPA nan sinah um mi chu nan duh lo le, a lakah nan chipchiar hen Aigupta ram nan thlah dahlo rih ruangah asi,’ ” a ti.

²¹ Mosi nih LALPA sinah, “Hinah minung 600,000 ka rui na le, nangnih thla khat kar an ei tâwk sâ ka pêk na lai na ti mu?

²² Anmah khimtir ding hen dawrâ leh ranrual tla a tam tâwk awt ma? Tipi mi ngâ tla an rangah a tam tâwk awt ma?” a ti.

²³ LALPA nih a sâng le, “Ka thiltikhonâk hi tikho ri leh ti kho lo ri a um mazei? Ka sim mi hi a tlung lai ma, tlung lai lo na muh tuan lai,” a ti.

²⁴ Churawhchun, Mosi nih LALPA thusim chu zapi rangah a simh na. Ruitu sâwmsarih tla chu a pumh na le Puanin kiangah a umtir na.

²⁵ Churawhchun, LALPA chu sûm lakah a hawng ṭum le, Mosi chu a sawnh. Mosi rangah a pêk mi thlarau chu a lâk le, ruitu sâwmsarih chu a pêk na. Chu thlarau chu an tlûnah a hawng tlung rawh chun khuavâng tla hâwi hen an hawng âu sawm, sikhawmsele hun sâwt tak rang ding chu asi lo.

²⁶ Ruitu sâwmsarih lakah mi panih, Eldad leh Medad chu riakmun ah an um ko, suak hen Puanin leiah an va kal lo. Chu riakmun ah annih sin khawm thlarau a hawng tlung le, khuavâng hâwi hen an âu.

²⁷ Tlângvâl pakhat chu Eldad leh Medad umdân Mosi simh ding hen a va tek rawh.

²⁸ Nun fapa Josua a tlangvâl liau thawk hen Mosi ṭangpitu nih chun, Mosi sinah, “Pu bângtir na!” a ti.

²⁹ Mosi nih a sâng le, “Ka duh mi hi na duhzia ma? LALPA nih hi mi zapi tla hi khuavâng hâwi hen âu ding hen a thlarau pêk chiau na sele ka duh asi,” a ti.

³⁰ Churawhchun, Mosi leh ruitu sâwmsarih tla chu anmah riakmun leiah an kîr nawlh rawh.

LALPA Nih Mîmtê A Tlungtir

³¹ Lâkkhatko hen LALPA nih tipi thawk hen mîmtê tlungtirtu ding hen thlî a fial, tual ah dâwng nih tluk sah hen a hawng tlâ. Riakmun leh a kiangkam zawzawng munkip an khat dil.

³² Churawhchun, nî tlâk leh khuadei hen a thâizîng tiang khawm ah mîmtê chu mi zapi tla nih an tleih rawh. Minung pakhat nih a sar mi vial kilogramme sâng khat ngâk a tâwm lo. An riakmun kiangah châr ding hen an pho.

³³ Sâ tam tak ei ding an nei liauah LALPA chu mi zapi tlûnah a thinthawk le, an lakah râi a tlungtir.

³⁴ Chu mun min ah chun “Kibrot-hatava’’ (chipchiartu tla thlân) ti hen an sak, sâ duh ruangah chipchiar mi tla an vûi na ruangah.

³⁵ Chu thawk hen mi zapi tla chu Hazerot ah anna ṭhial le, chunah chun um mun an khuar.