NEHEMIAH 9 - Bawm Common Language Bible Version

Zapi Minung Nih An Sual An Phuang

¹ Chu thla lîlâ ni kul leh ni li ni ah Israel tla chu an sual anna sîr ti theihnâk ding hen buhngei hen anna pûm.

² Ramdang lakah mi anna thlei tâ le, an thinlung a fâk tih theihnâk ding ah salâpuan anna aih le, an lû ah valeidip anna phulh. Churawhchun, an thlâktu leh anmah sual phuang ding hen an dîr.

³ Dâr kâr thum ding chu LALPA an Pathian Dân an rêl le, dârkar thum dang chu an sual tla phuang hen LALPA an Pathian an sawnh.

⁴ Levi tla rangah dawnh an siam le, chu lakah chun Jeshua, Bani Kadmiel, Sebaniah, Buni, Serebiah, Bani leh Kenani an dîr. Hâu fâk tak hen LALPA an Pathian sinah thla an cham.

⁵ Hi bang Levi tla rang hin Pathian sawnh ding hen an kawh na: Jeshua, Kadmiel, Bani, Hasabneiah, Serebiah, Hodiah, Sebaniah leh Pethahiah tla hi. Annih nih chun, “Dîr ule, LALPA nan Pathian sawr u; zungzâl zungzâl hen sawr u! Mikip nih a min rokual sawr na seh, minung sawrnâk ko chu tâwk lah menza khawmsele,” an ti.

Sual Phuang Ding Hen Thlachamnâk

⁶ Churawhchun, Israel mi tla nih hi hâwi hen thla an cham: “LALPA, nangmah cho chu LALPA na si; vân tla leh vân ah mi ârfi tla na siam na. Ram leh tisumsumriat leh a sungah thil zeizawng na siam le, an ektê rangah nungnâk na pêk na. Vân thiltikhonâk tla chu kûn hen, nangmah an sawnh.

⁷ LALPA Pathian, nangnih Abram, na thîm le, Babulon ram Ur khua mi na suakpi le; a min chu Abraham ti hen na lêt.

⁸ Na lakah zumhkâi hen na theih le, a sinah thudântuk na siam. Kanaan mi tla ram, Hit mi tla ram, Amor mi tla ram, Periz mi tla ram, Jebus mi tla ram, Girgasit mi tla ram, a thlâk tla umnâk ding hen na tiamh. Nang chu zumh na kâi ruangah na thutiam chu na lêt loh.

⁹ “Kan thlâktu tla nih Aigupta ah an tuarnâk tla chu na muh na. Tipisen ah ṭangpi an ngiar mi na theih.

¹⁰ Lal leh a mi tla leh a ram mi tlûnah thilchê tak hen na ti, na mi tla an nehsawh zia tla na theih ruangah. Tusûn ni tiangah na min a thang phah.

¹¹ Na mi tla rangah tipi lan dak hen lampi na siam piak na le, tual hul tlûnah na kalpi na. Anmah ṭhâwltu tla chu tipi tlingtlawk lakah lung a pil mi hâwi hen tî thûknâk ah na piltir na.

¹² Sûn nî tangah sûm hen na rui na le, zân ah chun mei hen an lampi na cherh piak na.

¹³ Sinai Tlângah vân thawk hen na hawng ṭum le, na mi tla sinah thu na sim le, sîntirnâk ṭha tak leh Dân ṭha na pêk na.

¹⁴ Na Dinhni chu thenhlimh tak hen mang ding hen na sîntir na le, na to-aw Mosi mang hen dân tla na pêk na.

¹⁵ “An sung a vâng rawh chun vân thawk hen sang na pêk na le, an tî a hâl chun lungpi thawk hen tî na pêk na. Ram na tiamh na mi chu kilkâwi ding hen thu na simh na.

¹⁶ Sikhawmsele hawng kan thlâktu tla chu anna zûm le, thu an ngâilo le, na thupêk zûl ding an êl.

¹⁷ Thu an ngâilo le; na thilti tla khawm an philh ver; anna zûmnâk ruangah Aigupta ram lîlâ ah sal tângpitu ding ah ruitu an thîm. Sikhawmsele, nang chu ngaihdamtu Pathian na si le; an lakah vêl na nei hen, na dâwt na, na thinthawk duh loh, Na khuaruatnâk a rokual le, na kaltâk na lo.

¹⁸ Chawchal lem an siam le, hi hi Aigupta thawk hen an suakpi natu chu asi an ti! An siarlo dân a dintuai lo LALPA!

¹⁹ Sikhawmsele, ramkaro ah na kaltâk na lo, na khuaruatnâk a fâk ruangah. A sûn a zân hen lampi simhtu ding ah sûm leh mei na pêk na mi khawm na lâk piak ving na lo.

²⁰ Na ṭhatnâk ruangah na thilti ding mi tla na simh na le, manna hen na châwm na le, din ding mi tî na pêk na.

²¹ Kum sâwmli kar ramkaro ah an herh mi zawzawng na pêk na le, an nipuan tla khawm a ṭet lo, an kê tla khawm a fâk hen a phing lo

²² “An kiangkam ramri mi phundang tla na nehtir na. Sihon nih lâirêlnâk Hesbon ram na nehtir na le, Og lal umnâk Basan ram khawm na nehtir na.

²³ Vân ah ârfi zat hen fa tla na pêk na le, anmah thlâktu tla rangah pêk ding hen na tiamh mi ram na nehtir na hen a sungah na umtir na.

²⁴ Kanaan ram chu an neh le, chunah um mi tla chu na neh na. Kanaan ram ah lal leh mi tla chu anmah duhzia zawng tikho ding hen na mi tla chu thiltikhonâk na pêk na.

²⁵ Na mi tla nih kulhnei khuapi tla, ram ṭha, neih leh siah hen a khat mi tla, tikhurchawh chia, oliv thing tla, rah nei mi leh grep dûm tla na lâktir na. An duh tâwk an ei le, an hawng bit le, na pêk na mi thil lakah thungâi anna lâwm.

²⁶ “Sikhawmsele, na mi tla chu an hel le, na thu an ngâi duh loh, na dân tla chu dunglei an sîttâk. Anmah rim ding hen simhtu khuavâng tla an thah na, zeiliau zawng ah an siarlo.

²⁷ Churawhchun, anmah tlûnah lâirêltu ding hen an mêlma tla na siam na, an lawksawng ni ah ṭangpitu ding ah an auh le, nangnih vân thawk hen na sâng na. Na khuaruatnâk a fâk ruangah an mêlma lakah mi sanhtu ding hen ruitu tla an sinah na fial.

²⁸ An thla a ngam chun a lîlâ hen an sual nawlh le, churawhchun an mêlma tla anmah nehtu ah na siam na. An rim hen na sinah ruangsuah ding hen an ngiar chun, nangnih vân thawk hen na ngâi piak na tâwn le, na khuaruatnâk ruangah ruang na suah na.

²⁹ Na sîntirnâk tla zûl ding hen na fawrh na le, sikhawmsele, anna zûmnâk ruangah na Dân tla zûl hen nungnâk ding chu an duh lo. An lung an khungtir le, ngaihlo lêm an thlâk le, an zûl duh lo.

³⁰ Kum siar hen dawnh kho tak hen nun na simh na le, na khuavâng tla chu thusim ding na simh na le, sikhawmsele na mi tla nih an nâ an settir pang, churawhchun phun dang anmah nehtu ah na siam na.

³¹ Chu khawm ah khua na ruat nget rih le, na kaltâk hen na veih dep na lo, nang chu Pathian vêlnei leh khuaruat mi na si!

³² “Pathian, kan Pathian, nang chu na rokual châwk a! ṭihnung khawm na kai! Thil khawm na ti kho ngâk! Na thutiam lakah zumhkâi tak hen na um. Asiria lal tla nih hawng kan nehsawhnâk hen tutiang thungâi kan tuar! Kan lal tla, hawng kan ruitu tla, kan bâwlpu leh khuavâng tla, hawng kan thlâktu leh mi zawzawng nih kan tuar! Kan tuar fâk dân tla hi theihkumza rawh!

³³ Na kan rêp mi hi na dik asi, kan sual menza khawmsele, nang chu zumh na kâi.

³⁴ Hawng kan thlâktu tla, kan lal tla, ruitu tla leh bâwlpu tla khawm nih na Dân chu an zûl lo. Na dân thu leh na nunhsimhnâk khawm an ngâilo.

³⁵ Na malsâwmnâk ruangah lal tla nih na mi tla lakah lâi an rêl, na pêk na mi ram ningno kâu tak ah an um, sikhawmsele an sual kaltâk hen na rian an ṭuan lo.

³⁶ Na kan pêk mi ram ah hin sal kan si rawh, tî-le-râwl hawng kan pêk mi ram ṭha lakah hin.

³⁷ Kan sual ruangah kanmah tlûnah lâirêltu na siah mi nih a ram mi thil suak chu â ting hep. An duh duh hen kanmah leh kan ran lakah an ti le, thungâi kanna hamh rawh!” an ti.

Mi Zapi Tla Nih Remnâk An Siam

³⁸ Hi bang zawzawng thil hi a um ruangah, kannih Israel mi tla nih remnâk ding hen kan min kan rîn asi. Hawng kan ruitu tla, Levi tla nih an singsiahnâk an rîn.