NEHEMIAH 8 - Bawm Common Language Bible Version

Ezra Nih Zapi Sinah Dân A Rêl

¹ A thla sarihnâk ah Israel tla chu anmah khuapi chiauah an um rawh. Chu thla a ni khat ni ah chun Tiva Kulh Kawtkâ an ti mi kiangah Jerusalem ah anna pûm hep. Bâwlpu Ezra, LALPA nih Mosi mang hen a pêk mi Dân theihtu chu thu an deih.

² Churawhchun, Ezra nih zapi minung, nunau, mipa, ngâksia thu theih kho tâwk ding mi sinah chun Dân bu chu a put rawh.

³ Chu kulh kawtkâ ram ah chun zîngtê khuadei thawk hen nî sûn tiang Dân chu a rêl le, thinlung tak hen an ektê hen an ngâi.

⁴ Zeimaw ni khua rang ding ah thing dawnh an siam mi tlûnah Ezra chu a dîr le, hi bang tla hi a vawrhlei kângah an dîr: Matithiah, Sema, Anaiah, Uriah, Hilkiah, leh Maaseiah. Chun hi bang tla hi a kehlei kângah an dîr: Pedaiah, Misael, Malkijah, Hasum, Hasbadanah, Zekariah leh Meshullam.

⁵ Ezra chu zapi ngâk a sâng dauh mi dawnh tlûnah a dîr le, an ektê hen amah lei an zauh hep. Lasuibu a hawng kêu rawh chun an ektê hen an dîr hep.

⁶ Ezra nih, “LALPA Pathian rokual chu sawr u,” a ti na. Zapi minung zawzawng tla nih tlûnlei ah an bân an zangh le, “Amen! Amen!” ti hen an sâng. Tual ah an mêl tâwng khet kûn hen Pathian an sawnh.

⁷ Churawhchun, an mun chiauah an thawk le, an dîr le, hi bang Levi tla nih Dân an simhfiang na: Jeshua, Bani, Serebiah, Jamin, Akub, Sabethai, Hodiah, Maaseiah, Kelita, Azariah, Jozabad, Hanan leh Pelaiah.

⁸ Hâu suah hen Pathian Dân chu an leh le, zapi minung theih ding hen an simhfiang.

⁹ Zapi tla nih dân a herh zia an theih rawh chun an thinlung a purh le, an ṭap rawh; Churawhchun, Nehemiah lâirêltu, Dân theihtu Ezra, bâwlpu leh Dân theihtu leh Levi tla Dân simhfiangtu tla nih zapi minung tla chu, “Tusûn hi LALPA nan Pathian lakah ni thenhlimh asi, lungfâk hen nan ṭap ding asi loh.

¹⁰ Tuah in leiah lâwi ule; puai lam ei u. A nei lo mi sinah a tâwk ding hen nan buh leh uain kha a ṭhen u. Tusûn hi kan LALPA lakah ni thenhlimh asi le, nan ngaihsia ding asi loh. LALPA nih lâwmnâk a nan pêk na mi nih a nan chaktir na lai,” an ti na.

¹¹ Levi tla nih chubang ni thenhlimh ni ah chun zûr lo ding hen an simh vima na.

¹² Churawhchun, mi zawzawng an in leiah an lâwi le, lâwm tak hen an din hen an ei le, an neih tla khawm midang rangah an ṭhenh na, thu rêl tla chu an theihthiam rawh ruangah.

Basâ Kût

¹³ A thâituan rawh chun thlâk lakah a lukhâi dauh tla chu bâwlpu tla leh Levi tla hen Dân sîn ding hen Ezra sinah an kal.

¹⁴ LALPA nih Mosi sinah Dân a pêk mi chu an theih le Israel mi tla chu Basâ Kût kar zawng chu Basâ lakah um ding hen thu an pêk na.

¹⁵ Churawhchun, hi bang sîntirnâk tla hi Jerusalem leh khuapi dang kip ah an kuat na: “Suak hen tlâng leiah kal ule, far ṭeng, oliv ṭeng, lênmui ṭeng, tûmkâu, leh thing dang ṭeng tla Dân lakah sîntir mi hâwi hen thing ṭeng hen basâ khuar u,” an ti na.

¹⁶ Churawhchun, mi zapi tla nih thing ṭeng tla an lâk le, an in tlûn râwn tla ah, Biakin kulhsung tla ah zatlâng umnâk mun Tikhur Kawtkâ leh Efraim Kawtkâ ah basâ an khuar.

¹⁷ Saltâng hawng kîr mi zawzawng nih basâ an khuar le, chu lakah an um. Hi hi Nun fapa Josua umnâk thawk hen an ti masachemnâk asi, mikip an thînlung a thawk le, anna lâwm.

¹⁸ Chu kût ni, ni khat thawk hen a dawngh tiang hen Pathian Dân nisiar rêlnâk a bîk hen an nei. Ni sarih an mang, a ni riat ni ah chun Dân ah um mi hâwi hen a hun chu khâr asi rawh.