NEHEMIAH 7 - Bawm Common Language Bible Version

¹ Churawhchun, kulh vâm tla remh mi chu lîm asi rawh le, kulh kawtkâ tla khawm amah muntê ah siam asi rawh. Biakin vêngtu murui leh lapawl thenhlimh saktu murui leh Levi anmah rianṭuannâk ding ah ruat an si rawh.

² Jerusalem ah lâirêltu ding ah hotu panih ka ruat na: Kulh leikângah hotu ding hen ka unaupa Hanani leh Hananiah an si. Hananiah chu zumhkâi tak, Pathian ṭih leikângah âukhawm nih tluklo mi asi.

³ Jerusalem kulh chu nî suak lânlo chu awng lo ding leh vêngtu tla vêng ding hen an kal cham nî tlâk tikah khâr ding hen ka simh na. Jerusalem ah um mi tla chu vêngtu ding ah ruat ding hen ka simh na le, mah rianṭuan chiau khiah na hen, a dang vial chu an in kiangkam vêng ding hen.

Sal Tângnâk Thawk Hen Hawng Kîr Mi Tla Rinnâk

⁴ Jerusalem chu khuapi kâu tak asi le, a sungah um mi lam chu an tam chiam lo le, in tam tak khawm sak asi lo rih.

⁵ Pathian nih mi zapi tla leh an ruitu tla leh rianṭuantu tla pumh na hen, an dawngsung tla zauhdik ding hen a hawng ka theihtir. A lânah saltâng hawng kîr masa mi tla rînnâk ka hâwl le, chu rînnâk chu ka tawng:

⁶ Babulon sal ah an tângnâk ram chu mi tam tak nih mâk hen Jerusalem leh Juda ram ah anmah khuapi chiauah an kîr rawh. Nebukadnezar san thawk hen Babulon ah sal ah an tâng.

⁷ Anmah ruitu tla chu Zerubabel, Josua, Nehemiah, Azariah, Raamiah, Nahamani, Mordekai, Bilsan, Mispereth, Bikvai, Nehum leh Baanah.

^8-25 Hi hi Israel phun tla anmah phun lakah an tam zat saltâng hawng kîr mi tla rînnâk chu asi : Parosh- 2,172, Sephatiah- 372, Arah- 652, Pahath Moab (Jeshua leh Joab chi)- 2,818, Elam- 1,254, Zatu- 845, Zakai- 760, Binui- 648, Bebai- 628, Azgad- 2,322, Adonikam- 667, Bikvai- 2,067, Adin- 655, Ater (Hezekiah khawm an ti)- 98, Hasum- 328, Bezai- 324, Harip-112, Gibeon- 95

^26-38 Mi zapi an thlâktu tla hi bang khua lakah an um mi hawng kîr mi tla: Bethlehem leh Netophah-188, Anathoth- 128, Beth Azmaveth- 42, Kariath Jearim, Kephirah, leh Beeroth- 743, Ramah leh Geba- 621, Mikmas-122, Bethel leh Ai- 123, Nebo dang- 52, Elam dang- 1,254, Harim- 320, Jeriko- 345 Lod, Hadid, Ono- 721, Senaah- 3,930

^39-42 Hi hi Bâwlpu tla chi sal tângnâk thawk hen hawng kîr mi tla an si: Jedaiah, (Jeshua thlâk tla)- 973 Imer- 1,052 Pasur- 1,247 Harim- 1,017

^43-45 Levi chi sal tângnâk thawk hen hawng kîr mi tla: Jeshua leh Kadmiel (Hodaviah thlâk tla)- 74, Biakin tumphung tumtu tla (Asap thlâk tla)- 148, Biakin vêngtu tla (Salum, Ater, Talmon, Akub, Hatita, leh Sobai)- 138

^46-56 Biakin rianṭuantu tla sal tângnâk thawk hen hawng kîr mi tla: Ziha, Hasupha, Tabaoth, Keros, Sia, Padon, Lebana, Hagaba, Salmai, Hanan, Giddel, Gahar, Reaiah, Rezin, Nekoda, Gazam, Uza, Paseah, Besai, Meunim, Nephusesim, Bakbuk, Hakupha, Harhur, Bazlith, Mehida, Harsa, Barkos, Sisera, Temah, Neziah, Hatipha tla an si.

^57-59 Solomon to-aw thlâk sal tângnâk thawk hen an hawng kîr mi tla: Sotai, Sophereth, Perida, Jaalah, Darkon, Giddel, Sephatiah, Hatil, Pokereth, Hazebaim leh Amon.

⁶⁰ Biakin rianṭuantu tla thlâk leh Solomon to-aw tla thlâk sal thawk hen hawng kîr mi tla zat chu 392 an si.

^61-62 Delaiah, Tobiah, leh Nekoda tla chu Tel Melah, Tel Harsa, Kerub, Adon leh Imer khua thawk hen hawng kîr mi tla chu 642 an si; Israel phun tak an sinâk lam chu a fiang lo.

^63-64 Hi bang bâwlpu chi tla hi an thlâktu theihnâk singsiahnâk tak tawng kho asi lo: Hobaiah, Hakoz leh Barzilai. (Barzilai chi bâwlpu thlâktu tla nih Barzilai chi Gilead mi nunau a umpi le, a nupi pa min a put.) An thlâktu tla âu asi ti an theih kho lo ruangah bâwlpu ah ruat an si kho lo.

⁶⁵ Juda lâirêltu nih Urim leh Thummim mang khotu bâwlpu silo mi nih chun Pathian sinah ap mi tî-le-râwl an ei kho lai loh ti hen a simh na.

^66-69 Saltâng hawng kîr mi zawzawng zat: - 42,360, An to-aw nunau mipa fawnh hen- 7,337, Tumphung tumtu nunau mipa hen- 245, Rang- 736, Sanatung hâwi mi- 245, Sangâwngsâu- 435, Sanatung- 6,720,

^70-72 Biakin remhnâk ding hen zapi tam tak sinah ṭangpinâk an khawlh: Lâirêltu nih: ngûn kilogramme 8, zarh khêng 50, bâwlpu kawrfual 530, Phun lakah lukhâi tla nih: ngûn kilogramme 168, tangka kilogramme 1,250, Zapi tla zawzawng nih: ngûn kilogramme 168, tangka kilogramme 140, Bâwlpu kawrfual 67,

⁷³ Bâwlpu tla, Levi tla, Biakin vêngtu tla, tumphung tumtu tla, mi rarâu tam tak chu Biakin rianṭuantu tla Israel lakah mi zawzawng chu Juda khuapi tla lakah an um.