NEHEMIAH 3 - Bawm Common Language Bible Version

Jerusalem Kulh Siam Nawlhnâk

¹ Hi hâwi hen khuapi kulh chu siam nawlh asi. Bâwlpu Lianchem Eliasib leh a hâwi bâwlpu tla nih Dawrâ Kulh Kawtkâ an siam le, an ap le, amah muntê ah an dirh nawlh. Insâng Zâ leh Hananel Insâng tiang an ap.

² A sangtu chu Jeriko mi nih an sak. Chu sang nawlhtu chu Imri fapa Zakur nih a sak.

³ Ngâ Kawtkâ chu Hasenaah chi tla nih an sak. A kân leh a kawtkâ tla chu a muntê ah an sak le, a renhnâk ding hen thîr renhnâk an siah.

⁴ Chu sangtu chu Uriah fapa Meremoth, Hakoz tupa nih a sak. Chu sangtu chu Berakiah fapa Meshullam Mesezabel tupa nih a sak. Zarlok fapa Baana nih chu sangtu chu a sak.

⁵ Chu sangtu chu Tekoa mi tla nih an siam le, sikhawmsele khua ruitu tla nih anmah rang ding ah ruat mi rian chu an êl.

⁶ Paseah fapa Joiada leh Besodeiah fapa Meshullam nih Jesanah Kulh Kawtkâ an siam. A kân leh a kawtkâ chu a mun ah an siah, a kulh kawtkâ renhnâk ding hen thîr renh an siah.

⁷ Gibeon a mi Melatiah, Meronoth ah mi Jardon, Gibeon mi leh Mizpah mi nih a sangtu chu an siam le, Eufretis thlanglei mi lâirêltu mun tiang an siam.

⁸ Harhaiah fapa Uziel, ngûn dêngtu nih a sangtu a siam. Rimthâw siamtu Hananiah nih chu sangtu chu Vâm Lian umnâk tiang a siam.

⁹ Hur fapa Rephaiah, Jerusalem mun khingkhuai lâirêltu nih chu sang nawlh chu a siam.

¹⁰ Harumap fapa Jedaiah nih a sangtu amah in kiang chu a siam. Hasabneiah fapa Hatus nih chu sangtu chu a siam.

¹¹ Harim fapa Malkijah leh Pahath Moab fapa Hasub nih chu sangtu leh Oven Insâng an siam vevê.

¹² Halohesh fapa Salum Jerusalem mun khingkhuai lâirêltu nih chu sangtu chu a siam. (Chu rianṭuan chu a fanu tla nih an ṭangpi.)

¹³ Hanun leh Zanoah khua ah um mi tla nih Tivakuam mi Kulh Kawtkâ an siam. Kulh chu a muntê ah an siam le, a renhnâk ding hen thîr an siam le, Nâwm Lawnhnâk Kulh Kawtkâ tiang feet 1500 kulh an remh.

¹⁴ Rekab fapa Malkijah, Beth Hakerem bial lâirêltu nih Nâwm Lawnhnâk Kulh Kawtkâ a remh. Amah muntê ah kulh kawtkâ chu a siam le, a renhnâk ding hen thîr tluan a siam.

¹⁵ Kolhozeh fapa Salum, Mizpah lâirêltu nih Tikhur Kawtkâ a siam. A kulh kawtkâ chu a tuam le, amah muntê ah a siam le, a renh tla khawm a siam. Selah Tili ram ah lal dûm dawtah kulh vâm a siam le, David khuapi leiah kalnâk kal bâk mi tiang hen.

¹⁶ Azbuk fapa Nehemiah, Bethzur ram khingkhuai lâirêltu nih chu sangtu chu a siam le, David thlân, tili leh kawrsen umnâk tiang hen.

Kulh Siamtu Levi Tla

¹⁷ Hi bang Levi tla nih hin kulh vâm zeimawh mun dang tla an remh nawlh. Chu a sangtu chu Bani fapa Rehum nih a remh. Hasabiah, Keilah ram khingkhuai lâirêltu nih amah ram mi ruangrûl ah chu sangtu chu a remh.

¹⁸ Henadad fapa Bavai, Keilah ram khingkhuai lâirêltu nih chu sangtu chu a remh.

¹⁹ Jeshua fapa Ezer, Mizpah lâirêltu nih râlthuam siahnâk mun sangtu chu kulh vâm ngâwinâk mun tiang a remh.

²⁰ Zabai fapa Baruk nih chu sangtu chu Bâwlpu Lianchem Eliasib in tualmâi tiang a remh.

²¹ Uriah fapa Meremoth, Hakoz tupa nih chu sangtu chu Eliasib in dawngh tiang a remh.

Kulh Vâm Siamtu Bâwlpu Tla

²² Hi bang bâwlpu tla nih mun zeimaw ram tla an remh: Jerusalem kiangkam munah mi bâwlpu tla nih chu sangtu mun chu an remh.

²³ Benjamin leh Hasub nih chu sangtu amah in zâwn ram an remh. Maaseiah fapa Azariah, Ananiah tupa nih chu sangtu amah in zâwn a remh.

²⁴ Henadad fapa Benui nih chu sangtu Azariah in thawk hen kulh ki tiang a remh.

^25-26 Uzai fapa Palal nih chu sangtu kulh ki ram ah mi, mun sâng dauh ah mi insâng vêngnâk in kiang a remh. Parosh fapa Pedaiah nih tikhur kiangah mi chu sangtu saklei ram leh Biakin vêngnâk insâng ram a remh. (Hi hi Ophel an ti mi khuapi zeimaw mun ram Biakin rianṭuantu umnâk asi.)

Remhtu Dang

²⁷ Tekoa mi tla nih chu sangtu mun Biakin vêngnâk ram insâng thawk hen Ophel mun tiang an remh.

²⁸ Bâwlpu murui tla nih chu sangtu mun marlei kâng Rang Kawtkâ thawk hen anmah kawtkâ chiau an remh.

²⁹ Imer fapa Zadok nih chu sangtu mun amah in zâwn a remh. Sekaniah fapa Semaiah, saklei ah mi Kulh Kawtkâ vêngtu nih chu sangtu chu a remh.

³⁰ Selemiah fapa Hananiah leh Zalap fapa a paruknâk Hanun nih chu sangtu panih chu an remh. Berekiah fapa Meshullam nih chu sangtu amah in zâwn a remh.

³¹ Malkijah ngûn dêngtu nih chu sangtu mun Biakin rianṭuantu umnâk in leh Mipkad Kulh kawtkâ mi sawlehtu tla mun, mar saklei kângah mi kulh ki ram ah kardang tlûnah mi tiang a remh.

³² Ngûn dêngtu leh sawlehtu tla nih a dawnghnâk mun kulh ki mi kardang thawk hen Dawrâ Kawtkâ tiang an remh.