NEHEMIAH 2 - Bawm Common Language Bible Version

Nehemiah Jerusalem Leiah A Kalnâk

¹ Thla li asi nûnah ni khat chu lal lianchem Artakzerzes buh a ei liauah uain va pêk ding hen a sinah ka kal. Zûr mêl put hen hawng ka muh dahlo ruangah,

² “Zei rangah ti ti na zûr? Na damlo mi khawm asi lo, thinlung lâwmlonâk tak na nei asi lai,” ti hen hawng ka deih. Kei nih hâu suah hen

³ ka sâng le, “Bâwipa, san sâu hen um rawh! Hawng ka thlâktu tla vûinâk mun leh a kulh kawtkâ chu mei nih a râwk hep mi zeitin zûr mêl putlo hen ka um kho zia lai?” ka ti.

⁴ Churawhchun, lal lianchem nih, “Zei tak me na duh?” ti hen hawng ka deih. Vân Pathian sinah thla ka cham rawh chun lal sinah,

⁵ “Lal lianchem nih na ka duhpi mi asi chun Juda ram ah va kal hen hawng ka thlâktu tla anna vûinâk khuapi va sak nawlh ding hen kal ding hawng ka siang le ka duh,” a ti.

⁶ Lal lianchem leh a kiangah lalnu a to mi nih ka deih mi chu an hawng ka siang piak sawm. Ka râu ding zat leh ka hawng kîr tik ding tla lal nih a hawng ka deih.

⁷ Eufretis thlanglei ram ah lâirêltu sinah Juda ram hawng ka ṭawltir ding hen theihtirnâk sunhsaknâk lasui hawng ka pêk ding hen ka deih.

⁸ Chun lal thing mun zauhtu Asap rang khawm ah Biakin vêng mi kiangah khuapi kulh kawtkâ rangah leh ka umnâk rangah thing hawng ka pêk ding hen theihtirnâk lasui lal ka deih. Pathian ka sinah a um ruangah ka deih mi zawng chu lal nih hawng ka pêk.

⁹ Lal lianchem nih kawrsen hotu zeimaw mi tla leh rang tlûn chuantu kawrsen ka sinah a hawng fial na. Eufretis thlanglei kângah khualtlâwng ding hen ka kal rawh. Lâirêltu sinah lal lianchem lasui chu ka pêk.

¹⁰ Sikhawmsele, Beth Horon khua mi Sanbalat leh Amon ram ah mi rianṭuantu Tobiah nih Israel mi tla rangah ṭhatnâk ding ah rianṭuan ding hen mi zeimaw mi tla an hawng ti an theih le, thungâi an thin a thawk.

¹¹ Jerusalem leiah ka kal vima le, Jerusalem siam ding hen

¹² Pathian nih hawng ka simh mi tla chu ni thum kar chu âu sin khawm ka simh na lo. Churawhchun, zânlei ah ka thawk le, ka hâwi le mi tâwmtê ka put na le, ka suak. Ran chu keimah chuannâk ding sanatung pakhat cho kan put.

¹³ Zân asi rih liauah khuapi lakah mi chu ka suak le, thlanglei kângah Tivakuam ah mi kulh kawtkâ leiah ka kal le, simlei kângah Nâwm Lawnhnâk Kawtkâ leiah mi Dragon Tikhur leiah ka kal. Ka kal pah hen khuapi kulh a chim mi leh kulh kawtkâ mei nih a râwk mi chu ka zauh pah vima.

¹⁴ Churawhchun, khuapi saklei kângah ka kal le, marlei ah Tikhur Kulh Kawtkâ leh Lal Tikhurchawh lei khawm ka kal. Ka chuannâk sanatung chu nâwm pawng lakah kalnâk a tawng kho lo le,

¹⁵ churuang chun Kidron Va leiah ka ṭum le, kulh tla zauh vima hen ka kal. Churawhchun, ka hawng kalnâk leiah ka kîr nawlh le, tivakuam mi khuapi Kulh Kawtkâ lei hen ka lût nawlh.

¹⁶ Khua lakah rianṭuantu tla âukhawm nih, zei hâwi ka um, zei thil ka ti an theih rerêng lo. Chu hâwi hen ka hâwi Juda tla, bâwlpu tla, ruitu tla, rianṭuantu tla, âu sin khawm ah zei thu khawm ka simh na lo.

¹⁷ Sikhawmsele, an sinah, “Jerusalem chu â râwk le, a kulh kawtkâ tla khawm râwk hep asi rawh ruangah kan rangah lawksawng a kâi zia hi zauhnik u! Hi khuapi kulh hi kan remh nawlh lai le, kan rangah ningzakkâi chem hi kan dawngtir lai,” ka ti na.

¹⁸ Chun, Pathian ka sinah a um mi leh hawng ka ṭangpi zia, lal nih ka sinah thu a sim mi tla ka simh na. Annih nih, “Sak ding hen kanna dawmh lai rawh ne,” an ti le, rianṭuan ding hen anna tîm rawh.

¹⁹ Sanbalat, Tobiah leh Arab mi Gesem nih kan thiltum an theih rawh chun hawng kan nihsanh le, “Zei ti ding nanna tum? Lal tlûnah nan hel awt mu?” hawng kan ti.

²⁰ Kei nih ka sâng le, “Vân Pathian nih dingchangnâk hawng kan pêk awt. A to-aw tla kan si, sak ding kanna dawmh awt. Sikhawmsele nannih lam chu Jerusalem ah thil-le-rî ah zeikhawm thuneihnâk nan nei lo, dân lak khawm tingvo nan nei lo,” ka ti na.