NEHEMIAH 13 - Bawm Common Language Bible Version

Ramdang Minung Lakah Mi A Thleinâk

¹ Mosia Dân zapi sinah fâk ual hen an hawng rêl rawh chun, Amon mi leh Moab mi tla hen Pathian mi tla chu a tlâinâk um lo rawh ding ti hen thuruatnâk a um.

² A san chu Israel mi tla Aigupta ram ah mi an hawng suak liauah tî-le-râwl an pêk na lo ruangah, chu hâwi ti ding ngangâk hen Israel tla siatbarh ding hen Balaam sinah tangka an pêk, sikhawmsele siatbarh chu malsâwmnâk ah a changtir ving.

³ Israel tla nih Dân an rêl mi an theih rawh chun, ramdang minung zapi lakah um mi tla chu an thliar na rawh.

Nehemiah Remhnawlhnâk

⁴ Bâwlpu Eliasib, Biakin thil siahnâk hotu chu Tobiah hen hun sâwt ual an ṭuan rawh.

⁵ Kardang kâu tak thil ap tla siahnâk mun fâng leh rimthâw, Biakin ah mang mi thuamthil, bâwlpu rang ding ah ap mi parâ lû ah pakhat pêk mi fâng, uain leh oliv sariak, Levi tla, Biakin ah tumphung tumtu tla, Biakin vêngtu tla rangah pêk mi siahnâk mun chu Tobiah nih mang ding hen a pêk.

⁶ Hi bang hâwi liau hin kei chu Jerusalem ah ka um lo, Artakzerzes Babulon lal a sinâk thawk hen kum sâwmthum leh kum nih a tling kum ah, a sinah thu va sim ding hen ka va kîr ruangah.

⁷ Chu nehnûn zeimaw tiang Jerusalem leiah kîr nawlh ding hen hawng ka siang piak. Eliasib nih Tobiah rangah Pathian Biakin kardang mang ding a pêk mi chu ka muh le, ka thinlung a purh zar.

⁸ Ka thin a run le, Tobiah thil zawzawng chu ka lawnh hep.

⁹ Chu kardang chu dân hâwitê thenh hen Biakin thuamthil ap mi fâng leh rimthâw tla siah nawlh ding hen thu ka pêk.

¹⁰ Mi nih Biakin tumphung tumtu tla leh Levi tla chu an eibâr an pêk tâwk na lo ruangah Jerusalem chu kaltâk hen anmah phâisen leiah an kîr nawlh ver ti thu tla khawm ka theih.

¹¹ Pathian Biakin an dâithlanh mi thu ah rianṭuantu tla chu ka simhfâi na. Tumphung tumtu tla leh Levi tla chu Biakin ah rianṭuan nawlh ding hen ka siah nawlh na.

¹² Churawhchun, Israel mi zawzawng nih an fâng parâ lû ah pakhat leh uain leh oliv sariak chu Biakin ah thil siahnâk kardang ah an hawng put nawlh rawh. Hi bang minung tla hi Biakin zauhkhenhtu ah ka siah na: bâwlpu

¹³ Selemiah, Dân theihtu Zadok; Levi mi Pedaiah, Zakur fapa Hanan, Mataniah tupa chu anmah ṭangpitu ding asi. Hi minung tla hi an hâwi rianṭuantu tla rangah thilpêk ṭhenh na ding hen zumh an kâi ti ka theih.

¹⁴ “Ka Pathian, na Biakin rangah leh nangmah sawnh ding ah thil ka ti mi zawzawng tla hi theihkumza rawh.”

¹⁵ Chu liau takah Juda mi tla nih grep hâng an sûr mi ka muh. Mi dang tla nih fâng, uain, grep, theipi leh thil dang tla an sanatung an phurhtir le, Jerusalem leiah an kalpi. “Dinhni ah zeikhawm zuar lah u” ka ti na.

¹⁶ Tura ram ah mi minung Jerusalem ah um mi tla nih ngâ tla leh thil chikip Dinhni ah kan mi leh tla sinah zuar ding hen khuapi ah an hawng put.

¹⁷ Juda ruitu tla chu nun ka simh na le, “Nan thilti sual tla hi zauhnik u! Pathian ni nan nawmh mi hi.

¹⁸ Hi hâwi hen nan thlâktu tla nih an ti ruangah asi Pathian nih hi khuapi lakah siatnâk a hawng tlungtir mi kha. Chu hâwi asi khawm ah nannih nih Israel mi tla tlûnah Pathian thinthawknâk tlungtir ding hen Dinh ni nan buar nget rih,” ti hen.

¹⁹ Chu hâwi ruangah kulh kawtkâ chu Dinhni dawmh ah zânlei kângah ka khârtir na le, Dinhni lîm lânlo chu awng lo ding hen thu ka pêk na. Zeimaw mi tla chu kulh kawtkâ ah ka siah na le, Dinh ni ah khuapi sungah thil zeikhawm lûtpi lo ding hen ka vêngtir na.

²⁰ Veikhat mawh veinih mawh sawlehtu tla nih kulh lêngleiah Laimini zân chu thil zuarnâk ah an mang.

²¹ “Khuadei tiang nan um mi hi zeikhawm a ṭhatnâk a um lo. Hi hâwi nan ti nget chun rêpnâk nan tlûnah ka tlungtir awt,” ti hen ka simh na. Chu thawk chun Dinh ni ah an hawng kîr nawlh lo rawh.

²² Levi tla chu anmah a thenhlimhtir hen Dinh ni thenhlimh tak a mang ding hen kulh kawtkâ vêng ding thu ka pêk na. “Pathian, hi khawm hi theihkumza le, na dâwtnâk rokual tak ruangah hawng ka zuah rawh.”

²³ Chu liau chun Juda tam tak nih Asdod nunau, Amon nunau, Moab nunau tla an umpi ti ka theih fâwn.

²⁴ An fa tla a khingkhuai nih Asdod hawlh mawh phundang hawlh hen an hawlh le, kanmah phun hawlh chu an theih rerêng lo.

²⁵ Chu minung tla chu siatbarh na hen vuak na hen an sam phâwi piak hen nun ka simh na. Churawhchun, anmah leh an fa tla nih phundang tla umpi na lo rawh ding hen Pathian min hen siat ka tleihtir na.

²⁶ An sinah, “Phundang nunau ruangah asi lalchem Solomon nih thilsual a ti phah mi chu. Anih chu phundang lal zawzawng ngâk hen a lian dauh. Pathian nih a dâwt le, Israel zawzawng lakah lal ah a siam le, sikhawmsele hi bang hâwi sual lakah a tlû rawh.

²⁷ Churawhchun, kannih khawm nih nanmah zia châwng hen Pathian thu zûl lo hen phundang nunau kan umpi ding mazei?” ka ti na.

²⁸ Joiada chu Bâwlpu Lian Eliasib fapa asi le, sikhawmsele Joiada fapa pakhat nih Sanbalat fanu, Beth Horon khua mi a umpi le, churuang chun Joiada chu Jerusalem khua mi chu ka nar.

²⁹ Pathian, hi bang mi tla nih bâwlpu rianṭuannâk mun leh bâwlpu leh Levi tla sinah thudân na tuk mi tla an buar mi chu theihkumza rawh.

³⁰ Mi zapi phundang nunau ah anna nawmh mi chu ka thenh na le; bâwlpu tla leh Levi tla nih mah rianṭuan chiau an theih ding hen dân ka siam piak na.

³¹ A tiktê ah thil ap duahnâk thing hawng put ding hen ka ruat le, mi nih an fâng thar rah min masa chem mi hawng put ding hen ka ruat piak na. Pathian, hi bang zawzawng hi theihkumza le, hi ruang hin thangṭhatnâk hawng ka pêk rawh.